So chegoxoguetpi so Rubén
1Som chegoxoguetpi so Rubén, maye llalec ỹe so Israel. So Rubén nacheso so la'auaxanec llalec so Israel, qalaxaye iqataqchet dam 'enec ca na'auaxanec ñalec souaxat da huetapeeguet co'ollaxa aso lhua lỹa so lta'a somaye, qaq de'era 'enec cam na'auaxanec ñalec, qaỹasaxaleguete soua llalqa so José, som llalec lỹa so Israel. 2Qaq na'aictaxa da so Judá ivira'a co'ollaxa da ỹataqta 'añaxaic, napacaleguete soua lqaỹa't, qataq ivira'a da lataxala' somaye soua lqaỹa't, qalaxaye dam 'enec cam ñalec ỹe mashe talec so José. 3Qaq soua llalqa so Rubén, som llalec ỹe so Israel, le'enaxa't Hanoc, Falú, Jesrón qataq so Carmi.
4Qaq som chegoxoguetpi so Joel, le'enaxat Semaías, Gog, Simea, 5Micaía, Reaía, Baal, 6qataq so Berá, som lataxala' so rubeniitapi maye loxonec co'ollaxa, qataq ỹauec so Tiglat Piléser, maye nta'a ye Asiria.
7Qaq soua lqaỹa't so Berá maye nanettalec aso le'enaxat lmalate so lauo' le'ecpi, Jaiel, som nataxala', Zacarías, 8qataq so Bela, som llalec so Azaz, qataq laual so Semá, som llalec so Joel. Qaq so Bela netalec co'ollaxa ye Aroer, qaq so na'alhua somaye nache ivira'a ye Nebo qataq ye Baal Megón. 9Qataq hueta'a yem pa'aỹa'ague da nala' lliguisheguem nache ivitta'a so loigue ye toolec 'alhua maye chegoqchiguiña so tala Éufrates, cha'aye som na'atetpi ỹataqta nquictauec da qalota co'ollaq hueta'a ye Galaad. 10Qaq co'ollaq ña nta'a so Saúl, nache somayepi nalattague' so agareenopi nache loxonecpi somayepi, huaña nache nalec ye 'alhua Galaad maye pa'aigue da nala' lliguisheguem.
Som chegoxoguetpi so Gad
11Qaq so llalaqpi so Gad nalec co'ollaxa so datatta ye hueta'a so rubeniitapi, maye huaigui ye 'alhua Basán, nache ivitta'a so huaqta'a't nỹecpi ye Salca. 12Qaq so Joel nacheso som nataxala' ye Basán, qaq soua lỹa't somaye, Safán, Janay qataq so Safat. 13Qaq som lauo' lashe' maye chegoxoguet som lta'alpi somaye le'enaxa't Micael, Mesulán, Sebá, Joray, Jacán, Zía, qataq so Éber, qaq da ima'a't nache ivi' siete. 14Qaq nam le'enaxatpi som chegoxoguetpi somayepi: Abijail, Hurí, Yaroa, Galaad, Micael, Jesisay, Yadó, Buz. 15Qataq so Ahí, som llalec so Abdiel maye laual so Guní, qaq somaye nacheso som lataxala' som maiche lauo' le'ecpi. 16Qaq 'enauac somayepi, da netalec co'ollaxa ye Galaad, ye Basán qataq na lauoreuapi nma'piolec maye huaigui yemaye, qataq nam no'onaxapi maye lquia'aqa' na na'atetpi maye huaigui ye Sarón, nache ivitta'a na loga'tpi yemaye. 17Qaq 'enauac somayepi, qanaloqten da qoỹereua'a aso le'enaxat lmalate som chegoxoguetpi, huetoigui da lo'onataxanaxac so Yotán, maye nta'a ye Judá, qataq da lo'onataxanaxac so Jeroboán, maye nta'a ye Israel.
Da na'aqtaguec som chegoxoguetpi so Rubén, Gad qataq so Manasés
18Qaq som chegoxoguetpi so Rubén, Gad, qataq som laỹe so maiche nalamaxat nhuo' le'ecpi maye chegoxoguetpi so Manasés, som 'añaxaic ỹalleppi maye ỹachetac aso lpaqtaxanaqtepi, lainecpi qataq so lchecnecpi, qataq ỹataqta ỹaỹaten da l-loquiaxac, somayepi ivi' cuarenta y cuatro mil setecientos sesenta ỹalleppi, maye lhuotta da ishet da nalat. 19Qaq somayepi nacheso so nalaate' so agareenopi, qataq so Jetur, Nefís qataq so Nodab, 20qalaxaye Ñim Lo'onatac 'Enauacna, itauan somayepi, nache loxonec so agareenopi qataq so ltauapi, cha'aye co'ollaq huaigui so alaataxac, nache iỹaxanot Ñim Lo'onatac 'Enauacna da yaqto' itauan somayepi, nache Ñimaye itauan, cha'aye somayepi ỹoqta pi'iỹa'a Ñimaye. 21Huaña nache ỹacona so na'atetpi som npa'aguenaxauapi, maye ivi' cincuenta mil aso cameellopi, doscientos cincuenta mil aso qaguetapi, qataq so dos mil 'ashenapi, qataq cien mil so loxonec shiỹaxauapi. 22Qaq ỹataqta qalota so ileu npa'aguenaxauapi, cha'aye Ñim Lo'onatac 'Enauacna, hueta'aguet somayepi. Qaq somayepi nache nalec se'eso 'alhua, choche ivitta'a co'ollaq noxonecpi qataq qaỹauega so lỹa 'alhua.
Som laỹe so maiche nalamaxat nhuo' le'ecpi maye chegoxoguetpi so Manasés
23Qaq som llalaqpi som laỹe so maiche nalamaxat nhuo' le'ecpi maye chegoxoguetpi so Manasés, somayepi ỹataqta qalota co'ollaxa, qaq somayepi nache nalec ye 'alhua maye chegoqchiguiña ye Basán, nache ivitta'a ye Baal Hermón, Seír, qataq añi qasoxonaxa Hermón. 24Qaq soua lataxala'ate so lauo' le'ecpi somayepi le'enaxa't: Efer, Isí, Eliel, Azriel, Jeremías, Hodavías qataq so Yadiel, qaq soomaye ỹataqta 'añaxaiqa, 'amaqtaqaiqa qataq nachesoua soua lataxala'ate som maiche lauo' le'ecpi. 25Qalaxaye soomaye dataỹa'agueta Ñim Natamnaxala' so hua'au lta'alpi, cha'aye nquisheshigui da la'amqaanataxanaxac souaxat da natameetacot nam natamnaxala'pi som nhuo' le'ecpi maye netaña yi'iye 'alhua, maye Ñim Nataxala' ỹo'orauec co'ollaxa ỹauaachigui naqa'en somayepi. 26Ỹoqo'oye Ñim Natamnaxala' na Israel le'ecpi, ỹayena'a da lquiyaqteỹaxac so Pul, som Tiglat Piléser maye nta'a ye Asiria, da yaqto' loxonec qataq ỹauec so rubeniitapi, gadiitapi qataq som laỹe so maiche nalamaxat nhuo' le'ecpi maye chegoxoguetpi so Manasés, nache ỹauega ye Jalaj, Jabor, Hara, qataq so tala ye Gozán, yem netaña choche ivitta'a nagui.