So Senaquerib inoxotaua'a ye Judá
1Qaq co'ollaq ime da ỹachaxan da lalaxayec so Ezequías, nache so Senaquerib, maye nta'a ye Asiria, inoxotaua'a ye Judá, nache coleesop so huaqta'a't nỹecpi maye qanpaxattaua'a maye ỹotta'a't naua nañalo da yaqto' deuotaxanec.
2Qaq so Ezequías co'ollaq ila'a so Senaquerib da mashe nvi' da iloquiaxan ye Jerusalén, 3nache nnate' som ltauapi qataq so lataxala'pi so alleppi, nache 'enapega da ỹapogongui aso 'etaxat laỹe'pi maye nauga so pa'auec som huaqta'a't nỹecpi, nache somayepi ỹaỹamaxareeta damaye. 4Qaq huaña nache laỹona't so qalota shiỹaxauapi, nache ỹapogongui 'enauac aso 'etaxat laỹe'pi qataq som la'auaxac maye pa'aỹañi, yaqto' da nvi' so nta'alpi ye Asiria nache qaica ca ilalec 'etaxat. 5Qaq so Ezequías ỹataqta huo'o da la'añaxac, nache no'oxoosheguem so npaqtaxanaxat, qataq nataqa'en no'oxoosheguem aso nalloxolatepi nalec naqa'en somaye, qataq ỹo'ot so npaqtaxanaxat pa'aỹauec. Qaq nataqa'en ỹaỹamaxaañi so lpaqtaxat so huaqta'a't nỹecpi maye lalamaxat so David, qataq damaxasoxoolec da qaỹo'ot aso qalota taquiaxaipi qataq aso npaqtaxanaqtepi. 6Qaq ime, nache ỹauo'o so lataxala'pi so alleppi nache laỹona't, huaña so naponqa' maye naña so naloteuga so lasom so huaqta'a't nỹecpi nache ỹa'añaqchettac, 'eeta': 7«Qana'añaxache, saishet da leetapigui qarvilli, qataq saishet da qaye'eetega na nta'a ye Asiria, qataq na qalota nalleppi maye nnaictague', cha'aye qomi' huo'o da qara'añaxac ñapagaqalec namaye. 8Namaye nteetacot da la'añaxac nam ỹalleppi, qomi' qalaxaye ñetenaqtacot Ñim Nataxala' maye Qanatamnaxala', Ñim qomi' itaua'n da seloquiaxai' namayepi.» Qaq co'ollaq qaỹa'axaỹa da la'aqtac so nta'a Ezequías, nache so shiỹaxauapi nomteguet da la'añaxac. 9Qaq co'ollaq ime de'era, nache co'ollaq so nta'a Senaquerib maye lma' ye Asiria, qataq 'enauac so nalleppi ña iloquiaxaatac ye Laquis, nache huo'oi soua ỹama'q som lataxala'pi so nalleppi da taỹa ye Jerusalén, da yaqto' da'aqtaxanem so Ezequías maye nta'a ye Judá, qataq 'enauac som shiỹaxauapi maye lma' ye Jerusalén, da na'aqtac maye, 'eeta':
10«Ñi Senaquerib, maye nta'a ye Asiria, namaq da la'aqtac 'eeta': ¿Ta'ainco' ye ỹataqta qavi'imaqaitac da qoviita'a na Jerusalén ye mashe qami' qaicoleesopa? 11Ca Ezequías da 'eetega dam Ñim Nataxala' maye Natamnaxala' nca'alaxateeguesop da ihuaqỹaxac, nache camaye choche qami' ỹatenachetta'ape qataq qami' ỹauecta'alo da qaullivi, souaxat na qarqouaqai qataq na qaraquipi. 12¿Peta'a saisheto' da nacheñi ñi Ezequías ñi nlaxaañi co'ollaxa so atamnaqa'pi, qataq aso nca'atoxonaxalatepi maye lalamaqte que'eca Atamnaxala', qataq ỹamaxalec na shiỹaxauapi ye Judá, qataq ye Jerusalén, da yo'oxonnataxan qataq da ỹaneuo ca nachetaqtaxanaxat maye ama na laita da huaña naqa'en aca 'oonole nca'atoxonaxalate? 13¿Peta'a sa qauaỹachiñi da aỹem qataq so hua'au ita'alpi dam so'otaxac co'ollaxa 'enauac so ỹotta'a't shiỹaxauapi maye hueta'a na laỹepi 'alhuapi? ¿Peta'a ishet co'ollaxa da isoueeguesop da ỹa'añaxac nam natamnaxala'pi se'eso ỹotta'a't shiỹaxauapi? 14'Enauac se'eso natamnaxala'pi se'eso ỹotta'a't shiỹaxauapi maye som hua'au ita'alpi ilaxachigui co'ollaxa. ¿Negue't ca ishet da nca'alaxateeguesop da ihuaqỹaxac? ¿Ta'ainco' da qaupicheetega da Ñim Qanatamnaxala'ai ishet da qami' nca'alaxatrec?
15Qaq ỹoqo'oye no'on da saishet da qami' ỹatenache't ñi Ezequías, saishet qome da qaua'amaqchiñi, cha'aye se'eso ỹotta'a't shiỹaxauapi, da qaica co'ollaxa ca natamnaxala' da isoueeguesop somayepi da ỹa'añaxac, qataq da la'añaxac som hua'au ita'alpi, qaq nataqa'en Ñim Qanatamnaxala'ai saishet qome da qami' nca'alaxateeguesopa da ỹa'añaxac.»
16Qaq 'era da la'aqtac, qataq huo'o na laỹepi la'aqtacpi, soua lataxala'ate so alleppi maye lamaxa'she so nta'a ye Asiria, da dataỹa'aguet Ñim Lo'onatac 'Enauacna maye Nataxala', qataq som lamaxashec Ezequías. 17Qaq nataqa'en so Senaquerib ỹauo'o co'ollaxa aso lere da isheueetac Ñim Nataxala', Ñim Natamnaxala' so Israel le'ecpi, qaq asomaye huetalec da la'aqtac da isheueetac Ñimaye, 'eeta': «Qaq 'eeta'am da 'eetec so natamnaxala'pi som shiỹaxauapi maye netalec na laỹepi 'alhuapi, da saishet co'ollaxa da isoueeguesop somayepi da ỹa'añaxac, qaq nache 'eetec nataqa'en da Ñim Natamnaxala' ñi Ezequías, da saishet qome da isoueeguesop da ỹa'añaxac nam lalamaxat nhuo' le'ecpi.»
18Qaq soua lataxala'ate so nalleppi so Senaquerib, detaqtacot som shiỹaxauapi maye netasheguema so npaqtaxanaxat, ỹataqta na'axanneque naua la'aqtaqa da detaqtacot somayepi ỹauota'aisalo naua hebreo la'aqtaqa da yaqto' iquichoqchet qataq icolanaqchet, da yaqto' ishet da loxonec so huaqta'a't nỹecpi. 19Qaq detaqtega Ñim Atamnaxala' ye Jerusalén da 'eeta'am naqa'en da detaqtega na natamnaxala'pi na laỹepi ỹotta'a't shiỹaxauapi maye netalec ana 'alhua, nam atamnaxala'pi maye maiche lo'onatac na shiỹaxauapi. 20Qaq souaxat de'era qanayeuaigui, nache so nta'a Ezequías qataq so na'aqtaxanaxanec Isaías, som llalec so Amós, natame'n iỹaxaarot na piguem, da iỹaxaaraique ca ntaunague'c. 21Nache Ñim Nataxala' namaq so lamaxashec piguem le'ec, nache nmichiguiñi naqa'en 'enauac so alleppi qataq so nataxala'pi qataq so nta'alpi maye hueta'a so lanataqa' so nta'a ye Asiria, nache se'eso nta'a ỹe'eguelaxa ye na'alhua qalaq nlaqchigui da la'agaxa, qaq co'ollaq inoxonoigui aso atamnaxaqui maye netaigui so natamnaxala', nache huaña da soua maiche llalqa ỹalaua't somaye.
22Qaq 'era da 'eetec da Ñim Nataxala' isoueeguesop so Ezequías qataq so hueta'a ye Jerusalén da la'añaxac so Senaquerib, maye nta'a ye Asiria, qataq 'enauac so laỹepi mpa'aguenaxauapi, qaq nache ỹanem da l-lagaxayec somaye qataq so lauoreuapi. 23Qaq huaña nache qalota som iroua'a ye Jerusalén aso lachetaqtaxanaqtepi da yaqto' ỹanot Ñim Nataxala', qataq som nme maye huo'o da lasheechiỹaxac da yaqto' ỹanem so Ezequías, maye nta'a ye Judá. Qaq nache chegoqchiguiña co'ollaxa da so Ezequías, nquictec da llo'oxoyec da ỹalectaigui na laỹepi ỹotta'a't shiỹaxauapi.
Da lalolaxa qataq da natannaguec so Ezequías
24Qaq se'esoua na'axa'te, nache so Ezequías ỹataqta sa no'on nache huac da ileu, huaña nache natamen iỹaxanot Ñim Nataxala', nache Ñimaye ỹasateguet nache ỹanem so la'anec. 25Qalaxaye so Ezequías, na'aictaxa co'ollaxa da ỹaconeguet som qoỹanem, qalaxaye somaye saishet da ỹan ca na'achec, nacherata da nlaxagui da ño'oxonnaxac, qaq ỹoqo'oye Ñim Nataxala' dalemataỹa somaye, qataq nataqa'en ye Judá qataq ye Jerusalén. 26Qalaxaye co'ollaq qaỹata'ague da ño'oxonnaxac so Ezequías, nache somaye nmanot Ñim Lo'onatac 'Enauacna, qaq nache 'eetec nataqa'en 'enauac som hueta'a ye Jerusalén, nache Ñim Nataxala' saishet co'ollaxa da ỹasaxalec da nnogoxonaxac somayepi co'ollaq ñaq nca'altauec so Ezequías.
Da lsallaxa so Ezequías
27Qaq so Ezequías ỹataqta huo'o co'ollaxa so lta'araic lsallaxa qataq la'amaqchec, nache ivira'a da qalota so laỹamaqtac lcat plata, oro qataq so no'on coma', coraxatpi, npaqtaxanaqtepi, qataq so nogoxoshetpi maye huo'o da lasheechiỹaxac. 28Nataqa'en no'oxoosheguem so nỹecpi da yaqto' laỹe' so ala so nañiguishec trigo, vino qataq so aceite, qataq so lma'pi so ỹotta'a't shiguiỹacpi, qataq aso laỹe'pi aso qaguetapi. 29Nataqa'en damaxasoxoolec da qano'oxoosheguem so huaqta'a't nỹecpi, qataq nataqa'en qalota so na'atetpi shiguiỹacpi nam lta'araic qataq nam qapio'olecpi, cha'aye Ñim Lo'onatac 'Enauacna ỹanem co'ollaxa somaye da qalota da lsallaxa. 30Qaq so Ezequías nacheso nataqa'en so damaxasoxoolec co'ollaxa da qaỹapogui som pa'aỹasheguem llec so 'etaxat maye chegaqasheguema so mpaxaatasheguem 'etaxat maye naña ye Guijón, nache ỹo'ot so llec so 'etaxat naỹaña na pa'aguiñi maye pa'aigue da nala' lliguisheguem yem huaqta'a't nỹecpi maye lalamaxat so David. Qaq so Ezequías ỹataqta sa na'aigue co'ollaxa 'enauac nam ỹo'otpi.
So Ezequías ỹaconeguet so namaxashecpi maye chegaqa'a ye Babilonia
31Qaq 'era da 'eetec nataqa'en co'ollaq so nataxala'pi ye Babilonia, da ỹauo'oi soua ỹama'q da yaqto' namaqtrega, qataq yaqto' ỹaỹate'n so sa qaỹauanepega maye huaña yi'iye 'alhua. Qaq Ñim Lo'onatac 'Enauacna ca'ai co'ollaxa so Ezequías, da yaqto' ỹe'eguen qataq yaqto' ỹauatton yem ỹoqta pa'auo lhuennataxac somaye.
Da l-leuaxa so Ezequías
32Qaq nam laỹepi na'aqtaguecpi so Ezequías, qataq nam no'on maye ỹo'otpi co'ollaxa, qalaq nanettalec aso lmalate so lauanaqchecpi so na'aqtaxanaxanec Isaías, som llalec so Amós, qataq aso nere maye nanettalec nam ỹo'otpi som nta'alpi ye Judá qataq ye Israel. 33Qaq co'ollaq ileu so Ezequías, nache qaỹachaigui so pa'asheguem aso nhuachiquipi so llalaqpi so David. Qaq 'enauac so shiỹaxauapi maye hueta'a ye Judá qataq ye Jerusalén, ỹataqta huo'o naq 'enec naqa'en somaye, qaq dam lo'onataxanaxac somaye, nache talec so llalec Manasés.