Da lo'onataxanaxac so Ocozías
1Qaq so shiỹaxauapi maye lma' ye Jerusalén, ỹaasheguem co'ollaxa da nta'a so Ocozías, som llalec na'asa so Jorán, cha'aye so ỹalleppi maye na'attagui so lo'ogoxonaxatpi maye nnaictague' so arabeopi co'ollaq inoxotaua'a so nanataqa', nache ỹalauat co'ollaxa 'enauac so ỹepi llalaqpi so Jorán, maye nta'a ye Judá. Qaq ỹoqo'oye so Ocozías, som llalec so Jorán, talec da lo'onataxanaxac da nta'a ye Judá. 2Qaq somaye mashe ivi' cuarenta y dos vi'iye da nachaalataxac co'ollaq ỹacoolec da lo'onataxanaxac, qaq ivi' 'oonolec vi'i da ilotague' ye Jerusalén. Qaq aso late'e somaye le'enaxat Atalía, asom chegoxoguet so Omri. 3Qaq so Ocozías, quetelec da qauem lataxac so llalaqpi so Ajab, cha'aye aso late'e somaye, ỹaata'am na qauem lqataxacpi, nache ỹauega da ỹo'ot na qauem. 4Qaq somaye ỹo'ot co'ollaxa na ỹataqta saỹaỹamaxarenpi Ñim Nataxala', 'eeta'am da 'eetec so llalaqpi so Ajab. Cha'aye co'ollaq mashe ileu so lta'a Ocozías, nache so llalaqpi so Ajab, ỹaata'am na qauem lqataxacpi da yaqto' iqataqchet somaye.
5Qaq so Ocozías, souaxat da quegue na lqataxacpi somayepi, nache huaxaiguet so Jorán, som llalec so Ajab, som nta'a ye Israel, da yaqto' delogui' so Jazael, maye nta'a ye Siria, huaña ye Ramot maye huaigui ye Galaad, qaq nache huaña co'ollaxa da so siiriopi ique'emaqchet so Jorán, 6qaq ỹoqo'oye somaye ỹe'eguelaxa co'ollaxa ye Jezrel, da yaqto' qanataren so lque'emaxa maye huaña ye Ramot da qaique'emaqchet, souaxat da deloctague' so Jazael, som nta'a ye Siria. Qaq so Jorán ye ỹataqta sa no'on, nache so Ocozías taỹa ye Jezrel da namaqtega somaye.
So Jehú ỹalauat so Ocozías
7Qaq Ñim Lo'onatac 'Enauacna, maiche lhuennataxac co'ollaxa da ileu so Ocozías, da ivita da namaqtega so Jorán. Qaq co'ollaq choche ivireuo somaye, nache so Ocozías lỹatec so Jorán da ca'ata'aguet so Jehú, som llalec so Nimsi. Qalaxaye Ñim Lo'onatac 'Enauacna, mashe lca'aguishec co'ollaxa so Jehú, da nacheso so nmatchiguiñi da ỹalauat so llalaqpi so Ajab. 8Qaq so Jehú co'ollaq ỹe'eguelaxateguet na lasouaxashetpi so llalaqpi so Ajab, nache natena'aguet so nataxala'pi ye Judá, qataq so lauo' le'ecpi so Ocozías, maye maiche lamaxashecpi somaye, nache ỹalauat. 9Ime, nache damaxasoxona so Ocozías, maye taỹa co'ollaxa ye Samaria da nqañoxooñi, qalaxaye qailalec co'ollaxa, nache qaỹauega so Jehú, huaña nache qaỹalauat. Qalaxaye co'ollaq qailareñi, nache qaỹaỹamaxatchiguiñi, souaxat da llalec so Josafat, som ỹataqta imauec da lquiyaqteỹaxac da ỹalaxaguet Ñim Nataxala'. Qaq 'era da 'eetec da ỹataqta qaica qanqa'en ca no'onañi som llalaqpi so Ocozías, da yaqto' talec da no'onataxanaxac da nta'a.
Aso Atalía qataq so Joás
10Qaq aso Atalía, asom late'e so Ocozías, co'ollaq ỹaỹaten da ileu so llalec, nache asomaye nmatchiguiñi da ỹalauat 'enauac so llalaqpi so nta'a ye Judá. 11Qalaxaye aso Yoseba, asom llale so nta'a Jorán, co'ollaq mashe qaỹalauattac so llalaqpi so nta'a Ocozías, nache iỹotauga so Joás, maye nataqa'en llalec so Ocozías, da ỹoxocheesop aso Atalía, lỹatec asom 'alo maye illepaxaatac somaye, nache ỹaaraigui so no'ochaqa', qaq ỹoqo'oye saishet da qaỹalauat so Joás. Qaq 'era da ỹo'ot aso Yoseba, asom llale so nta'a Jorán, maye lqaỹa so Ocozías, qataq asomaye lhua so ntaxaỹaxanaxanec Joyadá. 12Qaq nache seis vi'iye da nqañoxottapiguiñi netraigui aso atamnaxaqui maye lalamaqte Ñim Nataxala' co'ollaq aso Atalía, ñaq ilotague' yi'iye 'alhua.