Da lo'onataxanaxac so nta'a Amasías
1Qaq co'ollaq mashe dos vi'iye da nta'a so Joás, som llalec so Joacaz, maye nta'a ye Israel, nache so Amasías, maye llalec so Joás, ỹacoolec da lo'onataxanaxac da nta'a ye Judá. 2Qaq so Amasías mashe ivi' veinticinco vi'iye da nachaalataxac co'ollaq ỹacoolec da lo'onataxanaxac, qataq ivi' veintinueve vi'iye da lo'onataxanaxac da nta'a, huaña ye Jerusalén. Qaq aso late'e le'enaxat Yoadán, qaq asomaye lma' ye Jerusalén. 3Qaq so Amasías, ỹo'ot co'ollaxa nam ỹataqta ỹaỹamaxareeta Ñim Nataxala', qalaxaye saishet da 'eeta'am so hua'au lta'a David, cha'aye somaye icaachigui nam ỹo'otpi co'ollaxa so lta'a Joás. 4Qataq saishet co'ollaxa da nlaxaañi so qaỹoqotcheguema atamnaqa'pi, ỹoqo'oye se'eso nhuo' le'ecpi nache queto'ot co'ollaxa da ỹo'ottac aso lachetaqtaxanaqtepi, qataq da ỹavigaxattac som lchenaxanaxatpi da huaña somaye. 5Qaq co'ollaq mashe ỹataqta ỹaỹamaxalec da lo'onataxanaxac so Amasías, nache ỹalauat 'enauac som namaxashecpi maye ỹalauat co'ollaxa so lta'a. 6Qalaxaye saishet da ỹalauat som llalaqpi se'eso dalaataxanpi co'ollaxa, cha'aye aso lere so Moisés maye nanettalec nam nqataxacpi maye ỹan co'ollaxa Ñim Nataxala', 'eeta': «Saishet qome da qaỹalauat ca nta'a, souaxat ca lasouaxashet cam llalec, huo'otaq da qaỹalauat cam ñalec souaxat cam lasouaxashet ca lta'a, nacherata da ñi 'oonolec ileualec qome ca maiche lasouaxashet.» 7Qaq so Amasías, nataqa'en ỹalauat so diez mil edomiitapi, huaña so ca'amapega't 'alhua maye huaña na toue, nache loxonec so huaqta'a't nỹecpi ye Selá, nache ỹanagui da le'enaxat Yoctel, nache ivitta'a nagui. 8Qaq co'ollaq ime de'era, nache so Amasías, ỹamaxa da la'aqtac so Joás, som llalec so Joacaz, maye laual so Jehú, maye nta'a ye Israel, nache 'eeta': «Ña 'auanac yaqto' ỹataqta sataỹaqa'a't.» 9Qalaxaye so Joás, maye nta'a ye Israel, ỹasateguet so Amasías, nache ỹamaxa da la'aqtac, 'eeta': «Aso cotaque maye naña ye Líbano, ỹamaxa da la'aqtac aso cedro, 'eeta': ‹Ñaq 'aỹa'anem taxa so ỹalec aso 'aỹa'ale da yaqto' lhua.›» Qalaxaye nateuga co'ollaxa yi'iye so shiguiỹacpi maye chegaqa'a ye Líbano, nache pigui asa'aso cotaque. 10Qaq 'eesa da 'anauec co'ollaxa so edomiitapi, ỹoqo'oye añi 'arquiyaqte ỹataqta nlaqchigui da na'amqaanaxac. Qaq nalotañi da 'ana'amaqteetac, qalaxaye nache qoneta'a qome na 'arma'. ¿Ta'ainco' taxa da 'atapegueua'a dam qauem maye 'am ỹauega da qocañe' qome ye Judá? 11Qalaxaye so Amasías, saishet da na'axaỹaxan. Ỹoqo'oye so Joás, maye nta'a ye Israel, jec co'ollaxa da yaqto' dataỹa'aguet so Amasías, huaña ye Bet Semes, maye huaigui ye 'alhua Judá. 12Nache so Israel le'ecpi, nauec co'ollaxa so Judá le'ecpi, nache so Judá le'ecpi, datauec ỹe'eguelaxalo soua lma'ate. 13Qaq so Joás, maye nta'a ye Israel, loxonec co'ollaxa so Amasías, som llalec so Joás, maye nta'a ye Judá, huaña ye Bet Semes. Qaq co'ollaq ime, nache somaye taỹa ye Jerusalén, nache iqalagoxotec so ciento ochenta metro som lpaqtaxat se'eso huaqta'a't nỹecpi, chegoqchiguiña so lasom Efraín, nache ivitta'a so lasom maye naña aso lamaxa somaye. 14Qaq nataqa'en ỹacona co'ollaxa 'enauac so oro, plata, qataq 'enauac som nogoxoshetpi maye huetaigui aso atamnaxaqui maye lalamaqte Ñim Nataxala', qataq som huetaiguipi so nma' lta'araic maye lo'onataxanaqa' so nta'a.
Nache co'ollaq ime da loxonecpi so llalaqpi so nta'a, nache ỹe'eguelaxa ye Samaria.
15Qaq na laỹepi na'aqtaguecpi so Joás, qataq nam ỹo'otpi, qataq da la'añaxac co'ollaq nalattague' so Amasías, maye nta'a ye Judá, nache nanettalec aso nere maye huetalec da na'aqtaguec so nta'alpi ye Israel. 16Qaq co'ollaq ileu so Joás, nache qailareña ye Samaria, qaỹalecnoigui so hua'au nta'alpi ye Israel. Qaq da lo'onataxanaxac da nta'a, nache talec so llalec Jeroboán.
17Qaq so Amasías, maye llalec so Joás, maye nta'a ye Judá, somaye ña nca'altauec co'ollaq mashe ivi' soua quince vi'iye da ileu so Joás, som llalec so Joacaz, maye nta'a ye Israel.
18Qaq nam laỹepi na'aqtaguecpi so Amasías, nache nanettalec aso nere maye huetalec nam na'aqtaguecpi so nta'alpi ye Judá. 19Qaq huaña ye Jerusalén da qaỹataỹa'aguet co'ollaxa so Amasías, qaq somaye datauec, ỹe'eguena ye Laquis, qalaxaye qaicaalec, nache qaiviraxata'a ye Laquis, huaña nache qaỹalauat. 20Ime, nache qaỹasaxalec so caaỹo da qaỹe'eguelaxata ye Jerusalén, yem huaña da qailareñi, huaqta'ai' qanqa'en som hua'au lta'alpi maye huaigui so huaqta'a't nỹecpi maye lalamaxat so David. 21Huaña, nache 'enauac se'eso nhuo' le'ecpi ye Judá, ỹaneuo so Azarías, maye mashe ivi' dieciséis vi'iye da nachaalataxac, da talec naqa'en da lo'onataxanaxac so lta'a Amasías. 22Qaq co'ollaq mashe ileu so lta'a so Azarías, nache qaltaq no'oxoosheguem so huaqta'a't nỹecpi ye Elat, maye ỹe'eguelaxa da lalamaxat naqa'en ye Judá.
Da lo'onataxanaxac so lỹa Jeroboán
23Qaq co'ollaq mashe ivi' quince vi'iye da lo'onataxanaxac so Amasías, som llalec so Joás, maye nta'a ye Judá, nache so Jeroboán, maye llalec so Joás, ỹacoolec da lo'onataxanaxac da ilo'ogue so Israel le'ecpi, qaq somaye ivi' cuarenta y uno vi'iye da lo'onataxanaxac da nta'a, huaña ye Samaria. 24Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye saishet da ca'ai nam qauemsat maye ỹo'otpi co'ollaxa so Jeroboán, maye llalec so Nabat, maye ỹo'ot co'ollaxa nam lasouaxashetpi so Israel le'ecpi. 25Qaq so Jeroboán, qaltaq ỹe'eguelaxa co'ollaxa da ỹaỹamaxaañi, som loga'tpi yem 'alhua ye Israel, chegoqchiguiña som ñegueuo ye Jamat, nache ivitta'a aso auaxai Arabá, qaq nache ipacchigui da la'aqtac Ñim Nataxala' maye ỹa'axat co'ollaxa so lamaxashec Jonás, maye llalec so Amitay, som na'aqtaxanaxanec maye lma' ye Gat Jéfer. 26Cha'aye Ñim Nataxala' ilota'a da ỹataqta lta'araic nque'eenaxac so Israel le'ecpi, so nlatacpi qataq som saishet da nlatac, maye qaica ca anac da itauan. 27Qalaxaye Ñim Nataxala', nca'alaxatec co'ollaxa somayepi, ỹachegoxotchigui so Jeroboán, maye llalec so Joás, cha'aye Ñimaye saishet da lhuennataxa da pal naqa'en da le'enaxat so Israel le'ecpi ana'ana 'alhua.
28Qaq nam laỹepi na'aqtaguecpi so Jeroboán, qataq 'enauac nam ỹo'otpi, qataq da la'añaxac, qataq nam alaataxacpi maye ỹo'ot co'ollaxa, qataq co'ollaq loxonec ye Damasco, qataq ye Jamat da yaqto' qaltaq ỹe'eguelaxa da lalamaxat na Israel le'ecpi, nache nanettalec aso nere maye huetalec da na'aqtaguec so nta'alpi ye Israel. 29Qaq co'ollaq ileu so Jeroboán, nache qailareñi huaqta'ai' qanqa'en so hua'au nta'alpi ye Israel. Qaq da lo'onataxanaxac da nta'a, nache talec so llalec Zacarías.