1Ñim atamnaxala' Bel qalaq mashe qaica ca la'añaxac,
qaq ñi atamnaxala' Nebo qalaq hua'axañi nache hueta'aguet na 'alhua.
Ñiimaye qaỹacheleguete qome nam shiguiỹacpi,
qalaq ỹataqta qapa'atte' da ỹacheta'ape
nam shiguiỹacpi maye nasamñi.
2Ñeua ne'enaqtaqa atamnaxala'ate qalaq mashe qaica ca la'añaxa'c,
qataq hua'axareñi hueta'agueta na 'alhua,
nache saishet da nca'alde'c, qaq ñiimaye qaỹauegalo qome ca lỹa 'alhua.
3Ñaq aỹem qana'axaỹaxañiỹa qami'
maye qauachegoqoiguet so Jacob,
qataq 'enauac nam no'onañipi nam nhuo' Israel le'ecpi.
Aỹem qami' sacheta'ape co'ollaq saxanaxa da qami' ñiguiyiñi,
qami' ñachetrashegue'm co'ollaxa,
4qaq choche ivitta'a qome da qami' ỹa'axaiquipi
da saishet da ñaralaxat da ỹataxac,
qom huo'o ana lapagaxai naua qarqaigolli'
qalaq nache shecto'ot qome da qami' ñelletrañi.
Aỹem so'ot co'ollaxa de'era qaq nache shecto'ot qome da qami' ñachetrashegue'm,
Aỹem qami' ñelletrañi qome qataq qami' ñeca'alaxatrec.
5Qaq ¿negue't cam ishet da Aỹem qanaloqñeeguet?
¿Negue't cam qaupicheetega da sheeta'am?
6Qaq huo'o na ỹachegoxotangui na lachoxonaxaqui na qalota oro,
qataq naloqten na lcat plata ỹachangui ana naloqnaxanaxaqui,
ime nache iỹaxana cam ỹaỹaten da do'onataxana
na lcat plata da yaqto' ỹo'ot ca natamnaxala'
qaq da ime nache ỹa'atto'oto naua l-llectel camaye qataq ỹo'oxoreetac.
7Ime nache ỹachalec na lallac da ỹache,
da yaqto' ỹanalec cam lmala' naqa'en,
qaq nache netaña camaye nache saishet da deraỹapigui'.
Qaq na'aictaxa da ỹa'alaqto'ot da iỹaxaataique
cam ltaunaxanaxac qalaq saishet da ỹasat,
qataq saishet nca'alaxateeguesop da lta'araic nque'eenaxac.
8Qaq ña qauennachiỹa'a qome de'era qami' maye qami' 'etaxaloxoicpi,
saishet qome da qauennacheetega cam saq'en,
ỹataqta qauennataxañiitelec qome damaye,
9ña qauennachiỹa'a som so'ot co'ollaxa
maye huaiguilo soua qaỹoqteguelo vi'iye.
Aỹem, nachaỹem Atamnaxala', qaq qaica ca lỹa,
aỹem Atamnaxala' qaq qaica ca lỹa da sheeta'am.
10Nachaỹem maye sa'auchiguiñi da sa'axatta'a co'ollaxa cam loga't de'era,
qataq nachaỹem sa'axata'a co'ollaxa cam ñaq natauo.
Qaq shenapec: Nam llapaxañepi ipacchigui qome da huo'o,
qataq so'ot qome 'enauac nam maiche seuennategapi.
11Aỹem, seỹaxana co'ollaxa so ỹale maye
chegaqa'ague da nala' lliguisheguem,
maye qaỹoqtegue da chegaqa'ague 'eeta'am ca maỹo maye qoỹo lo'o',
nache camaye ỹacoolec qome nam llapaxañepi.
Qaq 'era da ỹa'aqtac qaq damaye ipacchigui qome ñaqa'en,
nam llapaxañepi co'ollaxa qalaq so'ot qome.
12Ñaq Aỹem qana'axaỹaxañiỹa qami' maye
qaramchiguilo naua qarquiyaqchilli',
qami' maye qoñeetega qaỹoqta ca laloqo' da qami' qaisorec.
13Aỹem so'ot qome da saqaỹaloq da qami' qaisorec
da ica'alaqtaxanaxac saishet da qaỹaloqteguet,
da ica'alaqtaxanaxac saishet da qaỹoqta.
Aỹem sanem qome da lca'alaxa ye Sión,
qataq sanem da ỹo'oxoyec na israel le'ecpi