Saua dos ise' leta'al
1Ime, ca' ñachajñi seueto'ot na lqodoc aso huaaxai. Ca seuañi'chiguit so isecỹac lodegaxat, chicqochiguiñigui aso huaaxai. Qam so'maxare siete saua lqahigo', chaqai diez aso lasote. Cañi 'óna lasote ỹantagui añi nashi nado'o, chaqai quiñi 'óna lqahic 'ue so neenaxat hueetalec ỹaatqajam npa'guente'e' ñi qota'a. 2Sojo isecỹac seuane'ta na'le 'ec na regat. Qam naua lapiaate' 'ec ana layoraxai late'e, chaqai na lap 'ec na sauaxaic leta'a lap. Ca' so isecỹac 'ec naanoc ỹaanem da lquesaxanaxa chaqai yi nqa'xanqa' quiyim nashi, chaqai ỹaanem da chalego lecaic lelaataxanaxac. 3Chaqai quena lqahic só'maq isecỹac 'ec 'ue so lcoñiraxa ralauataxan. Qam imeueco' na'le so lcoñiraxa, ca' ná'ogue na qomyipi quena 'laua ỹaatqajam 'ue da le'laxa, ca' quegue so isecỹac lodegaxat. 4Ca' qaimaqachin so isecỹac 'ec naanoc, ma' ỹaanem quiyim relaataxan so isecỹac lodegaxat. Chaqai qaimaqachin qai'neeta so isecỹac, qohinac:
—¡Ỹaatqajam qaica nqai 'nejem ñijo isecỹac! chaqai ¿nega'ỹo' ca ishit relogui'e' ñi'maxare?
5Chaqai qai'neeta qaỹasene'tem quiyim se no'uen ca ỹa'xat quenaua na'qaatqa quiyim npa'guenta'to ñi qota'a, chaqai quiyim relaataxantac quecaua cuarenta y dos shiriguiri. 6Ca' chaqaida 'ne'tegue quiyim npa'guente'e' ñi qota'a; se no'uen na ỹa'xat queda leenaxat ñi'maxare, chaqai ñi lauo', chaqai ná'maq neeto'ot na piguim. 7Chaqai qai'neeta qoỹaanem so isecỹac quiyim nalauate'e' ná'maq lalamaxareteripi ñi qota'a, vire'ta quiyim loxonqaipi; chaqai qoỹaanem quiyim ila', ỹoiquentac ná'ogue na qomyipi ỹoreta'oguit na la'qaatec. 8Ca' sojo isecỹac ỹaatqajam qaimaqachin quená'ogue ná'maq hueetalec ana 'laua, quená'maq se qoỹeretañi ca leenaxat na' ñaqai chita'gue qaỹo'uet na 'laua, cacá'maq lere nca'laxalate hueeto'ot so 'ec qagreta llaalec shi'gue qaỹalauat.
9Ca cá'maq ỹa'den ca na'xaỹaxanaxac, ca 'maxaraic quiyim na'xaỹaxanchiguiñi. 10Ná'maq coñi' ca liỹa, ca na'maxare qai'neeta qaicoñi'. Chaqai ná'maq ralauataxana ca lecat, na'maxare qai'neeta qaỹalauat qaỹodoota'a ca lecat. Ca' vichiguiño' ná'maq lalamaxareteripi ñi qota'a ỹouen ca leualaxavic chaqai ca lpi'ỹaxac.
11Ca na' ime, ca' seuane'ta so liỹa isecỹac lodegaxat chicqotougui na 'laua, dos saua lasote 'nejem na qagreta llaalec. Qam da lavillaxac quena' retaqa 'ec ca isecỹac 'ec naanoc. 12Chaqai hueeto'ot da lelaataxanaxac só'maq 'auaxaic isecỹac, ca ỹa'ajantac nqai'en so'maxare. Ca' quiyi, ca na 'laua chaqai ná'ogue ná'maq hueetalec ana'maxare imaqachintac só'maq 'auaxaic isecỹac, só'maq qaileuapeguem so lcoñiraxa, qam imeuec. 13Qai'neeta ỹo'ueete' naua chalego lecaigue' netanqa, vire'ta quiyim chicqo'ot nqai'en na piguim ca norec, ca' taalec ana 'laua. Iuanchigui nqai'en ná'ogue na qomyipi. 14Ca' chicqochigui na netanqaipi ỹo'uet da ne'laxa, ca' qaỹasene'tem quiyim ỹo'uet iuanchigui nqohin só'maq 'auaxaic isecỹac, ca' rayinaxana quená'ogue ná'maq hueetalec ana 'laua. Ca relaataxanlec quiyim qaỹo'uet so nadenqatec lqui'i so isecỹac, só'maq 'uo' na'le so lcoñiraxa lecat lliguiñi, qam qaiyiita nca'leuec. 15Ca só'maq liỹa isecỹac qoỹaanem da lquesaxanaxa quiyim ỹa'ue da lca'laxa só'maq nadenqatec 'auaxaic isecỹac, qaiyi retaqa sojo nadenqatec, ca ỹo'uet quiyim qaỹalauat ná'ogue ná'maq se imaqachin so'maxare. 16Qam sqaidaata dajo. Ma' so'maxare ramaxasoxonlec qai'neeta ná'ogue na ñaaqaipioqui' chaqai ná'maq mashic leta'allipi, nesallaxanqaipi chaqai na 'xoraiquipi, chaqai mese nelaatqaipi chaqai na nelaatqaipi, quiyim qaỹo'uet ca netanec queda lqai'laxat loic, loqo'm quena latap. 17Chaqai sqaica ca ishit 'ue ca rishiujnaxana chaqai ca imen, no'm sqaica ca netanec, loqo'm ca leenaxat so isecỹac lodegaxat, loqo'm ỹovi' só'maq ỹorete' cá'maq leenaxat.
18Dajo ỹouentaque ca na'deenaxanaxa. Cá'maq 'ue ca ỹa'den, ca' retan ỹote' cá'maq ỹovi' só'maq isecỹac. Ma' da'maxare taỹaugui ỹote' ma'le ca qom leenaxat. Ca cá'maq ỹorete' cá'maq ỹovi' dajo neenaxat ỹovi' seiscientos sesenta y seis.
