Iuen da saỹamaxataxañi da huo'o ca qomi' huanguilo sa ỹaỹamaxañi
1Da huo'o ca 'oonolec da qoñiita nasouaxata'ai' ca lỹa la'amqaanataxanaxaua, nache saishet da iỹaxanot ca loicnatac na lataxaguesat maye sa da'amqaanataxan da ỹaỹamaxaañi ca nasouaxashet, nachaqrata da iỹaxanoigui na laỹepi la'amqaanataxanaxauapi da ỹaỹamaxaañi camaye. 2Cha'aye que'eca pa'atec na'a'q qom qanmitna, nache 'enauac nam llalaqpi Ñim Lo'onatac 'Enauacna nachena na nmit qome na laỹepi shiỹaxauapi. Qaq da qanmichi qome na shiỹaxauapi, nache nataqa'en ishet da qanmichi nam sa 'amaqtaq lataxacpi nagui. 3¡Da qomi' ñimitaq nataqa'en qome na namaxashec piguem le'ecpi qaq ỹactec qone' da seshetaq da ñimitaq ca saq 'amaqtaq lataxac nagui de'era souaqtaigui achaalataxac! 4¿Ta'ainco' da qauroiua'a nam nmit na nasouaxashetpi maye sa da'amqaanataxan da huo'o ca huotaique da qauaỹamaxachiiñi? 5Qaq damaye shenapec, yaqto' huo'o da qara'aloqoi. 'Ena'amo' da ỹoqta sa qanaloiua'a da qanmichi qataq qauaỹamaxachiiñi cam sa ỹaỹamaxañi maye ỹo'ot ca qara'amqaanataxanaxauai. 6Qami' saishet naxa da choche ndotec da qancotaitega't, ¡nataqa'en ivira'a naxa da qauroiua'a na nmit na nasouaxashetpi maye saishet da ỹa'amaqten So Jesús da yaqto' ỹaỹamaxañi cam qancotaitapigui!
7Da qancotaitega't, nache qami' maye qami' qanauectaleguete. ¿Qaq ỹoqo'oye sa ỹaỹamaxaño' da qana'añaxacheeguet cam qami' qaỹo'oteque sa ỹaỹamaxañi? ¿Sa ỹaỹamaxaño' da qauaqaita'a da qami' qaicacheto'oto? 8Qalaxaye qami' saishet da nache qoñiitec de'era. Nachaqrata da qauo'ocheeteguec ca sa ỹaỹamaxañi ca maiche qara'amqaanataxanaxauai, qataq huo'o na decacheto'ot ñi lỹa.
9-10¿Qami' sa qauaỹaañiỹo' da ca ỹo'ot ca sa ỹaỹamaxañi, nache camaye saishet da inoxoneua'a da lo'onataxanaxac Ñim Lo'onatac 'Enauacna? Saishet qome da qami' qaỹatenache't. Cha'aye saishet qome da inoxoneua'a da lo'onataxanaxac Ñim Lo'onatac 'Enauacna nam quetaigui da lquisheguetaxac, qataq na natameetacot na ỹaqa'api maye saq 'en qataq choche ne'enaqtacpi, qataq na lauatapiguiñi' aca sa lhua, qataq na huetapeeguet ca 'eeta'am lỹa ỹale, qataq na cachaxaicpi, qataq na mataxalaicpi, qataq na taxaicpi, qataq ca na'aqtaqa lo'o', qataq na nquigaxatapeguec aca lasheue ca lmenec. 11Qaq huo'o co'ollaxa da qoñiita na 'eeta'am ne'enapi. Qalaxaye Ñim Lo'onatac 'Enauacna mashe qami' ichoxore'n qataq qami' iqui'itaxatte', qataq mashe qami' lalamaqa'ate. Qaq 'enauac de'era chegoqchigui So Qarataxala' Jesucristo qataq So Saqcha'a La'añaxac Ñimaye.
Da qarataxac iuen da ỹaỹamaxareeta Ñim Lo'onatac 'Enauacna
12Huo'o naxa da qoñiita na 'eeta' da la'aqtac: «Aỹem huesochiguiñi da so'ot ca maiche sheetapeguec.» ¡Aja', damaye ỹoqta 'eesa! Qalaxaye saishet da 'enauac na 'eetapeguec ca shiỹaxaua da ỹaỹamaxaañi. Qaq ỹoqo'oye qaica ca sashenem da maiche aỹem ỹoiqueetac. 13Nataqa'en huo'o naxa da na'aqtac, 'eeta': «Ca nallec qaỹo'ot da tangui ana qara'am, qataq ana qara'am qaỹo'ot da yaqto' ỹaconeguet ca nallec.» ¡Qaq damaye ỹoqta 'eesa! Qaq Ñim Lo'onatac 'Enauacna taỹa'a da nlaxaayiñi ne'enaua. Qalaxaye da qaro'ocỹaxac saishet da taiguet da sanaxaguet da quisheguetaxac maye sa qaishetapec. Chaqrata da so'onataxanaxa damaye, da so'onataxanaqot Ñim Nataxala', cha'aye Ñimaye maye lalamaxat da qaro'ocỹaxac. 14Qaq Ñim Lo'onatac 'Enauacna maye nca'alec naqa'en So Jesucristo co'ollaq qaỹalauat, Ñimaye nataqa'en taỹa'a da qomi' nca'alaxatre'c, do'onataxana da maiche la'añaxac.
15Qami' qauaỹaañi da ñi 'oonolec da qoñiita na'attaua'a na 'amqaanataxanaxaicpi, maye nachera da lo'ocỹaxac So Cristo. Qaq ỹoqo'oye sa ỹaỹamaxañi da huo'o ca 'oonolec ne'ena 'amqaanataxanaxaicpi maye na'attaua'a da lo'ocỹaxac So Cristo da na'attaua'a naqa'en da lo'ocỹaxac aca quisheguetaxai, 16cha'aye da hue'eguet acamaye, nache mashe 'eeta'am da 'oonolec da no'ocỹaxac. Qaq damaye nache 'ena'ape naua nanettaleguete ana la'aqtac lmalate Ñim Lo'onatac 'Enauacna 'eeta': «Caua dos ivira'a da 'eeta'am da 'oonolec.» 17Qaq ca na'attaua'a So Qarataxala', nache ivira'a da 'eeta'am da 'oonolec, cha'aye na'attaua'a de'era 'oonolec no'ocỹaxac maye saqcha'a.
18Ỹoqo'oye saishet da qoquiitaigui da qarquisheguetaxaqui. Na laỹepi sa ỹaỹamaxañi maye ishet da ỹo'ot ca shiỹaxaua, namayepi saishet da na'aqchet da lo'ocỹaxac. Qalaxaye cam quetaigui da lquisheguetaxac, camaye maiche na'aqchet da lalamaxat lo'ocỹaxac. 19Da qaro'ocỹaxaqui 'eeta'am aca no'onaxanaxaqui, qaq aca'aca no'onaxanaxaqui netaigui So Saqcha'a Na'añaxac Qui'itta maye qami' ỹanema Ñim Lo'onatac 'Enauacna. Qaq da qaro'ocỹaxaqui saishet da maiche qaralamaxache. 20Cha'aye Ñim Lo'onatac 'Enauacna co'ollaq qami' nca'alaxatre'c, nache qami' desheenaxanalo, qaq aso lasheue co'ollaxa da qami' desheenaxanalo ỹataqta late'erai. Ỹoqo'oye iuen da ỹataqta qaumachiỹo'ot Ñim Lo'onatac 'Enauacna da qaro'ocỹaxaqui da qavio'oxoyiñi, yaqto' Ñimaye huo'o da ntonaxac.