So nauegaxanaxaqui 'epaq
1Qaq co'ollaq cheta'ague da lo'onataxanaxac so Sedequías, som llalec so Josías, da nta'a ye Judá, nache Ñim Nataxala' detaxaỹot so Jeremías, 2nache 'eeta': 'Auo'ot ca 'arañec qataq ca nauegaxanaxaqui 'epaq, nache 'aỹa'ano'ot na 'arana'q. 3Ime nache 'auamaxa ca 'ara'aqtac na nta'alpi ye Edom, Moab, Amón, Tiro qataq ye Sidón, nache 'auamaxague na namaxashecpi maye nvita na Jerusalén da namaqtega ñi nta'a Sedequías. 4Qonapega da 'enapega ca lta'alpi maye 'amaqtaqaicpi, da Aỹem Nataxala' maye Qaica ca Seqalanapec maye Natamnaxala' na Israel le'ecpi, da ỹa'aqtac, 'eeta': 5«Aỹem sauota'a co'ollaxa da lta'araic ỹa'añaxac da so'ot ana 'alhua, qataq na shiỹaxauapi qataq na shiguiỹacpi maye huetalec anamaye, qaq anamaye ishet da sanem cam taalec da sanem. 6Qaq ỹoqo'oye Aỹem sanem 'enauac ne'ena 'alhua da ilo'ogue ñim ỹamaxashec Nabucodonosor, maye nta'a ye Babilonia, qaq ivira'a da ilo'ogue ñaqa'en ñimaye na huauec shiguiỹacpi. 7Qaq 'enauac qome na ỹotta'a't shiỹaxauapi da do'onataxanot ñimaye, qataq ca llalec qataq ca laual, choche ivitta'a qome da ivita ca laloqo' da na 'amaqtaqaic ỹotta'a't shiỹaxauapi qataq na 'añaxaicpi nta'alpi da ilo'ogue na na'alhua ñimaye. 8Qaq da huo'otaq huo'o ca ỹotta'a't shiỹaxauapi, huo'otaq nta'alpi da saishet nañanot ñi Nabucodonosor, nache Aỹem sauo'o qome ca nhuaxanaguec serolec ca alaataxac, nqouaxa qataq napiina, nache choche ivitta'a da nañaneguet da lamaxasoxonaxac ñi Nabucodonosor. Qaq 'era da ỹa'aqtac Aỹem Nataxala'. 9Qaq ỹoqo'oye, saishet qome da qaualaqaitapeeguet ne'ena la'aqtaxanaxanecpi namayepi, qataq nam ilaviigui ca lỹa, qataq na ỹa'axa't naua naiguilo naua nchoxonaxaco, qataq nam 'iyaxaic lo'opi, qataq na 'oiquiaxaipi maye huotaique naxa da ỹa'axat cam ñaq taỹa'a da yo'oq, qataq huaqattega da saishet da qanañanot ñi nta'a ye Babilonia. 10Qaq nam qami' ỹa'axatteguema namayepi, qalaq choche ashepegaxanaxac, qaq nacherata da huotaique da qami' qanqateeguesopa na qana'alhuai, qataq da yaqto' qami' so'oldauec nache qaullivi. 11Qalaxaye cam shiỹaxauapi maye nañaneguet da la'añaxac ñi nta'a ye Babilonia, camayepi sa'aqta'a qome da no'onalec nam na'alhua da yaqto' nache netalec, qataq danaxaateguelec. Qaq 'era da ỹa'aqtac Aỹem Nataxala'.»
12Qaq aỹem Jeremías, sepagaqchiichigui co'ollaxa da sa'axatem ne'enaua na'aqtaqa ñi Sedequías maye nta'a na Judá qataq nataqa'en shenapega, sheeta': «Qanañañeeguet qome da la'añaxac ñi nta'a ye Babilonia qataq nam lauo' le'ecpi yaqto' qanca'alleeuec. 13Cha'aye ¿ta'ainco' taxa da 'am 'aleu, qataq na 'arhuo' le'ecpi da huaigui ca alaataxac, huo'otaq souaxat ca napiina? Cha'aye Ñim Nataxala' ỹa'axat co'ollaxa de'era da talec cam shiỹaxauapi maye saishet da nañanot ñi nta'a ye Babilonia. 14Qaq saishet qome da qaualaqaitapeeguet ne'ena na'aqtaxanaxanecpi maye qami' 'eetegalo naxa da saishet da qanañañiỹot ñi nta'a ye Babilonia, cha'aye dam qami' ỹa'axatteguema naxa damaye choche shepegaxanaxac. 15Ñim Nataxala', ỹa'axat da saishet da lamaxashecpi namayepi. Namayepi naxa da da'aqtaxan nache choche datenataxaatapigui da le'enaxat Ñim Nataxala'. Qaq da 'eetec de'era nache Ñim Nataxala' qami' ilagaxata'ape qome, nache qami', qataq na na'aqtaxanaxanecpi maye qami' ỹa'axatema de'era qaullivi qome.»
16Qaq nataqa'en sa'aqtaxanem de'era na ntaxaỹaxanaxanecpi qataq 'enauac na nhuo' le'ecpi, sheeta': «'Eeta' da la'aqtac Ñim Nataxala': Saishet qome da qaualaqaiguet na na'aqtaxanaxanecpi maye 'eetega saqaỹaloq da qañe'eguelaxat qaỹachegoxotchiguiña ye Babilonia na nogoxoshetpi maye lalamaxat añi atamnaxaqui. Qaq de'era maye qami' ỹa'axatteguema damaye choche ashepegaxanaxac.» 17¡Saishet qome da qaualaqaiguet! Nacherata da qanañañiỹot ñi nta'a ye Babilonia, yaqto' qanca'alleeuec. Cha'aye ¿ta'ainco' taxa da ne'ena huaqta'a't nỹecpi da qailaxachigui qome nache lapoosheguem? 18Cha'aye namayepi taxa da 'eesa da na'aqtaxanaxanecpi, qataq da 'eesa da ña'aqtaxaatague', nache Aỹem iỹaxanot Aỹem Nataxala' maye Qaica ca Seqalanapec, da yaqto' saishet da sasheneguet da qairo'ogue da Babilonia nam logoxoshetpi añi atamnaxaqui maye ñaqauo'o nagui, qataq na huetaigui ñi lma' lta'araic ñi nta'a na Judá qataq na Jerusalén. 19Cha'aye Ñim Nataxala' maye Qaica ca Ỹaqalanapec ỹa'axat co'ollaxa da 'eetec ana nhuoqtepi, qataq añi 'etaxat laỹe' qataq na no'oxonaxala'pi, qataq na laỹe nogoxoshetpi maye no'onaña ne'ena huaqta'a't nỹecpi, 20nam saishet da ỹache co'ollaxa so Nabucodonosor maye nta'a ye Babilonia, co'ollaq ỹachegoxotchiguiña ye Jerusalén da ỹaueegue da Babilonia so Jeconías maye llalec so Joaquim maye nta'a ye Judá, lỹatec naqa'en so 'amaqtaqaicpi ye Judá qataq ye Jerusalén, 21qaq damaye naigui da, nam nogoxoshetpi maye no'onaigui añi atamnaxaqui, qataq ñi lma' lta'araic ñim nta'a ye Judá, qataq ye Jerusalén, da la'aqtac Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': 22«'Enauac ne'enapi qairo'ogue qome da Babilonia, qaq nache hueta'a qome yemaye, choche ivitta'a cam na'a'q qom she'eguena'a nache ñe'eguelaxata ne'ena nma'. Qaq 'era da ỹa'aqtac Aỹem Nataxala'.»