So Ezequiel ỹa'axata'a da qailoquiaxan ye Jerusalén
1Qaq 'am shiỹaxaua, 'auacona qome ca 'oonolec losoc maye ñaq saxanaxa da dato, nache 'erelec camaye da 'avi'inaxat ye huaqta'a't nỹecpi ye Jerusalén. 2Ime nache coleesop 'anqa'en na alleppi qataq na lo'ogoxonaxatpi da alaataxac, qataq 'avi'inaxat ca mpaqtaxanaxat da coleesop, qataq ca ñiguisheguem, yaqto' ỹaatec da 'eeta'am ca huaqta'a't nỹecpi da qaicoleesop. 3Qataq 'auacona ca lcat dapaxalec, nache 'auapoxona camaye da 'auapouga ye huaqta'a't nỹecpi, 'eeta'am 'anqa'en ca mpaqtaxanaxat, nache qonaña ye datatta ye huaqta'a't nỹecpi, 'eeta'am da huotaique da 'auloquiaxan. Qaq de'era nache la'anaxat qome da qaỹataỹa'aguet na Israel le'ecpi. 4Qaq 'am nache 'apa'axaatañi qome na 'ane'emaq da 'annaañi, nache 'anỹoxola't na lasouaxashetpi na nhuo' Israel le'ecpi. Qaq nache qoqueto'ot qome da 'annaatai' da 'apa'axaatañi ne'ena 'araỹe da 'auachetac na lasouaxashetpi namayepi 5caua trecientos noventa na'axa'te, qaq damaye 'eeta': 'Oonolec na'a'q ye 'oonolec vi'i da lasouaxashet na Israel le'ecpi. 6Qaq qom inoxoorec que'ecaua na'axa'te, nache qaltaq 'apa'axaañi na 'oiguishec 'araỹe da 'annaañi, nache 'anỹoxola't na lasouaxashetpi na nhuo' le'ecpi ye Judá, nache ivittrec caua cuarenta na'axa'te. 'Oonolec na'a'q ye 'oonolec vi'i na lasouaxashetpi namaye. 7Qaq ime qome nache 'avi'eguelaxa ye Jerusalén, maye coleesop na mpa'aguenaxauapi, nache 'auauaalec na 'arhuaq nache 'aua'axata'a da taỹa'a yemaye. 8Qaq Aỹem sauo'o qome ca 'arquet da 'am secoñerai', da yaqto' saishet da 'auraỹapigui' nache ivitta'a da 'aviraxattrec caua na'axa'te maye huaiguilo da 'anque'eenaxac.
9Qalaxaye 'am 'auacona qome ca trigo, cebada, mijo qataq avena nataqa'en ca habas qataq ca lentejas, nache 'aualecna't da 'auachangui aca 'oonole laỹe' nache 'auo'ot aca 'arauole. Qaq nachaca aca qollectac qome, ivittrec caua trescientos noventa na'axa'te da 'apa'axaatañi na 'ane'emaxashec 'araỹe da 'annaatai'. 10Qaq ye na'a'q nache 'auauo'o ca ỹoqta laloqo' da qollec que'eca saq 'amaqtaq 'oqolec, 11qaq nataqa'en 'auauo'o ca ỹoqta laloqo' da 'anỹomgui ca saq 'amaqtaq 'etaxat. 12Qaq ca 'oq qome qalaq 'oonole nauole cebada qataq 'auauoxona qome na la'atec ca shiỹaxaua, qaq da qollec nache ỹauaachigui 'anqa'en na shiỹaxauapi.
13Qaq ime, nache Ñim Nataxala' qaltaq, 'eeta': «Qaq cam nallec nshepaxan maye 'eeta'am damaye, nacheca qome ca chectac na Israel le'ecpi qom huaña cam ỹaqa'a 'alhuapi maye selagaxaalec qome namayepi.»
14Qaq huaña nache, sheeta': «'Agai, 'Am Nataxala' maye Ñatamnaxala', aỹem ỹataqta saỹauano' da sacootapigui ca nshepaxan, qataq saỹauano' da sachec ca lapat ca shiguiỹac leuaxaic, huo'otaq ca icolaxattac ca shiguiỹac maye dequi'iỹapec, qataq saỹauano' da she'eguen da sachec ca lapat nshepaxan.»
15Nache Ñim Nataxala' aỹem 'enapega, 'eeta': «Hua' qone', 'am sa'aqta'a da 'aualonaxana ca huaca la'atec, qaq saishet da 'aualonaxana ca la'atec ca shiỹaxaua, da 'auauot aca 'arauole.»
16Qaq nataqa'en aỹem 'enapega, 'eeta': Aỹem so'ot qome da qaica ca nallec ye Jerusalén. Ca nallec qalaq qalcoreeta qome nache na shiỹaxauapi da chectac camaye qalaq huo'o da laquicoxo, qataq ca 'etaxat qalcoreeta qome, qaq qom nỹomgui namayepi nache ỹataqta lta'araic da ncolanaxa. 17Nache qaica qome ca 'etaxat qataq ca qanallec, qaq ñi 'oonolec da ilota'a ñi lỹa nache huo'o da lli'iỹaxa. Qaq souaxat na lasouaxashetpi namayepi nache nquictañi qome da lca'alaxa.