Dam 'eetec qome nam pe'etega ye Egipto
1Qaq Ñim Nataxala' 'eeta':
«¡Choxoraxaso' nam ñalaqpi maye saỹalaq,
nam aỹem saipacapegue' naxa da huo'o na lapaxañi da ỹo'ot,
qataq iqataxanai' da lapaxañi nam saishet da samaxalec,
nache ỹataqta lapootasheguem na lasouaxashetpi!
2Qataq namayepi saishet da aỹem inattac,
nacherata da sanaỹaloxon da taỹa ye Egipto,
da dequiguiỹo'ot ñi Faraón da npaxaalec namayepi,
qataq nache deuaqtacot na lpaqal ye Egipto.
3Qalaxaye da la'añaxac ñi Faraón
ỹo'ot qome da lcoxo namayepi,
qataq da deuaqtacot na lpaqal ye Egipto
ỹo'ot qome da qaica ca 'enec namayepi.
4Qataq na'aictaxa da ỹamaxa ye Soán qataq ye Janés,
na ltaxaỹaxanaxanecpi namayepi,
5Qalaxaye 'enauac qome da huo'o da la'aloxo,
souaxat yi'iye nhuo' le'ecpi maye 'enaqaicpi,
cha'aye saishet da itauan da ỹanem cam iueetaique,
nacherata da ỹanem na saq'en qataq na qauem.»
6Qaỹa'axata'a da 'eetec qome nam
shiguiỹacpi ye Néguev:
Qaq ye 'alhua maye nlaqaalec da lchec,
yem hueta'a na llonpi maye desoqtai',
qataq hueta'a na 'araxanaqpi
qataq nam 'araxanaq maye ishet da huaỹo,
qataq ỹache da lsallaxa qataq na no'on logoxoshetpi
ỹachelec na l-laq na 'ashena
qataq ana nauanaxanaxa,
da ira'a ye Egipto yem nhuo' le'ecpi maye qaica ca ỹaỹaana'a,
7qataq qaica ca la'añaxac
da huotaique da detaunaxan.
Qaq ỹoqo'oye sanagui da ne'enaxat maye, 'eeta':
«Shiguiỹac maye desoqtai' qalaq qaica ca ỹo'ot.»
8Qaq nagui qojec, nache 'erelec qome ca
dapaqaic de'era 'arauanaqchec,
ỹauaachigui 'anqa'en namayepi,
qataq 'erelec qome de'era aca nere da yaqto'
nache huetalec acamaye
choche ivitta'alo caua pa'atrec na'axa'te,
qataq yaqto' chochaq tatec da saishet da qaicoua'ai.
9Cha'aye ne'ena nhuo' le'ecpi ỹataqta
saỹalaq qataq tenataxanaxaicpi,
qataq saishet da na'axaỹaxana
da lapaxaguenataxanaxac Ñim Nataxala'.
10Nam huo'oi naua l-loxoco qalaq 'enapega naxa, 'eeta':
«Saishet da qomi' qaua'aqtaxañima ca qal-loxoqui»,
qataq 'enapega naxa na na'aqtaxanaxanecpi, 'eeta':
«Saishet da qomi' qaua'aqtaxañima
cam qarauanaqchiqui maye 'eesa;
nacherata da qomi' qaua'aqtaxañima naua huesotte'
na'aqtaqa maye ỹo'ot da qanaquitaxac.
11Qoquiỹa'ai qome so nqa'aic
qataq qauasheelec qome so ñec maye ỹashectec,
qataq saishet qome da qomi' qauataxañiỹoto
Ñim Qui'itta Natamnaxala' na Israel le'ecpi.»
12Qaq ỹoqo'oye Ñim Qui'itta Natamnaxala'
na Israel le'ecpi, 'eeta':
«Qami' sa qauacoñiiguet de'era na'aqtac,
nacherata da qanteñiitacot da loquiaxac qataq na qauemsat
maye nachena nam qauaỹamaxayiñiita,
13qaq ỹoqo'oye de'era qarasouaxashechi
maiche qami' taleguete qome,
'eeta'am ca qaỹoqotcheguemec npaqtaxanaxat
maye huo'o ca lpoxoỹaxa, qaq da mashe saqaỹauapeque
da hua'axañi nache nque'elaxatta da hua'axañi,
14qataq 'eeta'am aca ỹomaxaqui 'alhua,
da ỹataqta imauec da dolachigui nache nam saq 'amaqtaq
laỹepiolec qaica ca ishet da qaỹo'ogoxona
da qoỹemaxaua'a aca poqo maye huetangui ca norec,
huo'otaq da qoỹemaxana da qanqatsheguem
ca 'etaxat da qaỹachegoxotangui aca nshere.»
15Qaq cha'aye Ñim Nataxala' Ñim
Qui'itta Natamnaxala' na Israel le'ecpi, 'eeta':
«Qañe'eguelaqai qome, qataq qanmacheeuec yaqto' qanca'alleeuec.
Cha'aye da qara'añaxaqui huetaigui da
qavi'imaqaitac qataq da Aỹem qaua'amaqcheñi.»
Qalaxaye qami' saishet da qauaỹamaxayiñi damaye,
16nacherata da qoñiita': «saishet,
qomi' sataxauec qome sonaxalec na caipi.»
Aja', nache 'eetec qome da qauataiuec.
Qaq nataqa'en qoñiita':
«Sonaxangui qome ana naigonapi maye ỹataqta qayaqaipi.»
Aja', qaq nache 'eetec qome da ỹataqta
qayaqaicpi cam qami' icana'ape.
17Qataq souaxat da larenaxanaxac ca 'oonolec shiỹaxaua,
nache mil qome cam datauec da qoñiita,
qataq souaxat da larenaxanaxa'c caua cinco
nache 'enauac qami' da qauataiuec qome,
choche ivitta'a da qoñeeta'am aca 'oonole qo'oipaq,
maye netalec aca qasoxonaxa huo'otaq aca na'anaxanaqte
maye netalec ca qaỹoqotcheguemec 'alhua.
Qaỹachaxanapec da nca'alaxa
18Qalaxaye Ñim Nataxala' qami' iuatta'alo, da yaqto' qami' ichoxore'n, Ñimaye ỹataqta huo'o da lyaxa da qami' ỹachaxanalo da lsoxoyec, cha'aye Ñim Nataxala' ỹataqta no'on da lataxac. Qaq ỹataqta machiguiñi qome 'enauac nam pi'iỹa'a Ñimaye. 19Qaq qami' Sión le'ecpi maye qoñiitaña na Jerusalén, mashe saishet qome da queta da qannoinaxaqui. Cha'aye Ñim Nataxala' qami' ichoxore'n qom qami' hua'axaỹalo da qaỹaxañiỹaique ca qantaunaguiqui, qaq qom choche qami' hua'axaỹalo nache qami' ỹasategueta. 20Qaq na'aictaxa Ñim Nataxala' da qami' ỹanema qome ca que'ennaxac, qataq cam nhuogoxo, qalaxaye Ñimaye, maye qanapaxaguenaxala'ai saishet qome da queta da nqañoxotteguiñi, maye nacherata da qaloito'ot qome Ñimaye. 21Qaq da huo'otaq qoquiigue nam pa'aỹa'ague da qo'oiqui, huo'otaq na qane'emaqai, nache qaua'aqaỹa qome ca na'aqtac chemaxague da qauachegoqoỹa'ague, 'eeta': «'Ena na nqa'aic nache qoquiitegue namaye.» 22Qaq huaña nache qaica ca naigui qanqa'eñi nam qare'enaqtaqui maye chegaqaigui na lcat plata, qataq nam qare'enaqtaqui maye qalapaxalec na oro. Huaña nache qauasaqaiuec 'eeta'am qanqa'eñi cam lasogoñi maye ỹataqta qauem. 23Qaq Ñim Nataxala' qami' ỹanema qome ca auot, qom qaỹa'añiỹoigui na 'alhua aca qa'añiguishe ala, nache na 'alhua ỹataqta qalota qome ca ñaxaalec trigo. Qaq que'eca na'a'q nache ca qareloipi ỹataqta qolochiguiñi qome ca lquia'aqa'. 24Qaq ivira'a qome na qarauegaxanaxala'aipi, huacapi qataq na 'ashenapi maye qauo'onataxañiiteguelec naxa da qauo'ocheetac na 'alhua, da chectac qome na ỹataqta no'on nchegoxoshec 'auaqpi. 25Qaq qom nvi' cam na'a'q maye huaigui qome da qalota ca qaỹalauat, qataq hua'axañi na npaqtaxanaxatpi, nache huo'o qome na 'etaxat na talapi qataq na la'auaxacpi maye huetalec 'enauac ana qaỹoqotcheguec qasoxonaxapi, qataq ana qaỹoqotcheguemec lcomaraxalatepi. 26Nache Ñim Nataxala' nataren qome na lque'emaxapi qataq lcolaxapi nam lalamaxat nhuo' le'ecpi. Qaq huaña nache na le'eraxa ñi ca'agoxoic 'eeta'am na le'eraxa añi nala', qaq na le'eraxa añi nala', qalaq siete da nquiguec da 'eroigui, 'eeta'am na le'eraxa da huaxaỹa't caua siete na'axa'te.
Da nhuaxanaguec ye Asiria
27Ña qauamachiỹa'aguet, nam Nataxala'
ñaq qaỹoqteguet qalaxaye mashe anacta,
da layeloxo qalaq 'eroigui,
qataq ỹataqta lta'araic na lmala'q,
na alap qalaq ỹataqta nlaqchigui da layeloxo,
ñi lachaxat qalaq 'eeta'am ca norec
maye ỹavigaxatta 'enauacna.
28Da iquetetec na la'at qalaq 'eeta'am ca tala da ipaxaalec
nache nvirasheguema na lqosot na shiỹaxauapi,
da yaqto' ichegoq na ỹotta'a't shiỹaxauapi,
irolec ca nchegoxosoxonaxat
da nlaxaañi namayepi,
qataq ỹanagui na alap ca lqueenaxanaxat na nhuo' le'ecpi
da yaqto' isomapec naqa'en namayepi.
29Qami' qalaxaye qauo'onaxañiitac qome
'eeta'am da huo'o ca na'ashaxac da huaigui ye pe,
qataq machiguiñi qome da qarquiyaqteỹaxaqui,
'eeta'am ca icaatapigui naqa'en da lqauaxac
da l-lamaxa aca nasheere flauta,
da tasheguema añi qasoxonaxa
maye lalamaqte Ñim Nataxala',
añim lle'eguenaxalate na Israel le'ecpi.
30Qaq Ñim Nataxala' ỹo'ot qome da
qaỹa'axaỹa dam ỹo'oxoraq lavilỹaxac,
qataq ỹachaxan da la'añaxac qom
do'ogoxona dam chaqaic layeloxo,
qataq nactaigui na le'eraxa ca norec
maye ỹavigaxat 'enauacna,
qataq ca nqashelgaxa, auot qataq aca lache.
31Qaq ye Asiria qom hua'axaỹa da
lavilỹaxac Ñim Nataxala',
qataq ỹaỹaten da nvita ca nhuaxanaguec,
nache yemaye nlaxagui qome da lcolanaxa.
32Qaq Ñim Nataxala' qom iuaxan qataq qom
ỹe'eguelaxalec da iuaxan yemaye,
nache qaỹa'axaỹa qome da l-lamaxa aca
qataquipi qataq aca arpapi,
cha'aye Ñim Nataxala' qom delogui' yemaye
nache ỹataqta huo'o da lchec que'eca loquiaxac.
33Qaq cha'aye mashe qaỹoqteguelo
soua vi'iye da qaiqataxaatai'
da taỹa'a qanqa'en ye Asiria qataq ñim nta'a yemaye,
yem ỹataqta qaỹoqchiguingui
qataq qalochiguiñi nma' maye huetangui
ye 'ettangui norec maye qalota na lalonaxat qo'oipaqpi.
Ñim Nataxala' qom iquetetec la la'at
nache 'eeta'am ca la'auaxac
na quiquiaxaraic da 'eroigui
nache ỹavigaxat yemaye.