1So David qaltaq laỹona't so treinta mil alleppi maye lca'aguishecpi so Israel le'ecpi, 2nache so David chegoqchiguiña ye Baalá maye huaigui ye 'alhua Judá, nache lỹatec 'enauac so nalleppi da nqochenaxat aso arca maye laỹe' soua lqataxaco Ñim Nataxala', asom huaña naxa da qaiỹaxana da le'enaxat Ñim Lo'onatac 'Enauacna maye Qaica ca Ỹaqalanapec maye netaleguete soua ne'enaqtaqa shiỹaxau' maye huo'oi naua laua't datatralec ye nso'onqa' Ñimaye da Nta'a. 3Nache asa'aso arca maye laỹe' soua nqataxaco, qaỹachangui aso naigona dalaxaale nache qaỹache, qaỹachegoxotchiguiña so lma' so Aminadab maye nalec aso qasoxonaxa. Qaq so Uzá qataq so Ajió maye llalqa so Aminadab, ỹauecta'agueta soua lauegaxala'ate aso naigona, 4maye huetangui aso arca maye laỹe' soua lqataxaco Ñim Lo'onatac 'Enauacna, nache so Ajió hua'auta'ague da taỹa'ague asomaye. 5Qaq so David qataq 'enauac so Israel le'ecpi, dasotto'ot Ñim Lo'onatac 'Enauacna, do'onaxaatagui, qataq dasottagui, no'onaxaata'ai' da l-lamaxa aso nviquepi, nasaquiaxanatapi, nasheerepi qataq aso laỹe nviquepi. 6Qaq co'ollaq ivita ye 'alhua le'enaxat lasolaxanaqa' so Nacón, nache pogolaxaareñi soua nauegaxanaxala'ate huaca, nache so Uzá ỹasheleua'a co'ollaxa da yaqto' nllañi aso laỹe' soua nqataxaco. 7Nache Ñim Nataxala' ỹataqta dalemataỹa so Uzá, souaxat de'era 'eetec somaye, nache huaña naqa'en na laỹe aso arca maye laỹe' soua lqataxaco Ñim Nataxala' da ileu naqa'en somaye. 8Nache so David dalemata souaxat Ñim Nataxala' da ileu naqa'en so Uzá, ỹoqo'oye somaye ỹamata'ac da le'enaxat Peres Uzá se'eso 'alhua, qaq choche ivitta'a nagui de'era le'enaxat. 9Qalaxaye se'eso na'a'q so David ỹataqta ñi'iỹa Ñim Nataxala', nache 'eeta': «¡'Onaxaico' qome da saishet da seroua'a ye ima' añi laỹe' naua lqataxaco Ñim Nataxala'!» 10Ỹoqo'oye somaye saishet da iroua'a co'ollaxa so lma' aso laỹe' soua lqataxaco Ñim Nataxala', nache damaxasoxoolec da qaira'a ye lma' so Obed Edom maye Gat le'ec. 11Nache asa'aso arca maye laỹe' soua lqataxaco Ñim Nataxala', nache netaña co'ollaxa ye lma' so Obed Edom soua tres ca'agoxoiqa, qaq Ñim Nataxala' ỹanem co'ollaxa da nqouagaxa somaye qataq 'enauac so llalaqpi.
12Qaq co'ollaq qaỹa'aqtaxanem so nta'a David, da Ñim Nataxala' ỹataqta huo'o naqa'en da nqouagaxa so Obed Edom, qataq so llalaqpi, souaxat da hueta'a ye lma' somaye aso laỹe' soua lqataxaco Ñimaye. Nache so David machiguiñi co'ollaxa da nqo'ona ye lma' so Obed Edom da yaqto' nqochenaxata ye lma' somaye aso arca maye laỹe' soua lqataxaco Ñim Nataxala'. 13Nache soua ỹacheta'ape aso laỹe' soua lqataxaco Ñim Nataxala' co'ollaq ivi' soua seis da qaua, nache so David ỹalauat so 'oonolec nauegaxanaxala' huaca, qataq so qagueta lhuaraic maye chaxaraic da ỹauo'o lachetaqtaxanaxat. 14Qaq so David ỹaatañi co'ollaxa so efod maye chegaqaigui na lino, nache ỹataqta nmatasheguem da la'añaxac da dasotto'ot Ñim Nataxala'. 15Nache somaye qataq 'enauac so Israel le'ecpi ỹa'alaqtagui, nache da la'alaxac naloteguet da l-lamaxa aso nasheerepi, souaxat da machiguiñi da ỹachetac aso arca maye laỹe' soua lqataxaco Ñim Nataxala'. 16Qaq co'ollaq qaiviraxateua'a so huaqta'a't nỹecpi maye lalamaxat so David aso arca maye laỹe' soua lqataxaco Ñim Nataxala', nache aso Mical maye llale so Saúl dalletauec co'ollaxa, nache ỹalletauga so nta'a David da parenaxaatac, qataq dasotto'ot Ñim Nataxala', nache asomaye ỹataqta da'aguelec somaye. 17Qaq aso arca maye laỹe' soua lqataxaco Ñim Nataxala', qairoua'a so npe'l maye nauaxaỹaxaasheguem co'ollaxa so David da yaqto' lma' naqa'en asomaye. Nache so David saỹaỹaloxon da ỹo'ot aso lachetaqtaxanaqte qaỹavigaxatta, qataq aso lachetaqtaxanaqte qanhuaachigui, ỹauaachigui naqa'en Ñim Nataxala'. 18Qaq co'ollaq ime da ỹaneuo aso lachetaqtaxanaqte qaỹavigaxatta, qataq aso qanhuaachigui, nache somaye ỹanem da nchoxonnataguec so nhuo' le'ecpi chegoqchigui naqa'en da le'enaxat Ñim Lo'onatac 'Enauacna maye Qaica ca Ỹaqalanapec. 19Ime, nache 'enauac somayepi da ỹanem ñi 'oonolec aso 'oonole nauole 'ayiiña, qataq na laỹe so lapat, qataq aso nqaxaỹaqta ala ana uva. Qaq co'ollaq imeta somayepi nache 'enauac da ỹe'eguelaxalo soua lma'ate. 20Qaq so David nataqa'en ỹe'eguelaxa so lma' da yaqto' ỹanem nataqa'en da nchoxonnataguec so llalaqpi, qaq aso Mical, asom llale so Saúl, ca'ata'aguet co'ollaxa so David, nache 'eeta': «¡Ỹataqta sa no'onolec nagui dam huaigui na nta'a na Israel, ye nqa't naua alogo da nachaxana 'enauac ana l-latapi na lamaxashecpi, qaica ca la'agaxa 'eeta'am ca choche shiỹaxauatto!» 21Nache so David 'enapeco': «Aja', ỹataqta 'eesa de'era 'ara'aqtac, qalaxaye aỹem sasotto'ot Ñim Nataxala', maye aỹem lca'aguishec co'ollaq aỹem ỹanagui da lo'onataxanaxac so 'arta'a, qataq na llalaqpi, da yaqto' nachaỹem lataxala' 'enauac na nhuo' le'ecpi, maye lalamaxat Ñimaye. Ỹoqo'oye aỹem nache shecto'ot qome da sasotto'ot Ñimaye. 22Qataq nquictec da so'ot qome da ỹataqta qaica ca ỹa'amaqchec, nache sepacchigui da qonapec, qalaxaye ana nlatapi maye 'ectega, anamayepi ỹauo'o qome da ỹa'amaqchec.» 23Qaq aso Mical choche ivitta'a co'ollaxa da ileu da qaica ca llalec.