So Namán qataq so Eliseo
1So Namán maye lataxala' so nalleppi so nta'a ye Siria, qaq se'eso Namán ỹataqta 'amaqtaqaic, ỹoqo'oye so nta'a ỹataqta lauotaxat somaye, cha'aye Ñim Nataxala' ỹachegoxotchigui somaye da qalota da dauegaxan naqa'en ye Siria. Qaq se'eso ỹale, ỹataqta 'añaxaic co'ollaxa, qalaxaye dalola, hueta'ac na lepra. 2Qaq huo'o so huaña da queuotapeguelec ye 'alhua Israel, som siiriopi maye na'attagui so lo'ogoxonaxatpi, nache somayepi loxona co'ollaxa aso nogotole, nache ỹanem aso lhua so Namán da ỹauo'o l-lata asomaye. 3Qaq asa'aso nogotole, 'enapego' co'ollaxa aso na'acoro, 'eeta':
So ña'aco' taxa da nqo'ona ñi Eliseo, maye la'aqtaxanaxanec Ñim Lo'onatac 'Enauacna maye netaña ye Samaria, nache ishet da no'oita na lo'oc maye huetalec na lepra. 4Nache so Namán, taua'a co'ollaxa so nta'a, nache da'aqtaxanem de'era la'aqtac asa'aso nogotole maye Israel lashe. 5Nache so nta'a ye Siria, 'enapeco':
Aja', ỹaỹamaqchiguiñi, nache qojec qome, qaq aỹem sauo'o qome aca ỹere, da taỹa'a ca nta'a ye Israel.
Nache so Namán, jec co'ollaxa, Nache ỹache aso treinta mil lcatpiole ana plata, qataq aso seis mil lcatpiole ana oro, qataq soua diez anogo, 6nataqa'en ỹache da ira'a so nta'a ye Israel aso nere maye huetalec, da 'eeta': «Qom 'auaconeguet ana'ana ỹere, nache 'auaỹaten da 'am samaxa na ỹamaxashec Namán, maye lataxala' na ñalleppi, da yaqto' no'oita 'anqa'en na lo'oc maye huetalec na lepra.» 7Qaq so nta'a ye Israel, co'ollaq ime da itaxaỹaxaatac asa'aso nere, nache ncolaxata'aisalo soua alogo. Nache 'enapeco':
¿Peta'a nachaỹemo' da Ỹo'onatac 'Enauacna, da ishet da san qataq ñeqat da achaalataxac, da yaqto' que'eca nta'a aỹem namaxa de'era ỹale, da yaqto' no'oita ñaqa'en na lo'oc maye huetalec na lepra? ¡Ña qaumichiñiita de'era, cha'aye camaye yo'oqta da nmittaique ca lataxac da aỹem dataỹa'aguet! 8Nache so Eliseo, maye la'aqtaxanaxanec Ñim Lo'onatac 'Enauacna, co'ollaq la'axaỹaxac da so nta'a ye Israel, ncolaxata'aisalo soua alogo, nache ỹamaxaua'a da la'aqtac, 'eeta':
«¿Ta'ainco' da 'ancolaxata'aisalo naua 'ogo? Ñaq aỹem 'anamaxa qome que'eca ỹale, yaqto' ỹaỹaten da ne'ena Israel, huo'o ne'ena na'aqtaxanaxanec.» 9Nache so Namán jec, ñiguingui aso laigona maye lauegaxala'ate soua caaỹo, nache vi'iiguet co'ollaq ivita so lasom so lma' so Eliseo. 10Qalaxaye so Eliseo, ỹamaxauec so lamaxashec da 'enapega somaye, 'eeta':
«'Anqo'onaxaama qome so tala Jordán, nache siete qome da 'avi'eguelaxañi da 'auomñi, nache no'oita qome na 'aro'oc maye huetalec na lepra.» 11Nache so Namán dalemata co'ollaxa, nache jec, qataq 'enapeco':
«Aỹem sepi'itaxaatego' da ỹataqta aỹem nca'ateuga cam na'aqtaxanaxanec, nache aỹem nachatto'ot da iỹaxanot Ñim Nataxala' maye Natamnaxala', qataq ỹauota'a na lhuaq da ipoteua'a nam huaña da ỹalolaxa, nache aỹem no'oita naqa'en.» 12¿Qaq saisheto' peta'a da ỹactec da lyac na 'etaxat, som talapi ye Damasco, Abaná, qataq ye Farfar, da napacalec 'enauac na talapi maye huaña na Israel? ¿Peta'a saisheto' da aỹem no'oita da seuomñigui yemaye?
Qaq ỹataqta dalemata co'ollaxa somaye, nache jec. 13Qalaxaye so lamaxashecpi somaye, taỹa da 'enapega, nache 'eeta':
'Am nataxala', que'eca la'aqtaxanaxanec Ñim Lo'onatac 'Enauacna, da 'am ỹamaxalec taxa ca ỹataqta qalaqaic, ¿peta'a saisheto' da 'auo'ot? ¡Qaq dam 'am ỹamaxalec ye choche 'auomñi, nache 'am no'oita! 14Huaña, nache so Namán, taxaama co'ollaxa so tala Jordán, nache siete da huomñigui, ipacchigui da la'aqtac so la'aqtaxanaxanec Ñim Lo'onatac 'Enauacna, nache na lo'oc somaye ỹe'eguelaxa da 'eeta'am na lo'oc ca nogotolec, nache ỹataqta no'oita. 15Huaña, nache so Namán qataq 'enauac so nnaictague'pi, ỹe'eguelaxa co'ollaxa so netaña so Eliseo maye la'aqtaxanaxanec Ñim Lo'onatac 'Enauacna. Nache co'ollaq ivireua'a somaye, nache so Namán, 'enapeco':
¡Nagui, saỹateeta da 'enauac ana 'alhua, qaica ca lỹa maye Lo'onatac 'Enauacna, nachaqñita Ñim Natamnaxala' na Israel le'ecpi! Qaq ỹoqo'oye nagui 'am ñachoxonnot da 'auaconeguet na lachetaqtaxanaxat, ne'ena 'aramaxashec. 16Qalaxaye so Eliseo 'enapeco':
Qaq cha'aye 'eesa da nca'altauec Ñim Nataxala' maye so'onataxaatacot, da saishet da saconeguet namaye.
Qaq na'aictaxa co'ollaxa da so Namán ỹe'eguelaqto'ot so Eliseo, qalaxaye somaye saishet da ỹaconeguet. 17Nache so Namán 'enapeco':
Ña 'auasheetem taxa ne'ena 'aramaxashec da ỹache ca 'alhua laỹolec, maye sachegoxotaña na 'alhua na Israel, cam nalota'agueta da ỹache' naua dos mola. Cha'aye nache chegoqchiguiña nagui da ne'ena 'aramaxashec, da saishet qome da ỹe'eguelaxa da ỹaneuo aca lachetaqtaxanaqte ỹavigaxatta, huo'otaq ana laỹe nachetaqtaxanaqtepi da ỹanot na laỹepi atamnaxala'pi, maye nachaqñita qome Ñim Nataxala' da ỹanot. 18Qalaxaye ñachoxonnot Ñim Nataxala' da chochaq aỹem ichoxoren, qom ivita da yo'oxonnataxan so nta'a ye Siria da taua'a añi atamnaxaqui ye Rimón, da ỹacootaua'a na ihuaq, qataq da sa'alyiñi naua illecte da huaigui añi atamnaxaqui, nache choche aỹem ichoxoren qome Ñim Nataxala', souaxat da sheetec de'era. 19Nache so Eliseo 'enapeco':
Aja', qojec qalaxaye 'auachetec da 'arlagaxayec.
Nache so Namán jec. Qaq co'ollaq mashe qaỹataueegue, 20nache so Guejazí, maye lamaxashec so Eliseo, maye la'aqtaxanaxanec Ñim Lo'onatac 'Enauacna, deuennataxaataco', 'eeta':
Ñim ỹataxala' choche ỹe'eguelaq naqa'en so Namán, saishet da ỹaconeguet som ndotai'pi somaye. Qaq cha'aye 'eesa da nca'altauec Ñim Nataxala', nache aỹem seca'ategue nagui somaye, saiuena'a da huo'o ca aỹem ỹanem. 21Nache so Guejazí, icaalec so Namán. Nache som Namán co'ollaq ila'aguet so Guejazí da nqalgoqta ca'attaueegue somaye, nache huenoteeguesop aso laigona, nache inat, 'eeta':
¿Peta'a huo'o ca machaqca qanayeuaigui qauem? 22Nache som Guejazí, 'enapeco':
'A'i, qaica camachaqca. Qalaxaye so ña'aco' aỹem namaxague da la'aqtac, 'eeta': «Cheta'ague da nvildeuo ñeua dos nsoxorolqa maye na'aqtaxanaxanaqa, chegoqtra'a añi qasoxonaxa ye Efraín, nache 'am ñachoxoreetot da aỹem 'anem aca tres mil lcatpiole plata, qataq caua dos anogo da yaqto' sanema ñiimaye.» 23Nache so Namán 'enapeco':
Aỹem 'anqouaguec taxa, nache 'auaconeguet ana seis mil lcatpiole ana plata.
Qalaxaye souaxat da so Namán ỹataqta ỹe'eguelaqto'ot somaye da ỹaconeguet somayepi, nache somaye ỹoxochiguilo soua dos noxoiqui', nache ỹauaxaỹaxanegueta soua dos anogo. Nache ỹanema soua dos nale't da ỹache', nache so Guejazí ca'attaueeguelo soomaye. 24Qaq co'ollaq ivitra aso lcomaraxalate, nache so Guejazí ỹaconalo soua laỹe' aso lcatpiole plata maye ỹachetrac soua namaxa'she, nache ỹoxotoigui so nỹec, ime nache ncoyegueneto soomaye, nache ỹe'eguelaxa't. 25Ime, nache so Guejazí, taua'a so na'aco'. Nache so Eliseo, inattaco' somaye, 'eeta':
¿Hua'ague ca 'auachegoqta'ague, Guejazí?
Nache so Guejazí, 'enapeco':
Aỹem, qaica ca saigue. 26Qalaxaye so Eliseo qaltaq ỹe'eguelaxalec da inat, 'eeta':
Cha'aye so huaña da huenoteeguesop aso laigona se'eso ỹale da 'am inat, nache da iuennataxac 'am hueta'aguet. Qalaxaye nagui saishet da laloxoqui, da qaỹaconeguet aca plata qataq ca nogoxot, huo'otaq da qaisheenaxana ca nañiguishec lma', qaguetapi, huacapi, nlatacpi, huo'otaq aca nlatapi. 27Qaq ỹoqo'oye so lepra maye huetalec co'ollaxa na lo'oc so Namán, 'am talec qome, qataq cam 'am chegoxoguetpi chochaq tatec qome da hueta'ac.
Nache so Guejazí, co'ollaq choche ca'ai so Eliseo, nache hualec na lo'oc so lepra, nache ỹataqta ỹapagaq, 'eeta'am ana aloñi.