Marcos 8

₁Ca' quesaua na'xata' 'xoico' so qomyipi lapootapegueu'a so Jesús, ca ỹaatqajam qaica cá'maq ỹa'ic so qomyipi. Ca' so Jesús roỹaxanouguilo' saua lapaxaguinatqa, ca 'naapegalo':

₂—Ỹaatqajam 'ue da i'xorenataxanaxa quenajo qomyipi, ma' mashic tres na'xata' hueete'ena, qam ỹaatqajam qaica ca ỹa'ic. ₃Chaqai no'm shinapega na'maxare quiyim pilalo naua la'aate' quiyim sqaica ca ỹa'ic, ca' 'ue ca ileueta ma'le quena nayic, ma' 'ue na qoỹoqo'tegue na chicqa'gue.

₄Ca' saua lapaxaguinatqa 'neraco':

—Qam ¿negue' quet cá'maq qohinta'gue quiyim qaiqui'ỹaxan, ma' ná'maq seuqate'e qaica ca qom naalec na'maxare?

₅Ca' so Jesús inate'o' saua'maxare:

—¿Ỹote' caua paañi' ñaqa 'vii caqamiri?

Ca saua'maxare 'neraco':

—Sietolqai'.

₆Ca' so Jesús 'naapego' quiyim nqa'xanñi quena 'laua so qomyipi. Ca so'maxare ỹaconalo' saua paañi', ca ỹaanshiguim da na'aachic quiñi qota'olec. Ca co'na' ime, ca ỹaanouguilo saua lapaxaguinatqa, ca saua'maxare imeendec queso qomyipi. ₇Qai'neeta 'vio' saua nalliñirolqai'. Ca so Jesús nqouagaxainlgoto saua'maxare, ca relaataxanlgoto quiyim qaimeendec. ₈Sá'ogue que'e, chaqai sá'ogue quema' so'maxare. Ca co'na' ime, ca lotqai no'qaate' saua siete canastos queso lahillipi ni'ỹoxot na' qalapoon. ₉Ipalata'pegue' cuatro mil so qomyipi que'eetaco' na'le. Ca' so Jesús niquinta'pegue' so qomyipi, ₁₀ca renojñigui aso qom lahi' huaxaỹaqse, liỹareta'pe saua lapaxaguinatqa. Ca querepegue' yi 'laua Dalmanuta.

₁₁Ca' naco' so fariseoipi, ca retaqata'guit so Jesús, ma' ỹahotaque i'guen. Ca ỹashiila quiyim 'ue ca ỹachaxan quena netanec se qaiuanapega, chicqo'ot nqai'en na piguim. ₁₂Ca so Jesús chi nauequeto' lacat, ca 'naaco':

—¿Chi'negue ma' najo qomyipi rashiilaxantaque ca netanec se qaiuanapega? Qam ỹaatqajam llic da shinac caqamiri quiyim nagui ỹaatqajam qaica ca qaỹachaxanem quena netanec na qomyipi.

₁₃Ca' so Jesús ca'e so qomyipi, ca liỹa renojñigui aso qom lahi' huaxaỹaqse, ca taita'gue da laseego aso latogot late'ogue'.

₁₄Ca' saua'maxare couare'e quiyim 'ue ca i'xate' loxe', qaisoota so 'oonoqui' pan hueetañigui aso neesañigui. ₁₅Ca' so Jesús 'neetapegalo' saua'maxare:

—'Neeto', se rovichii'a ana pe'taxachigui na pan hueetaugui na fariseoipi chaqai cayi hueeto'ot ñi Herodes.

₁₆Ca' saua lapaxaguinatqa chi nenatetecto'o' na'le:

—'Naac dajo, ma' sqaica ca ñi'xataq pan.

₁₇Ca' so Jesús retane'o' na'le saua'maxare, ca 'naaco':

—¿Chi'negue dá'maq 'ñiỹac quiyim qaica ca pan? ¿Saqa'le' 'yiiñii, chaqai se retañii? ¿Ñaqai 'xoic la'ñaxac añi re'taxanatahi? ₁₈¿Saqa' huanaxañiỹalo na nqochiri, chaqai sqai 'xahi quenaua rque'lahi lauaco? ¿Se no'viñigue? ₁₉Na' semeendec caua cincolqai' paañi' queca cinco mil qomyipi, ¿ỹote' caua canastos no'xahi' na'le quena lahillipi?

Ca saua'maxare 'neraco':

—Doce.

₂₀—Chaqai na' semeendec caua siete paañi' queca cuatro mil qomyipi, ¿ỹote' na'le caua canastos no'xahi' queca rapooñicshiguii lahillipi?

Ca saua'maxare 'neraco':

—Siete.

₂₁Ca 'naaco' quesaua'maxare:

—¿Qam qaiyiita saqa' 'yiiñii?

₂₂Ca co'na' ỹovirera'a yi Betsaida, ca qanauegueu'a so Jesús so qai'laq, ca qane'xoresene'tot quiyim ỹashil-lec. ₂₃Ca so'maxare icona ada laua so qai'laq, ca ỹauegue'oguiyi quiyi na'a'. Ca ỹa'miiñi'nguilo naua nqote' cana la'le, ca ỹashil-lec so'maxare. Ca inatetac quiyim 'ue ca ne'pelaxana'gue. ₂₄Ca' so qai'laq quenoxon, ca 'naaco':

—Seuana na qomyipi 'ec ana qo'paq, qam ỹouootegueri'.

₂₅Co'na'le, ca' so Jesús liỹa ipootau'alo naua nqote' so'maxare, chaqai so ỹale ỹa'maxate'tegue da lquenoxonaxac. Ca' imeuec, ca ná'ogue iuana, ca ỹaatqajam neuanchiguiñi. ₂₆Ca so Jesús ilato' ca chi la'a' chaqai 'naaco' queso'maxare:

—Sqai ỹoqoira'a yi na'a' chaqai qaica ca 'qaataxañita quedajo quená'ogue ná'maq na'anyi.

₂₇Co'na' ime dajo, ca' so Jesús liỹaata'pe saua lapaxaguinatqa, queesagui naua na'aaterolqai' quiyi Cesarea yí'maq leloxoiqateguesec so Filipo. Co'na'le, ca inateta'pe saua lapaxaguinatqa queso nayic, 'naaco':

—¿Negue' cá'maq 'naac na qomyipi negue' aỹim?

₂₈Ca saua'maxare 'neraco':

—'Ue na 'neetapega qami' so nachilaxanataxanaq Juan, chaqai na liỹa 'neetapega qami' Elías, chaqai 'ue na liỹa 'neetapega quiyim chicqoiraugui so 'auaxaic letaxaỹaxaquiripi ñi qota'a.

₂₉Ca so'maxare inate'o' saua'maxare, 'naaco':

—Qam qamiri, ¿negue' cá'maq 'ñiỹac negue' aỹim?

Ca' so Pedro 'naaco' na'le:

—Qami' ná'maq qami' nashi nca'laxaqui.

₃₀Qam so Jesús 'ue da laqataxac quiyim qaica ca qara'qaataxanem quedajo.

₃₁Co'na'le, ca' ra'qaataxantapegalo so'maxare, ca 'naaco':

—Najo ỹale llaalec 'xoic ma'le ca le'xoric, chaqai qaỹo'daauec ma'le quena nqo'xonqaipi, chaqai quena la'gaxalateripi na netaxaỹaxanqajanqaipi quena' qaretaxaỹa'pegue' ñi qota'a, chaqai na napaxaguinataxanaq quena naqataxaquipi.

Chaqai ra'qaataxanema quiyim qaỹalauat ma'le so'maxare, qam ma' ỹovirerec caua tres na'xata', ca lotqai liỹa nca'leuec. ₃₂Ca' dajo ỹa'xat, qam ỹaatqajam ichoxoteta. Co'na'le, ca' so Pedro ỹauegue'oguiyi nodaqajantec, ca retaxaỹa. ₃₃Qam so Jesús nqohilec, ra'ỹauguilo saua lapaxaguinatqa. Ca 'naaco' queso Pedro:

—Noỹoochirec caỹim, qami' na'ỹaapec, ma' da ra'deenataxanaxaqui' sqai 'nejem da la'deenataxanaxac ñi qota'olec. Ma' dá'maq 'ñi'sari' chaqai qom la'deenataxanaxac.

₃₄Ca' so Jesús roỹaxanouguilo saua lapaxaguinatqa chaqai so qomyipi, ca 'naaco':

—No'm 'ue ca ỹahotaque quegue aỹim, ca coua'e dá'maq chi no'ueenataxac. Ca' quelec aỹim, 'eno'm ỹovira'a quiyim na'laxatañi da nachaalataxac. ₃₅Ma' cá'maq ỹahotaque quiyim nca'laxatec da chi nachaalataxac, ca na'laxatañi; qam cá'maq na'laxatañi da nachaalataxac, soualec aỹim chaqai soualec da na'qaatec, ca nca'leuec ma'le ca'maxare. ₃₆Ma' ¿negue' quet cá'maq 'negue queca qom quiyim ỹomata'ta' ná'ogue na hueetalec na 'laua, qam na'laxatañi da nachaalataxac? ₃₇Ma' ¿ỹote' quet acá'maq ishit ishiueten ca qom quiyim rapilaxat ca nachaalataxac? ₃₈Ma' no'm 'ue ca nayiloxonlec aỹim chaqai dá'maq sa'xatetac quena qomyipi mashic sqai quelec ñi qota'olec chaqai sauaqhuaiquipi, ca' najo ỹale llaalec qai'neeta nayiloxonlec ma'le ca'maxare, ma' ỹovita quiyim rapil naquetagui da lauaq ñi leta'a, chaqai na co'teeta nelaatqaipi chicqashiguim.