Nachetaqtaxanaxat la'auaxanec ala ca nañiguishec
1Qaq qom ivita da qaunoxoñiiua'a ye 'alhua maye qami' ỹanema qome Ñim Nataxala' maye Qanatamnaxala'ai, da yaqto' qaralamaxache qataq da mashe qoñiỹalec yemaye, 2nache qanqache qome ca la'auaxanec ala 'enauac ca ñaxaalec yi'iye 'alhua maye qami' ỹanema qome Ñim Nataxala', nache qauachiỹangui aca npaqta da laỹe' qanqa'eñi da qauroiua'a ca lca'ateua'a da lanataqa' Ñim Nataxala' maye Qanatamnaxala'ai. 3Huaña nache 'anachaateua'a qome ca ntaxaỹaxanaxanec maye do'onataxaatac que'eca na'a'q, nache qoneta': Nagui, aỹem ỹauaachigui Ñim Nataxala' maye Qanatamnaxala', da mashe ñenoxoneua'a ne'ena 'alhua maye ỹachaxanapecot co'ollaxa so hua'au qarta'alpi da yaqto' qaralamaxat namaye. 4Nache ca ntaxaỹaxanaxanec ỹaconeguet qome aca 'aurotauo npaqta maye 'anasoqta'a, nache ỹachalec aca nca'atoxonaxalate maye lalamaqte Ñim Nataxala' maye Qanatamnaxala'ai. 5Nache hua'aqchigui 'anqa'en Ñim Nataxala' maye 'Anatamnaxala', da 'anasaxauec ca 'ara'aqtac, 'eeta': So hua'au ita'alpi chegoxoguet na arameopi maye choche queuoxoicpi co'ollaxa, qataq saq 'amaqtaqpiolec co'ollaq ivita ye Egipto. Huaña nache naña co'ollaxa yemaye, nache ivitta'a da 'añaxaicpi qataq ỹataqta qalota. 6Qalaxaye ye Egipto le'ecpi ỹataqta qomi' sa iyacna'ape, qataq qomi' ỹo'oteque da qarachetataic, qataq qomi' ique'etenque da qanlataguec da so'onataxanaqtac. 7Huaña, nache seỹaxanaqot Ñim Nataxala' maye Natamnaxala' so hua'au qarta'alpi da yaqto' qomi' itaua'n. Nache Ñimaye hua'axaỹa so qanachoxonnaxac, qataq ỹauaachigui da qarachoxoyec souaxat dam qapa'atta qaro'onataxanaxac, qataq da qanamaxasaguec maye qomi' qaique'eteneque. 8Ỹoqo'oye Ñimaye ỹachaxan da lchecỹaxac da la'añaxac maye ỹo'ot da lta'araic ncolanaxa, qataq ỹo'ot 'enauac na saishet da qaỹauanapega. Qaq Ñimaye qomi' nqateeguesopa ye Egipto, 9nache qomi' nauegalo ne'ena souaqta'a nagui, qataq qomi' ỹanema ne'ena 'alhua, maye huaña da sa qoue na huaca lche' qataq na te'esaq lli'i. 10Qaq ỹoqo'oye nagui, aỹem ñerouo ne'ena la'auaxanec ala na ỹañiguishec maye ñaxaalec ne'ena 'alhua, maye aỹem ỹanem Ñim Nataxala' maye Qanatamnaxala'.
Qaq da ime, nache 'aỹa'aneuo aca'aca 'arachetaqtaxanaqte maye huetangui aca'aca npaqta, ỹauaachigui 'anqa'en Ñim Nataxala' maye 'Anatamnaxala', nache 'aua'aroto naua 'al-llecte da 'avio'oxoren Ñimaye. 11Qaq da ime, nache 'am qataq ca 'aỹa'alaqpi, qauo'oche qome ca nquia'axac, souaxat da qantooñitapeguec 'enauac da qanchoxonnataguiiqui, maye qami' ỹanema Ñim Nataxala' maye Qanatamnaxala'ai. Nataqa'en nhuanaua'a qanqa'eñi que'eca qantonaxaqui na leviitapi, qataq ca chegaqauecpi maye qami' netaiguilo.
Nachetaqtaxanaqte maye chegaqaigui aca diezmo
12Qaq da ivireuga ca vi'i tres maye laloxoqui da qoỹaneuo aca diezmo, nache da mashe 'auỹotauga 'enauac aca diezmopi maye chegaqaiguipi ana ala 'enauac ca 'añiguishecpi, qataq da mashe 'aỹa'anem na leviitapi, qataq ca chegaqauecpi, qataq ca saploqpi, qataq aca pa'aipi, da yaqto' ishet da deque'etac da netañalo naua qarma'achilli' ivitta'a da ỹataqta icoma', 13nache hua'aqchigui 'anqa'en Ñim Nataxala' maye 'Anatamnaxala', da 'anasaxauec ca 'ara'aqtac, 'eeta':
Aỹem mashe seỹotauga 'enauac na chegaqaigui na ỹañiguishecpi da yaqto' 'am sanot, nache sanem na leviitapi, qataq na chegaqauecpi, qataq na saploqpi, qataq ana pa'aipi. Nache ỹataqta sepacchigui 'enauac na aỹem 'auamaxalec da so'ot qataq saishet da huo'o ca secoua'ai na 'aramaxasoxonaxacpi. 14Qataq saishet da huo'otaq 'oonole aca sacona da sachec ana mashe seỹotaugapi, na'aictaxa co'ollaxa da sootapoigui da ỹasouaxac, qataq co'ollaq saishet da aỹem qui'itta, huo'otaq da sanem na leuaxaicpi. 'Am Ỹataxala', maye 'Am Ñatamnaxala', aỹem ỹataqta salaxaguet qataq sepacchigui da so'ot 'enauac nam aỹem 'auamaxalecpi. 15'Am maye qonetasheguema na sa qaishetapec 'arma' piguem, no'on qome da 'anamaxaña ca 'archoxonnataxanaxa na 'aralamaxatpi Israel le'ecpi, qataq na 'alhua maye qomi' 'aỹa'anema, maye huaña da sa qoue na huaca lche' qataq na te'esaq lli'i, qaq ipacchigui da 'auachaxanapecot co'ollaxa so hua'au qarta'alpi.
16Qaq ỹoqo'oye nagui, Ñim Nataxala' maye 'Anatamnaxala' 'am ỹamaxalec da ỹataqta 'aualaxagueta qome naua lapaxayiñi lataxaco, qataq naua lamaxasoxonaxaco. Ỹataqta imauec 'anqa'en da 'arquiyaqteỹaxac qataq da 'anachaalataxac. 17Qaq nagui, mashe ime da 'aua'aqtaxaatem Ñim Nataxala', da nacheñi Ñim 'Anatamnaxala', qataq da qoquegue da lataxac da llecỹaxac, qataq 'aualaxaguet na lqataxacpi, lamaxasoxonaxacpi, qataq naua lapaxayiñi lataxaco. 18Qaq nataqa'en nagui, Ñim Nataxala', 'am da'aqtaxanem da 'am Israel, ỹataqta 'am lalamaxat, nache ipacchigui da ỹan la'aqtac co'ollaxa, ỹoqo'oye ỹataqta 'aualaxaguet qome 'enauac na lamaxasoxonaxacpi. 19Qataq Ñimaye 'am ỹo'otec qome da 'anapacalec 'enauac na ỹotta'a't shiỹaxauapi maye lo'onatacpi, yaqto' 'am qaỹo'oxoren. Qataq no'on da 'ana'aqtaguec cha'aye 'am iỹotauga da 'am lalamaxat Ñim Nataxala', maye 'Anatamnaxala'.