Tito 1

₁Aỹim Pablo, aỹim la'ac ñi qota'a chaqai aỹim lelaatec so Jesucristo quiyim sotauan da lpi'ỹaxac na lca'acseripi ñi qota'a, qaiyi ỹaatqajam ỹa'deenta na'maxare dá'maq ỹaatqajam leloxoỹaxac dá'maq llic na'qaatec qomi' seuaqlec, ₂chaqai qai'neeta ỹa'deenta da quitaxac queda chaalataxac sqaica lqodoc. Dá'maq ỹachaxantac na' saqa'leca na 'laua ñí'maq qota'a, ma' ñí se na'majan. ₃Chaqai nagui ỹovita yi laloqo' quiyim qara'deenaxanaxanegue da leloxoỹaxac chicqochigui nqai'en da la'qaatec ñi qarca'laxaqui qota'olec, ca' pataxalec aỹim quiyim sa'xat da la'qaatec. ₄Qami' Tito, shinta'gue quiyim 'ec qami' ỹaalec, ma' ỹim chicqo'ot quiyim 'ue da rpi'ỹaxaqui' dá'maq hueeto'oto qomi'. Selata qami' ana ỹerecse, ma' sahotaque quiyim coñichiguit ca qouagaxa, chaqai da ne'xorenataxanaxa, chaqai da na'maxa chicqo'ot ñi qota'olec chaqai so qara'gaxala' Jesucristo só'maq qarca'laxaqui.

₅Na' ño'ueenaqta'ñi qami' ada delec leenaxat Creta, ma' sahotaque quiyim 'maxachiriñi ná'maq saqa' ỹa'maxañi, chaqai quiyim vite ná'maq la'gaxala' ná'maq mashic icoñiguit da na'qaatec quená'maq na'aateripi na'ñi. Ca' 'eda dá'maq shinac na'le: ₆Ca la'gaxala' ná'maq mashic icoñiguit da na'qaatec se ỹa'maxañi quiyim 'ue ca se no'uen na'qaataxac, chaqai 'oono'lli' aca loua nqai'en, chaqai icoñiguit da na'qaatec cá'ogue ca llaalqaipi qai'neeta, qaiyi qaica ca taalec se no'uen, sauaxat da no'ueenataxac chaqai quiyim se na'xaỹaxan. ₇Ma' cá'maq qaipataxalec quiyim idaanlec ná'maq mashic icoñiguit da na'qaatec, ca idaanlec ná'ogue ná'maq lo'ueenataxanaxaquipi ñi qota'a. Vichiguiño' ỹouen quiyim ỹa'maxate'tegue da nachaalataxac. Se ỹa'maxañi quiyim que'guenataxanaxai, chaqai sqai nocqaic, chaqai se ne'taaxai, chaqai se idaante'e quiyim retaxaỹa'pegue' ca liỹa, chaqai sqai queetalec quiyim imitete'e aca lauegue. ₈Ta'ta'a quiyim quelolqachaqaic quiyim idaañiguit ca nouoq, chaqai nqo'ta quiyim ỹo'uet cá'maq ỹa'maqachiguiñi, na'maxateta, 'maxaraic da no'ueenataxac, co'teeta, ra'ijlec da nachaalataxac. ₉Chaqai ỹaatqajam na'ñaxate'tegue dá'maq ỹaatqajam leloxoỹaxac da na'qaatec dá'maq mashic qaỹapaxaguinegue, qaiyi ishit quiyim ỹa'ñaxat ca liỹa, ỹahote'e dá'maq no'uen napaxaguinataxanaxac, ca' ishit taauec nqai'en ca loqollictaxanaxac na qollictaxanaxairipi.

₁₀Ma' 'xoic na qollictaxanaxairipi quena judioipi, ma' se nachiñiñi naua la'qaatqa, chaqai ỹayintac na qom. ₁₁Ca na'maxare ỹouentaque quiyim qaỹapoguilo naua laapi', ma' ỹaatqajam se neuojonta' nqai'en na neuo' laseripi, ma' rapaxaguinataxanta'pegue dá'maq se leloxoỹaxac, ma' chi imitete'e aca lauegue.

₁₂'Uo' so ỹale 'deenaxanqachaqaic na'ñi yi Creta, so'maxare ỹa'xat ná'maq chi lauo' laseripi, 'neetasa' da la'qaatec: “Ná'maq Creta laseripi ỹaatqajam 'maatqaiquipi, chaqai yiloxoiquipi 'ec na iseripi, quemaraxauaiquipi, chaqai hualaiquipi.” ₁₃Ca' ỹaatqajam llic dá'maq ỹa'xat. Vichiguiño' nagui ỹaatqajam viraqchira'a taqaira'a, qaiyi nachinñi da lpi'ỹaxac, ₁₄chaqai qaiyi se na'xaỹaxana na chi na'qaataxanaxac lo'ueenatec na judioipi, chaqai na lelaataxanaxac ná'maq mashic ca'e dá'maq ỹaatqajam lliqueta leloxoỹaxac.

₁₅Qam quená'maq co'teeta yi la'deenataxanaxac, ná'ogue nanchaqaina co'teeta. Qam quená'maq sqai huelec chaqai napio'o yi la'deenataxanaxac, ca 'ec qaica cá'maq co'teeta, ma' na'maxare vire'ta yi la'deenataxanaxac napio'o. ₁₆Na'maxare 'naac ỹaatqajam ỹa'den ñi qota'a, qam dá'maq lo'ueenataxanaxac re'qoota quiyim se nachiñiguit dá'maq 'neetari'. Ỹaatqajam se qaishitaqchiguit chaqai se na'xaỹaxan, chaqai sqa taiguit cá'maq no'ueenataxanaxac ỹa'maqachiguiñi.