Aso Arca maye laỹe' da aỹamaxataxac hueta'a ye lma' na filisteopi
1Qaq so filisteopi co'ollaq ime da loxona aso arca maye laỹe' da naỹamaxataxac Ñim Lo'onatac 'Enauacna, nache ỹache ỹachegotchiguiña ye Ebenezer da ira'a ye Asdod. 2Ime, nache ỹanaigui aso atamnaxaqui maye netaigui so atamnaxala' Dagón, nache ỹauaxaỹaxaate' se'eso atamnaxala'. 3Qaq so lỹa na'a'q, co'ollaq ñisheguem so lma' ye Asdod, nache ilalec so ne'enaqtac lqui'i so Dagón da huetaiya', nqapaxaatañi hueta'aguet na 'alhua, hueto'ot na laỹe aso arca maye laỹe' da naỹamaxataxac Ñim Nataxala'. Nache nauaxaỹaxaasheguem somaye, nache qaltaq ỹe'eguelaxatchiguiña som netaña co'ollaxa. 4Qalaxaye so nte'etom so lỹa na'a'q, nache qaltaq qailalec so ne'enaqtac lqui'i so Dagón da huetaiya', hueta'aguet na 'alhua hueto'ot aso laỹe' da naỹamaxataxac Ñim Nataxala'. So lqaic qataq soua lhuaxaye qalaq mashe huacaguerec, nache huetralec so nqauaxala' so lasom. Qaq nachaqsota so lasot da no'onañi da no'oitai'. 5Qaq ỹoqo'oye nache ivitta'a nagui da na ltaxaỹaxanaxanecpi so Dagón da inoxonoigui naxa añi atamnaxaqui maye naña ye Asdod, nache saishet da pelec so nqauaxala' so lasom.
6Nache Ñim Nataxala' ỹataqta sa ỹala'ac da iuaxan so lma' ye Asdod qataq som netaleguete soua lauoreu' 'aleu', qataq irolec aso na'agotaqte late'e da ique'emaqchet. 7Qaq so lma' ye Asdod co'ollaq ila'a de'era, nache somayepi 'enapeco': «Añi laỹe' da naỹamaxataxac Ñim Natamnaxala' ye Israel le'ecpi saishet qome da nache 'eetai' da qomi' netaiguilo, cha'aye Ñimaye qomi' sa ỹala'aque da qomi' iuaxaataleguete, qomi' qataq ñi Dagón, ñim qanatamnaxala'.»
8Qaq ỹoqo'oye somayepi damaxasoxona 'enauac so nataxala'pi filisteopi da laỹona't, nache dataiguet somayepi, nache inato' somayepi, 'eeta':
¿Chaq shenaqtec añim laỹe' da naỹamaxataxac Ñim Natamnaxala' ye Israel le'ecpi?
Nache somayepi 'enapeco':
Qomye qanquigaxachiỹa ye huaqta'a't nỹecpi ye Gat.
Nache so filisteopi ỹache asomaye, nache nquigaxata yemaye. 9Qalaxaye co'ollaq mashe ime da qanquigaxat, nache Ñim Nataxala' ỹo'ot da lli'iỹaxa se'eso netaigui se'eso huaqta'a't nỹecpi, souaxat da ique'emaqchetec aso nachecai late'e, natcheguemalo naqa'en na lo'oc so ỹepi, qataq so ñaqpiolec. 10Nache som filisteopi qaltaq nquigaxata ye Ecrón aso laỹe' da naỹamaxataxac Ñim Lo'onatac 'Enauacna, qalaxaye co'ollaq ivita yemaye, nache so netaña ye Ecrón ỹa'alaqtagui, 'eeta': «¡Qomi' qanda'alo' ana laỹe' da naỹamaxataxac Ñim Natamnaxala' ye Israel le'ecpi da yaqto' qomi' nmatchiyiñi da qomi' ỹalaua't!»
11Qaq cha'aye 'enauac se'eso huaqta'a't nỹecpi lagoigui da ileetapeguem da lli'iỹaxa, souaxat da sansatta nhuaxanaguec maye namaxa Ñim Lo'onatac 'Enauacna, nache damaxasoxona 'enauac so nataxala'pi filisteopi, nache 'enapego', 'eeta': «Qavi'iguelaxachiỹa qome cam chegoqchiguiña co'ollaxa añi laỹe' da naỹamaxataxac Ñim Natamnaxala' ye Israel le'ecpi, yaqto' saishet da qomi' nmatchiyiñi da qomi' ỹalaua't.»
12Qaq da la'alaxac som netaigui se'eso huaqta'a't nỹecpi ỹataqta iviro'ot na piguem, cha'aye som saishet da ileu, qalaq nlaqchigui na lo'oc ana la'agotaqte.