Dá'maq lqalaic dá'maq qoyiuetaugui
1'Uo' so na'xa'a ỹaatqajam ỹoviraqta'a so qomyipi chaqai so louaaripi quesó'maq chi lauo' laseripi judioipi. 2Ma' 'ue na 'naac 'xoic na llaalqaipi chaqai na llaallipi chaqai ỹouentaque ca trigo, qaiyi se ỹalauat na lqopaaxa. 3Chaqai 'uo' na 'naac quiyim sauaxat da louenaxanaxa quena loq, ca' illaaho na na'laua, chaqai aca lanecse 'uva, chaqai naua la'aate'. 4Chaqai 'uo' na 'naac quiyim 'ue aca la'uale nam quiyim ishiueten aca nishiuetenqate so nashi, ca' illaaho ca na'laua chaqai ca lanecsec 'uva loma'. Chaqai qai'neeta 'naac:
5—Qam na'maxare chi qouo' laseripi, cá'ogue cá'maq sachigoxosoxougui. Na qochaalqaipi chaqai 'nejem ná'maq llaalqaipi na'maxare, qam qaiyiita saanaxaho na qochaalqaipi chaqai na qochaallipi quiyim na'aqaipi quena'maxare. Qam mashic 'ue ana quena qochaallipi mashic na'a, ca' qaica quet cá'maq shinqata'gue quiyim se ipaguigui nqaishinaq, ma' na qana'lauari chaqai qodanaxanqate' 'uva lomaate' ỹoqa'a ná'maq looỹac.
6Ca na' sa'xaỹa dá'maq 'neetari' chaqai nauá'maq la'qaatqa, ca' ỹaatqajam so'o. 7Ca na' ime quiyim sa'deenataxantac quedajo, ca' shinac queso nemaqajnatqaipi chaqai queso nashillipi sauaxat quiyim se ỹala'gue añí'maq ishiuetentac nqai'en só'maq chi lauo' laseripi. Ca' quiyi, ca soỹaxanougui sá'ogue so qomyipi, ca so'uet so lapoxoc quiyim qaretaxaỹapigui dá'maq qohintari'. 8Ca na'le, ca' shintapega so qomyipi: Cá'maq taachi'ñi cá'maq seshitaq quiyim seshitaq yapilaxataxauec na qouo' laseripi judioipi ná'maq qaimeenougui na'le na ỹoqa'a qomyipi. Ca' ¿qamiri lotqai liỹa miiñii, qaiyi qomi' lotqai liỹa ñaqataxauec?
Ca sá'ogue i'maqajlem, tot ỹa'den ca ỹa'xat. 9Ca' lotqai shinac: Dá'maq 'viichitac ỹaatqajam se ỹa'maxañi. Ca' qamiri ỹouen quiyim ỹaatqajam ro'chiỹa ñi qota'olec, qaiyi tot qare'neetac na qomyipi sqai judioipi ná'maq qarpa'guentac. 10Chaqai na ỹaalqaipi, chaqai na ỹotauaripi, chaqai aỹim sahoqe ana la'uale qodam na'le chaqai na trigo. Ca ¡'maxaraic quiyim le'en salataq ana la'uale na qouo' laseripi! 11Chaqai ñi'xoresentouguilo qamiri quiyim chaqa'ma' nagui qaỹopilaxatem na na'laua, lanaxanqa' 'uva loma', oliva loma', chaqai naua lauooto', chaqai qaỹapalaxat ana la'uale caqamiri, caná'maq nam, loqo'm na trigo, lataxa, loqo'm quena aceite. 12Ca' so qomyipi 'naaco': Qomi' cá'ogue sopilaxataq, chaqai qaica ca so'laxanqa'pegue'. So'ueetaq dá'ogue dá'maq 'ñirac coqomi'.
Ca na'le, ca soỹaxane'oga so netaxaỹaxanqajanqaipi quena' qaretaxaỹa'pegue' ñi qota'olec quiyim iuanchigui nqai'en na'maxare da la'qaatec so qomyipi quiyim ỹaatqajam ipaquichigui nqai'en da la'qaatec ỹaanec. 13Ca' ỹim sochigoxoi' saua ỹoho, ca' shinac: 'Eda 'ne'tegue ma'le ñi qota'olec quiyim ỹochigoxouec queca la'a' chaqai quená'maq lalamaxareteripi cá'ogue cá'maq se ipacqajñigui da la'qaatec mashic ỹaanec, chaqaida qohine'tegue quiyim qarouootaxana'gue ná'ogue ná'maq hueeto'ot nagui. Ca sá'ogue so qomyipi 'naaco': Ajá'a, chaqaida 'neeta. Ca' imaqachin ñi qara'gaxala'.
Da le'naxanaxaric so Nehemías
So qomyipi ỹaatqajam ipacqajanchigui da la'qaatec. 14Ca' ỹovirerauec saua doce ñaxari, chicqochi'ñi na' ỹovi' veinte ñaxari quiyim nashi so Artajerjes na' yayano quiyim ỹim lashi ná'maq neeta'ñi yi 'laua Judá, ca' chi ỹovireta'a quiyim ỹovi' treinta y dos ñaxari quiyim nashi so'maxare, ca' ỹim chaqai na ỹotauaripi se ỹauanapega quiyim so'laxanaxague añi nishiuete ca nashi. 15Qam só'maq 'auaxaic nashillipi caỹim ỹaatqajam 'xoic añi qo'oc, ma' quenaua'que naua na'xata' ro'laxana'pegue' ana cuarenta namirolli' chicqaugui ana plata ỹauaaque loq laseue' chaqai na ne'taxat lataxa. Chaqai na lelaatqaipi ỹa'llaxat na qomyipi. Qam ỹim sqai shi'ntegue dajo, ma' yo'cha'a ñi qota'olec. 16Ta'ta'a quiyim ỹaatqajam sepacqajanchigui da ỹo'ueenataxanaxac quiyim ño'xonshiguim so lapooque' yi na'a' lodegaxat, chaqai se sa'ue ca ña'laua, ca' na ỹotauaripi ỹaatqajam ro'ueenataxan qai'neeta. 17Chaqai yi iqui'ỹaxala' quena' sque'e ỹovi' na ciento cincuenta nqa'xantañi quena judioipi chaqai na lelaatqaipi so nashi, chaqai se qanaloqochin ná'maq qana'piichaq chicqa'ogalo naua 'lauari sqo ỹoxe'ogalo. 18Chaqai yí'maq qaỹa'ic quiyi na'xa'a chicqaỹot ỹovi' 'óna ñii'lola, seis qagretaipi ỹaatqajam 'uegaxasaxa, chaqai na ỹo. Chaqai quena' ỹovirerec yaua diez na'xata', ca' 'xoic na lataxa. Ca' dá'ogue quedajo se ỹauanapega quiyim so'laxana'pegue', 'eno'm ỹim nashi, ma' mashic paguelec da lesallaxa da hueetalec na qomyipi. 19¡O'lliinchira'a aỹim, vite ca ỹa'maxa, qami' qota'olec, quedá'ogue dá'maq so'uet quena qomyipi!
