Nehemías 8

₁Ca' sá'ogue so qomyipi lapoỹata' quiyi napooqo' quiyi naloote'oga ñi huaxaỹaq nasom, ca' qohinapega so napaxaguinataxanaq Esdras quiyim nodouec aso lere hueetalec na naqataxaquipi chicqo'ot so Moisés, só'maq ñi qara'gaxala' ỹaanem na'le so llaalqaipi so Israel. ₂Queso 'auaxaic na'xa'a quesaua siete shiriguiri, ca' so netaxaỹaxanqajnec quena' qaretaxaỹa'pegue' ñi qota'olec, leenaxat Esdras, ca so'maxare nodouec aso lere hueetalec so naqataxaquipi quiyi hueete'e lapoota'ta' so ỹalliripi, 'aallipi, chaqai so llaalqaipi quená'maq mashic ra'deenataxan. ₃Ca' retaqalec queso nete'eta, chi ỹovireta'a so na'xa'a lavinñi, reloqotaho nqai'en sá'ogue, quiyi naloote'oga ñi huaxaỹaq nasom.

Sá'ogue so qomyipi ỹaatqajam na'xaỹaxanchiguiñi na' qaretaqalec aso lere hueetalec so naqataxaquipi. ₄Ca' so napaxaguinataxanaq Esdras nachaatetañi co'ueetalec saua qo'pa' qaỹauaaque nco'ỹaxala'. Chaqai so Matatías qai'neeta nachaatetañi, hueeta'gue da loic, chaqai so Sema, Anías, Urías, Hilcías chaqai so Maasías. Ca' queda nemaq hueeta'gue so Pedaías, chaqai so Misael, Malquías, Hasum, Hasbadana, Zacarías chaqai so Mesulam. ₅Ca co'na'le, ca' so Esdras ỹauachigui aso lere, iuanchigui nqai'en sá'ogue so qomyipi, ma' sá'ogue so qomyipi ra'iito'ot so'maxare. Ca na' qaỹauachigui aso lere, ca sá'ogue so qomyipi nachajñi. ₆Ca' so Esdras imaqachin ñi qara'gaxala', ñí'maq qota'olec qaican qalanac. Ca sá'ogue so qomyipi nanojshiguim na lqai'laxat, ca 'naac: Ajá'a, chaqaida 'neeta.

Ime, ca' ỹa'chi'iñi naua le'cootal, ỹoviraqta'guit na latap na 'laua. Ca' imaqachin ñi qara'gaxala'.

₇Ca' so chigoxougui so Leví: Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán chaqai so Pelaía, saua'maxare ichoxotesac na naqataxaquipi queso qomyipi, ca' so qomyipi se redaỹari' quená'maq hueete'e. ₈Saua'maxare ỹaatqajam nelamaxarene' na' retaqarelec aso lere hueesalec naua laqataxaco ñi qota'olec, chaqai qanaqalgoxoshiguim dá'maq reloqo'tegue dá'maq hueetalec, qaiyi sá'ogue só'maq qomyipi ỹa'yiinchigui dá'maq reloqo'tegue dá'maq qaretaqateguelec caso lere. ₉Ca ma' sá'ogue so qomyipi noỹentagui na' ỹaatqajam ỹa'yiinchigui dá'maq reloqo'tegue so naqataxaquipi, vire'ta na' so nashi Nehemías, chaqai só'maq napaxaguinataxanaq chaqai netaxaỹaxanqajnec Esdras, chaqai só'maq notaanaxanyipi chigoxougui so Leví, só'maq ichoxotetapeguem so qomyipi da leloxoỹaxac da naqataxaquipi, saua'maxare 'nerapega sá'ogue so qomyipi quiyim se rachicota chaqai se noỹentagui, ma' sojo na'xa'a lalamaxaret ñi qara'gaxala' ñí'maq qota'olec queso qomyipi. ₁₀Chaqai qai'neeta 'naac so Esdras:

—Mohi, a'guii cá'maq no'uen na'ic, chaqai ni'chiigui cá'maq lataxa chaqai nouañite'e' cá'maq qaica ca loq ỹa'maxatetañi, ma' najo na'xa'a lalamaxaret ñi qara'gaxala'. Totaxan chigoita, ma' se'guenqot da la'maxa lauel ñi qara'gaxala'.

₁₁Chaqai so notaanaxanyipi chigoxougui so Leví cochaqatac so qomyipi, 'neetapega quiyim nca'lliñi se noỹen, ma' sojo na'xa'a lalamaxaret nqohin ñi qara'gaxala'. ₁₂Ca co'na'le, ca sá'ogue so qomyipi queho, que'e chaqai ne'et, chaqai ỹa'ue na nouanaxaua queso loq. Ca chalego lecaic so nemaqachic queso na'xa'a, ma' so qomyipi ỹa'yiinchigui dá'maq qaỹapaxaguinegue.

₁₃Ca' queso liỹa na'xa'a, ca sá'ogue so la'gaxala' neuo' laseripi chaqai so netaxaỹaxanqajanqaipi chaqai so lotauaripi, lapooguit so napaxaguinataxanaq Esdras, quiyim ỹaatqajam qanapaxaguina cá'maq leloxoỹaxac na naqataxaquipi. ₁₄Ca' qaiuanejlec quiyim qoỹeretañi caso lere quiyim ñi qara'gaxala' ỹileno' na'le so Moisés quiyim quesojo nemaqachic quena' ỹovire'ogalo saua siete shiriguiri quiyi ñaaxa, ca' na llaalqaipi so Israel qohinapega quiyim ỹo'uet ca lauo'oqui' na'daañi, ca' naugui. ₁₅Ca co'na'le, ca ná'ogue na na'aateripi chaqai yi Jerusalén qaỹa'ue da la'xaỹaxac na qomyipi quiyim ta'oga na 'oochi, idaanaque ana qo'paq olivo lasote, chaqai ana chic lasote, chaavic laue loqo'm canchaqaica liỹa qo'paq lasote 'oochaxarai, ca ỹo'uet ca lauo' na'daañi. Ca' ipaquichigui nqai'en dá'maq hueetalec aso lere naqataxac lomalate. ₁₆Ca' so qomyipi eec, idaanaque ana qo'paq lasote, qaiyi ỹo'uet cá'maq chi lauo' na'daañi. Ca' ỹo'ueete' naua lauooto', ca 'ue na pa'xanashiguim quena lauo' lelaq, ca' 'ue na ỹanalec na nasoxoc, chaqai 'ue na ỹanalec yi nasoxoc añi no'ueenaxanaxaqui quiñi qota'olec, chaqai yi napooqo' quiñi huaxaỹaq nasom, chaqai so naloote'oga ñi Efraín nasom. ₁₇Ca sá'ogue so qomyipi, quesó'maq chita'gue novi' rapil queda ncoñiitqa', ỹo'uet na lauo' na'daañi. Ca' naugui, ma' shi'gue na' ñaqa 'ue so Josué só'maq llaalec so Nun, chi ỹovireta'a sojo na'xa'a, se ỹauanapega qaỹo'uet dajo. Ca' ỹaatqajam 'xoico' na'le so toonaxac. ₁₈Ca' qaỹo'uet so nemaqachic quiyim qoyiuelec ñi qara'gaxala' quesaua siete na'xata'. Ca' so Esdras saua'que sauajo na'xata' retaqateguelec aso laqataxaco lomalate ñi qota'olec. Ca' queso liỹa na'xa'a, ca' qaỹo'uet so nemaqachic lodegaxat, ca qaipacqajanchigui dá'maq na'qaatec qoỹeretañi.