Da nhuaxanaguec ye Egipto
1Ñim Nataxala' aỹem 'enapega nache, 'eeta': 2«'Am shiỹaxaua 'auachegoxotchigui da ỹe'enaxat da 'aua'aqtaxan, nache qoneta':
Da la'aqtac Ñim Nataxala', 'eeta': Qana'alaqaiñi qome souaxat ca na'a'q
3maye mashe nayeetai',
¡Mashe nayeetai' ca na'a'q maye lalamaxat Ñim Nataxala'!
¡Cam na'a'q maye ỹataqta napalñi,
qataq chaqaic maye talec qome na ỹotta'a't shiỹaxauapi!
4Huo'o qome ca alaataxac da qaỹataỹa'aguet ye Egipto,
qaq qom qalota ca qaỹalauat da huaña yemaye,
qataq qom qaiuotaxanec da lsallaxa qataq da qailaxachigui ye Egipto
ivira'a na lo'oxonaxala'pi,
nache ye Etiopía iviloxol qome souaxat da lcolanaxa.
5Qaq nataqa'en huaigui qome ca alaataxac
da qaỹalauat na nalleppi ye Etiopía, Libia,
Lidia qataq 'enauac ye Arabia, Cub qataq na laỹepi nhuo' le'ecpi
qataq nam lma' na laỹepi 'alhuapi maye ntauapi.
6Da la'aqtac Ñim Nataxala', 'eeta':
Cam itauan qome ye Egipto, nache ileuaigui ca alaataxac,
chegoqchiguiña na lma' ye Migdol nache ivira'a ye Asuán.
Da ño'oxoreetapigui la'añaxac ye Egipto damaye qaica qome ca la'amaqchec.
Qaq 'era da san ỹa'aqtac Aỹem Nataxala'.
7Ye Egipto yemaye nlachiguiñi qome, napacalec na laỹepi 'alhuapi maye nlachiguiñi qataq na huaqta'a't nỹecpi maye hueta'a yemaye dolachigui. 8Qaq qom ivita da so'ot da ỹavic yi'iye 'alhua, qataq da dolachigui nam itauan yemaye, huaña nache ỹaỹaten da Aỹem nachaỹem Nataxala'. 9Qaq qom nvi' que'eca na'a'q maye huaigui ca nhuaxanaguec ye Egipto, nache ñamaq qome ca ỹa'aqtaxanaxanecpi nactangui aso auaxai da yaqto' iquichoqchet na ỹe'emaqtac shiỹaxauapi ye Etiopía, qaq yemaye nlaxagui qome da lli'iỹaxa. Qaq que'eca na'a'q mashe yaqta'a da nvi'. 10Aỹem Nataxala' shenapec: Chegoqchigui qome ñaqa'en ñi Nabucodonosor maye nta'a ye Babilonia, da selaxachigui da lsallaxa ye Egipto. 11Ñi Nabucodonosor nnaictague' qome na nalleppi maye ỹataqta qauemaicpi da ilaxachigui yi'iye 'alhua, qataq iloquiaxan qome ye Egipto irolec ca lainecpi, nache nlaqaalec naqa'en yi'iye 'alhua ca leuaxaicpi. 12Qataq so'ot qome da deqaqa so tala Nilo, nache yi'iye 'alhua saneguet da lhuaqỹaxac ca qauemaicpi shiỹaxauapi, qaq chegoqchigui ñaqa'en que'eca chegaqauec shiỹaxauapi da nlachiguiñi ñaqa'en yi'iye 'alhua, qataq 'enauac nam huo'o maye huetalec yemaye. Aỹem Nataxala', 'era da ỹa'aqtac.
13Aỹem Nataxala', shenapec:
Aỹem selaxachigui qome na nqolacpi, qataq sha'axaneguet na saq'en atamnaxala'pi ye Menfis.
Qaq ye Egipto saishet qome da ỹe'eguelaxa da huo'o ca nta'a da ilo'ogue,
nache nlaqaalec ñaqa'en yi'iye 'alhua da ncolanaxa.
14Qataq she'eguelaxata qome da nlachiguiñi ye pa'aigue da taguiñi ye Egipto,
qataq savigaxat ye Soán, qataq sacoolec da ñimit ye Tebas.
15Sematalec qome da ỹayeloxo ye Sin yem lle'eguenaxaqui ye Egipto, qataq selaxachigui da lsallaxa ye Tebas. 16Qataq savigaxat qome ye Egipto, qaq ye Sin qalaq nque'etaxangui qome da nqui'ic, qataq qaỹauo'o qome na lauacpi na lpaqtaxanaxatpi ye Tebas, qaq ye Menfis qalaq qailoquiaxan qome, huaigui ca na'a'q. 17Qaq na nsoxoppi ye On qataq ye Bubastis qalaq ileuaigui qome ca alaataxac, qaq na laỹepi maye lma' yemaye qalaq qaỹauec qome da qaicoñe'. 18Qaq qom selaxachigui da la'añaxac ye Egipto qataq qom sha'axaneguet da la'añaxac maye ỹo'ottac da ño'oxonnaxac, nache añi nala' qome 'om ye Tafnes, qaq ye Egipto qalaq ỹapolec qome ca lo'oc na piguem, qaq na netaigui na lalamaxat huaqta'a't nỹecpi, qalaq qaỹauec qome da qaicoñe'. 19Aỹem sacoolec qome da ñimit ye Egipto, qaq huaña nache ỹaỹaten da Aỹem nachaỹem Nataxala'.»
20Qaq so na'a'q siete, so la'auaxanec ca'agoxoic, so vi'i once, nache Ñim Nataxala' aỹem 'enapega, 'eeta': 21«Aỹem sacagaxat na lhuaq ñi faraón ñim nta'a ye Egipto, nache qaica ca ishet da nataren, huo'otaq da ỹaxachigui na lhuaq da yaqto' ỹe'eguelaxa da huo'o da la'añaxac, qataq da yaqto' ishet da qaltaq nasaqa'a ca lainec. 22Qaq ỹoqo'oye Aỹem Nataxala', shenapec: Aỹem ñechoxot da ñepa'aguenaxaua ñi faraón ñim nta'a ye Egipto. Aỹem sacagaxachiguilo qome naua lhua'q, nam lhuaq maye no'oita qataq na mashe huacagaxaic, nache so'ot qome da ỹetauec ca lainec. 23Qataq so'ot da na Egipto le'ecpi laguelec na ỹotta'a't shiỹaxauapi, qataq laguelec ñaqa'en na ỹotta'a't 'alhuapi. 24Nache sanem qome da la'añaxac na lhuaq ñi nta'a ye Babilonia, qataq sanagui na lhuaq na ỹainec. Aỹem sacagaxachiguilo naua lhua'q ñi faraón, nache ñimaye ỹa'alaq qom nomteguet da lque'emaxa maye ỹo'otec na mpa'aguenaxauapi. 25Sanem qome da la'añaxa'c naua lhua'q ñi nta'a ye Babilonia, qaq naua lhua'q ñi faraón qalaq so'ot qome da qaica la'añaxa'c. Qaq qom sanaigui na lhuaq na ỹainec ñi nta'a ye Babilonia, nache ñimaye qom nauaxaỹaxaasheguem da dataỹa'aguet ye Egipto, huaña nache ỹaỹaten da Aỹem nachaỹem Nataxala'. 26Qataq selagaxaalec qome na Egipto le'ecpi na laỹepi nhuo' le'ecpi, qataq na ỹotta'a't shiỹaxauapi ana 'alhua, huaña qome nache ỹaỹaten da Aỹem nachaỹem Nataxala'.»