So Absalón ỹe'eguelaxa ye Jerusalén
1Qaq so Joab, maye llalec aso Seruyá ỹaỹaten co'ollaxa da so nta'a, huo'o da lhuennataxa da nauane' so llalec Absalón, 2ỹoqo'oye somaye damaxasoxona co'ollaxa aso 'alo maye qaica ca nqalaate', maye lma' ye Tecoa, nache 'enapega, 'eeta': «'Avi'inaxat qome da 'auasootac, nache 'aayiñi caua anogo nasouaxaqui', qataq saishet da 'ancoyigui ca coraxat maye ama da laitaỹaxac, 'eeta'am 'anqa'en da mashe qaỹoqtegue da 'arasouaxac souaxat ca 'arqatac. 3Ime, nache 'auca'ateua'a ñi nta'a, nache 'aue'enaxatchigui de'era 'am sanem ỹa'aqtac.» Qaq co'ollaq ime da ỹapaxagueetac asa'aso 'alo so Joab, 4nache asa'aso 'alo maye lashe ye Tecoa, jec co'ollaxa da taỹa so nta'a David. Qaq co'ollaq ivireua'a so nta'a, nache ỹa'alyiñi naua l-llecte, iviraxata'aguet naqa'en na 'alhua na latap, nache 'eeta':
¡'Am nta'a, 'onaxaic taxa da aỹem 'autauan! 5Nache so nta'a inato' asomaye, 'eeta':
¿Ta'ainco' 'am? Nache asomaye 'enapeco':
Qomye, aỹem pa'ai, yem ihua mashe ileu. 6Qaq ana'ana 'arlata 'am nta'a, anamaye dos co'ollaxa soua llalqa, qaq huauga so no'onaxa nache nhuaxaatega't co'ollaxa soomaye, qalaxaye qaica ca ỹauaaleguete da yaqto' isoguilo, nache so 'oonolec soomaye ique'emaqchet so lỹa, nache ỹalauat. 7Qaq nagui, 'enauac na ihuo' le'ecpi aỹem dataỹa'aguet, quetapegueua'a da saneuo so no'onañi ỹalec maye ỹalauat ye lqaỹa, yaqto' qaipalaique lvi' yem ỹalauat somaye, qataq qaica qanqa'en ca no'onañi da yaqto' lalamaxat 'enauac nam nogoxoshetpi. Huaña qome nache imeuo da ñaquitaxac, qataq pal da le'enaxat ye ihua, cha'aye qaica ca ỹache da le'enaxat yemaye, qataq qaica ca no'onañi llalec ana 'alhua. 8Nache so nta'a 'enapega aso 'alo, 'eeta':
'Aue qome 'avi'eguelaxa ca 'arma', cha'aye maiche 'am qanayiuapegue ñaqa'en qome. 9Nache aso 'alo 'enapeco':
'Am nta'a maye ỹataxala', 'onaxaictaxa da aỹem talec 'anqa'en de'era nasouaxashet, qataq na maiche ihuo' le'ecpi, qaq saishet qome da 'am talec qataq da 'aro'onataxanaxac da 'am nta'a. 10Nache so nta'a 'enapeco':
Da huo'o ca 'am saỹalemaxat, nache aỹem 'anauegueua'a, yaqto' saishet da ỹe'eguelaxa da 'am saỹalemaxat qome. 11Qalaxaye asomaye 'enapeco':
'Am nta'a, 'onaxaictaxa da aỹem 'anqouaguec da 'auỹaxanot Ñim Nataxala' maye 'Anatamnaxala', yaqto' que'eca shiỹaxaua maye ipaltaique lvi' souaxat da l-leuaxa ye ỹalec, saishet da nquigaxatec de'era saỹaỹamaxañi maye aỹem talec, nache saishet da ỹalauat so lỹa ỹalec. Nache so nta'a, 'enapeco':
¡Aỹem, sanot da ỹa'aqtac Ñim Nataxala' maye nca'altauec da saishet da choche 'oonolec laue ca naañi que'eca 'aỹa'alec! 12Qalaxaye aso 'alo qaltaq, 'eeta':
'Am nta'a, 'onaxaictaxa da aỹem 'auasheetem da sauo'o ca lỹa ỹa'aqtac.
Nache so nta'a, 'enapeco': «Aja', 'autaqa.» 13Nache aso 'alo, 'enapeco': ¿Ta'ainco' da 'arhuennataxa de'era, ye 'auauotaique da 'auo'otec de'era na nhuo' le'ecpi maye lalamaxat Ñim Nataxala'? Cha'aye de'era 'anasaxauec 'ara'aqtac, naigui da maiche 'anasouaxaala't qome, cha'aye saishet da ñe'eguelaq 'anqa'en so maiche 'aỹa'alec maye jec co'ollaxa. 14Qaq 'eesa da 'enauac qomi' seleuaq qome, shenaqta'am ca 'etaxat da huecorelec na 'alhua, nache saishet da qaltaq qalaỹona't. Qalaxaye Ñim Nataxala' saishet da huo'o ca nqat da nachaalataxac, nacherata da ỹauo'o ca lataxac da yaqto' ca ỹaqa'a ca hueta'ague ishet da 'am ñe'eguelaxa. 15Qaq aỹem, 'am ñanaua'a nagui da 'am sa'aqtaxanem de'era, 'am nta'a, maye 'am ỹataxala', cha'aye ne'ena nhuo' le'ecpi ỹataqta aỹem icolanaqchet. Ỹoqo'oye ana'ana 'aramaxashe da lhuennataxa, 'eeta': Aỹem setaxaỹapegue' nagui ñi nta'a shapegueto' ishet da ỹo'ot ca seỹaxaataique, 16qaq da aỹem na'axaỹaxana ñi nta'a, nache aỹem qataq so ỹalec, qomi' nca'alaxateeguesopa qome da lhuaqỹaxac so shiỹaxaua, maye huotaique da qomi' ỹalaua't, da yaqto' saishet da sonaqtalec na 'alhua maye lalamaxat Ñim Lo'onatac 'Enauacna. 17Qaq ana'ana 'aramaxashe iuatta'a ca 'ara'aqtac, 'am ỹataxala' da yaqto' machiguiñi 'anqa'en, cha'aye 'am nta'a, qoneta'am ca lamaxashec piguem le'ec Ñim Lo'onatac 'Enauacna, da ishet da ỹaỹaten ca 'onaxaic qataq ca qauem, qaq Ñim Nataxala' 'am hueta'aguet qome. 18Nache so nta'a 'enapega asa'aso 'alo, 'eeta': Ñaq aỹem 'anqouaguec, da saishet da huo'o ca aỹem 'oxottaisop nagui da 'am senat.
Nache asomaye, 'enapeco': Aja', ña 'aunataxan, 'am nta'a. 19Nache so nta'a inat co'ollaxa asomaye, 'eeta':
¿Peta'a nacheso so Joab, so 'am ỹamaxalec da 'auo'ot 'enauac de'era? Nache aso 'alo 'enapeco':
Aja', ỹataqta 'eesa de'era 'anasaxauec 'am nta'a. Cha'aye nacheso so 'aramaxashec Joab, so aỹem ỹapaxaguenec 'enauac ne'ena ỹa'aqtacpi. 20Qalaxaye somaye ỹo'ot de'era, cha'aye huotaique da choche ỹaỹamaxaañi de'era. Qalaxaye ye 'am ỹaanaxanaxaic, qataq da 'arauattonaxanaxac, 'eeta'am ca lamaxashec piguem le'ec Ñim Nataxala', da ỹaỹaten 'enauac na huetalec ana 'alhua.
21Nache so nta'a, iỹaxaneuga co'ollaxa so Joab, nache 'enapega, 'eeta':
Aỹem saỹamaxareeta de'era, ỹoqo'oye 'anqo'ona qome ca Absalón, nache 'añe'eguelaxat.
22Nache so Joab ỹa'alyiñi naua l-llecte, nache ivira'aguet naqa'en na latap na 'alhua, souaxat da huo'o naq 'enec naqa'en so nta'a, nache ỹasaxalec da no'on la'aqtac so nta'a, 'eeta':
'Am nta'a, nagui ỹataqta saỹateeta da aỹem 'anqouaguec, cha'aye ishet da 'auo'ot da 'eetapeguec ne'ena 'aramaxashec. 23Qaq co'ollaq ime da la'aqtac so Joab nache jec, taỹa ye Gesur da ỹe'eguena'a so Absalón, nache ñe'eguelaxata ye Jerusalén. 24Qalaxaye so nta'a, ỹamaxa da la'aqtac co'ollaxa somaye da nache taỹa so lma', nache saishet da taua'a somaye. Ỹoqo'oye so Absalón taỹa co'ollaxa so lma', nache saishet da nauane' so nta'a. 25Qaq 'enauac so netaña ye Israel da qaica ca 'eeta'am da lyacỹaxac so Absalón, cha'aye qaica ca 'eeta'am somaye da ỹataqta 'onaxaic, qataq nalochiguiñi. 26Qaq da ivirec naxa ye 'oonolec vi'i, nache qaichec na laue souaxat da ỹataqta qapa'atta, ỹoqo'oye naxa da qanaloqten, nache napactelec ye dos kilos. 27Qaq somaye tres soua llalqa ỹale't, qataq 'oonole aso llale 'alo, le'enaxat Tamar, qaq asomaye ỹataqta 'onaxai. 28Qaq so Absalón dos soua vi'iye da netaña ye Jerusalén, qalaxaye saishet da nauane' so nta'a. 29Qaq huo'o so na'a'q, nache so Absalón iỹaxana so Joab da yaqto' ỹamaxa so nta'a, qalaxaye somaye saishet da jec. Qaq ỹoltaq ỹe'eguelaxalec co'ollaxa da iỹaxana, qalaxaye ñaq 'eetalec da saishet da jec. 30Qaq ỹoqo'oye so Absalón ỹama'q co'ollaxa soua lamaxa'she nache, 'eeta':
Qanqo'oñiỹa qome ye lanaxanaqa' so Joab, yem huaqta'ai' ye ỹanaxanaqa', nache qauavigaxache qome ye lañiguishec cebada. Nache soua lamaxa'she so Absalón, nqo'oora so lanaxanaqa' so Joab, nache ỹavigaxa't. 31Nache so Joab taỹa co'ollaxa so lma' so Absalón, nache inattac, 'eeta':
¿Ta'ainco' na 'aramaxashecpi ye ỹavigaxat so ỹañiguishec? 32Nache so Absalón, 'enapeco':
Aỹem, 'am samaxasoxona co'ollaxa da yaqto' 'anqo'ona ñi nta'a da 'aunat ¿ta'ainco' da sheca'ai naqa'en ye Gesur? ye 'onaxaictoxo' da nache soota'a co'ollaxa yemaye. Qaq nagui, aỹem ñeqo'oneua'a ca nta'a, qaq da huo'o ca ỹasouaxashet, nache 'onaxaictaxa da Aỹem ỹalauat. 33Nache so Joab taua'a so nta'a da da'aqtaxanem de'era la'aqtac so Absalón, nache so nta'a iỹaxaneuga somaye, qaq co'ollaq ivireuo, nache ỹa'alyiñi naua l-llecte, nache ivira'aguet naqa'en na latap na 'alhua. Nache so nta'a napigoxoi' so Absalón.