Na laỹepi lo'onataxanaxacpi so Salomón
1Qaq so Salomón, co'ollaq inoxoorec soua veinte vi'iye da ỹo'ottac aso atamnaxaqui maye lalamaqte Ñim Nataxala', qataq so lma' lta'araic somaye, 2nache qaltaq no'oxoosheguem so huaqta'a't nỹecpi maye so Jirán ỹanem co'ollaxa somaye, nache naña naqa'en somaye so Israel le'ecpi.
3Ime nache so Salomón, qaltaq nqo'ona ye Jamat maye huaigui ye Soba, nache deuotaxanec. 4Qaq nataqa'en no'oxoosheguem ye Tadmor, maye huaña ye toolec 'alhua, qataq 'enauac so huaqta'a't nỹecpi maye naỹamaqtaqa' na nallec, maye no'oxoosheguem co'ollaq huaña ye Jamat. 5Qaq nataqa'en no'oxoosheguem ye Bet Jorón maye nasheguema ye pa'asheguem, qataq ye Bet Jorón maye naña na npa'aguiñi, som huaqta'a't nỹecpi maye huo'o na lpaqtaxat, qataq naua laso'omi, qataq so lpataxasoxotpi so lasompi, 6nataqa'en ye Baalat, qataq so laỹepi huaqta'a't nỹecpi maye naỹamaqtaqa' na nallec, qataq so nỹecpi maye laỹonaqa' ana naigonapi maye alaataxaquipi, qataq so laỹonaqa' so caipi, qataq 'enauac so detaxaỹa co'ollaxa da ỹo'ot so Salomón, som huaña ye Jerusalén, qataq ye Líbano qataq 'enauac nam huaña na 'alhuapi maye ilotague' somaye. 7Qaq som no'onalec co'ollaxa yi'iye 'alhua hitiitapi, amorreopi, heveopi, ferezeopi, qataq so jebuseopi, som saishet da Israel le'ecpi, 8maye chegoxoguet som hua'aupi som no'onaña co'ollaxa yi'iye 'alhua, cha'aye na Israel le'ecpi saishet da ỹalauat, nache so Salomón ỹanem somayepi na no'onatacpi maye ỹataqta qapa'atta, qaq damaye nache ivitta'a nagui. 9Qalaxaye so Salomón saishet da huo'o ca Israel le'ec da ỹamaxalec na no'onatacpi da choche l-latac, nacherata da ỹauo'o nalleppi, qataq nataxala'pi, qataq na lataxala' na alleppi, qataq na lataxala'pi na lo'opi ana naigonapi maye alaataxaquipi, qataq na lo'opi na caipi. 10Qaq so nta'a Salomón nataqa'en ỹauo'o so doscientos cincuenta ỹalleppi maye ilotague' so 'onataxanaxaicpi.
11Qaq so Salomón nataqa'en nqochenaxat aso llale so faraón ỹachegoxotchiguiña so huaqta'a't nỹecpi maye lalamaxat so David, nache ỹanaigui so nma' lta'araic maye no'oxoosheguem co'ollaxa da yaqto' lma' asomaye, cha'aye 'enapeco': Añi ihua saishet da nache netaigui ñi lma' lta'araic so David maye nta'a na Israel, cha'aye nam nma'pi maye mashe netaigui co'ollaxa añi arca maye laỹe' naua lqataxaco Ñim Nataxala' ỹataqta sa qaishetapec.
12Qaq so Salomón nache ỹanot naxa Ñim Nataxala' aso lachetaqtaxanaqtepi maye qaỹavigaxatta, ỹachalec naxa aso nca'atoxonaxalate maye no'oxoosheguem co'ollaxa maye datateuga so nqasoxoc aso atamnaxaqui, 13nache 'enauaque naua na'axa'te maye huetoiguilo da ỹaneuo anamayepi, nache ipacchigui dam lamaxasoxonaxac so Moisés, maye 'eeta': ye na'a'q mataxaqui, qataq na naponaxac maye qaỹo'ot da dalaxaic ñi ca'agoxoic, qataq soua tres naponaxaco maye huaiguilo ye vi'i da qaỹo'o't, maye 'eeta', som laloxoqui da qanallec ana nauole maye qaca ana lalecte maye ỹasheeraxachigui, qataq so lỹa maye qaỹo'ot da ime da qanqat ana ala na nañiguishec, qataq so lỹa naponaxac da ivita da qanayenaiguilo naua npele'ete maye choche qaỹa'ara'a't 'epaq lcouepi.
14Qaq so Salomón nataqa'en ipagaqchiichigui dam lapaxañi co'ollaxa so lta'a David, da ỹauo'oi naua laloqo'ote da inoxoneuo da do'onataxan so ntaxaỹaxanaxanecpi, qaq so leviitapi qalaq ỹanem da ilo'ogue da no'onaxanaxac, qataq da itauanec so ntaxaỹaxanaxanecpi da ỹanem na qaiuen ye na'a'q. Qataq ỹauo'oi naua laloqo'ote da inoxoneuo da do'onataxan som ilotague'pi so lasompi, cha'aye nache lamaxasoxonaxac co'ollaxa so David, som nale Ñim Lo'onatac 'Enauacna. 15Qaq nache 'eetec da somayepi saishet da ca'ai nam lamaxasoxonaxacpi so nta'a David, dam lataxac da lo'onataxanaxac na ntaxaỹaxanaxanecpi, leviitapi, qataq na ilotague'pi aso anom laỹe'. 16Cha'aye 'enauac na ỹo'otpi so Salomón, chegoqchiguiña co'ollaq qalapaxañi so no'oxonaxala' aso atamnaxaqui, nache ivitta'a da 'enauac da ime. Qaq aso atamnaxaqui maye lalamaqte Ñim Nataxala', ỹataqta ỹaỹamaqchiguiñi co'ollaq ime.
17Qaq huaña nache so Salomón, taỹa ye Ezión Guéber qataq ye Elat, maye naña ye loigue aso auaxai, maye huaigui ye 'alhua Edom. 18Qaq so Jirán, ỹamaq co'ollaxa som lamaxashecpi, da ñiguingui aso notaxaquipi da qanayiguingui na 'etaxat, qataq lỹatec naqa'en so alleppi maye ỹaỹaten da quiguingui na 'etaxat, nache nnaicapegue' so nataxala'pi maye ltauapi so Salomón, nache ivitta'a ye Ofir, yem huaña da iỹoxosheguem so quince mil kilos na oro, nache ira'a so nta'a Salomón.