₁Nache Ñim Nataxala' qaltaq ỹe'eguelaxalec da 'enapega so Jonás, 'eeta': ₂«'Aue, 'anqo'ona ye 'amaqtaqaic huaqta'a't nỹecpi ye Nínive, nache 'aua'axat da ỹa'aqtac maye 'am sanem qome.» ₃Nache so Jonás taỹa ye Nínive, ỹalaxaguet da la'aqtac Ñim Nataxala'. Qaq ye huaqta'a't nỹecpi ye Nínive, yemaye ỹataqta qalochiguiñi, ỹoqo'oye da qanayiigui nache ivi' naua tres na'axa'te, nache ishet da qaiviraxatec. ₄Nache so Jonás, inoxoneua'a se'eso huaqta'a't nỹecpi, nache imauec so 'oonolec na'a'q da queuotapigui da da'aqtaxaatac, 'eeta': «Qom ivildec naua cuarenta na'axa'te, nache nam Nínive qailaxachigui qome.»

₅Nache so lma' ye Nínive ỹa'amaqten Ñim Lo'onatac 'Enauacna, nache ỹa'axatec da ỹo'ot ca qouaqchetaxac, nache 'enauac so ỹepi ivira'a so ñaqpiolec, da ỹaayiñi naua sansatte' alogo, maye naigui da lta'araic da nqui'ic souaxat na qauempi maye ỹo'ottac. ₆Qaq so nta'a ye Nínive, co'ollaq la'axaỹaxac de'era, nache nataqa'en ñesheguem ca'ai aso nso'onaxaqui da nta'a. Ime, nache nqa't soua ỹaatrañi alogo, nache ỹaayiñi soua sansatte' alogo qataq nso'onangui so alo. ₇Qaq ime, nache so nta'a ỹamaq so ltauapi da da'aqtaxanem 'enauac so netaña ye Nínive da la'aqtac maye, 'eeta': «Qaica qome ca deque'e na shiỹaxauapi, qataq saishet da iquia'axan huo'otaq da nỹomaxan ca na'atetpi shiguiỹacpi, ca lta'araic, qataq ca qapio'olec. ₈Nacherata da 'enauac na shiguiỹacpi da qaỹauo'o ca lapo', qaq na shiỹaxauapi qalaq ỹaayiñi qome caua sansatte' alogo, maye naigui da huo'o da nqui'ic, nache iỹaxanot Ñim Lo'onatac 'Enauacna, qataq ñi 'oonolec ỹaxanec qome ca qauem lataxac, qataq da layeloxo. ₉Shapegueto' da naralaxat ca lhuennataxac Ñim Lo'onatac 'Enauacna, qataq nmooñi da layeloxo, nache saishet da qomi' ilaxachiguilo.» ₁₀Qaq Ñim Lo'onatac 'Enauacna, co'ollaq ila'a da so netaña ye Nínive ỹaxanec nam qauem maye ỹo'ottacpi, nache Ñimaye saishet da ipaca'a da ilaxachigui.