Qaltaq detaqa so Job
1Qaltaq ỹe'eguelaxalec da detaqa so Job, 'eeta':
2«Sanot da ỹa'aqtac Ñim Lo'onatac 'Enauacna,
Ñim Qaica ca Ỹaqalanapec, Ñim saishet da aỹem
itaunec ca ỹaỹamaqchiguiñi lataxac,
qataq aỹem da'aichigui naqa'en da ñiqui'ic,
3qaq da ñaq ñeca'altauec,
qataq da ñaq ñauecta'ape naua ỹa'a'che,
4nache saishet da ñasaxauec ca qauem ỹa'aqtac,
qataq sa ñasaxauec ca saq'en ỹa'aqtac.
5Qataq da ña ñeca'altauec, nache shecto'ot
da shenapec da qaica ca sasouaxat,
¡aỹem saishet da qami' sashenema da 'eeta'am da 'eesa
na aỹem qauasaqaitapeguelec!
6Qaq nache shecto'ot qome da shenapec no'on da ỹataxac, saishet da ñañan,
cha'aye da ñaq ñeca'altauec, nache da ivilỹaxac saishet da aỹem ỹa'aloqchettac.
7¡Qaq 'enauac na aỹem ipa'agueetacpi,
namayepi taỹa'a da imeuo, 'eeta'am na qauemaicpi
qataq na sa ỹaỹamaxañi da lataxac!
8¿Qaq negue'to' ca naquittaique na qauem da lataxac,
qom ivita da Ñim Lo'onatac 'Enauacna nqat da nachaalataxac?
9Cha'aye qom ivita da huaigui ca lqalaic,
nache Ñim Lo'onatac 'Enauacna, ¿peta'a hua'axaỹa ca nachoxonnaxac namayepi?
10Cha'aye saishet da ỹachegoxoto'ot da lamaicỹaxac Ñim Qaica ca Ỹaqalanapec,
qataq saishet da 'enauaque naua na'axa'te da iỹaxaatacot Ñimaye.
11Qaq qami' sachaxanalo qome da lta'araic la'añaxac Ñim Lo'onatac 'Enauacna,
qataq saishet da qami' soxocheesopa
na lapaxañipi Ñim Qaica ca Ỹaqalanapec.
12Qataq mashe qauauañiichigui damaye,
¿qaq ta'ainco' ye qanasaqaitrapeguec
naua na'aqtaqa maye qaica ca naiguilo?»
Da la'aqtac so Sofar
13«Ñim Lo'onatac 'Enauacna, Ñim Qaica ca Ỹaqalanapec,
'era da iqataxaatai' da nhuaxanaguec
naqa'en ca qauem da lataxac, qataq ca qaica ca iren, 'eeta':
14Na'aictoxo' da qalota na llalaqpi camaye,
qalaxaye ileuaigui qome ca alaataxac,
qaq na qapio'olec llalaqpi qalaq nque'etaxangui ca nqouaxa.
15Qaq cam ña nca'altauec,
qalaq ỹalauat qome ca nalolaxa,
qalaxaye ana npa'aipi saishet qome da nỹeelec camayepi.
16Qaq na'aictoxo' da lapoosheguem ana alom plata,
da 'eeta'am naqa'en na lsoche na 'alhua,
qataq lapoosheguem na logoxot,
17qalaxaye ca shiỹaxaua maye ỹaỹamaqchiguiñi da lataxac,
nacheca ca ỹaañi qome que'eca nogoxot,
qataq ca qaica ca ỹasouaxat,
nacheca ca nque'etaxaachigui aca'aca anom plata.
18Ca lma' que'eca qauemaic
qalaq ỹataqta sa da'añi 'eeta'am ca npata'c,
'eeta'am ca na'arañi lma' ca ilotague' ca no'onaxa.
19Da nnaañi qalaq ỹataqta sallaxanec,
qaq da nlouec qalaq mashe qaica ca hueto'ot lalamaxat.
20Da lchecỹaxac qalaq 'eeta'am na auot da nvita camaye ye na'a'q,
qaq ana daua'ache qalaq huaỹoxon naqa'en camaye ye pe.
21Na la'at lta'araic maye chegoxogue da nala' lliguisheguem
ỹache nache pal naqa'en camaye,
qataq napogosheguem chegoqchiguiña naqa'en ca lma',
22Ñimaye ỹataqta sa ichoxonnai' camaye da ỹasheerelec,
na'aictaxa da huotaique da naneltaxan.
23Nache na la'at ỹataqta ỹauota'a na nalataxa,
qataq na l-llimiaxa da icanapec camaye.»