Qaraloqojnaxana so no'ueenataxanaripi hualoxonyipi
1Co'na'le, ca' so Jesús ra'qaataxanem so qomyipi, qam ỹahote'e na laloqojnaxanaxat. Ca 'naaco':
—'Uo' na'le so ỹale ỹanñi so lanaxanqa' uva loma'. Ime, ca' ỹapou'a chaqai ỹo'uet aso lapoonaxanaxaqui quiyim qanelam na li'i ana uva, chaqai aso ladocai na'ajnaxanaxalate quiyim qaỹa'ajan sá'ogue so'maxare.
Ca' ỹanalec so lanaxanqa' so 'ueenataxanaxairipi. Ca' eec, qoỹoqo'tegue ca taigue. 2Ca co'na' ỹovita ca laloqo' quiyim qanaqat ana la, ca ỹa'uo' so ila' lelaatec, ca rashiilaxanegue quiyim qaỹoỹoote'oga cá'maq taỹot só'maq lanaxanqa'. 3Qam saua'maxare icondelec, ca ỹouaxansac, ca' ilate', qam qaica ca qoỹaanem. 4Ca só'maq looỹac yi 'laua ỹa'ue so liỹa ila' lelaatec. Qam só, ca qainaqatalec quena qa', chaqai qaicoñirqachit na lqahic, chaqai qaishiuentac. 5Ca só'maq lalamaxaret yi 'laua qaiyiita 'uo' so liỹa ila', ca' só ỹaatqajma' qaỹalauat. Ime, ca' 'xoic na liỹa ila', ca 'ue na qaỹouaxantac, chaqai na liỹa, ca' qaỹalauat.
6Qam ñaqa 'uo' so 'oonoqui' llaalec, só'maq ỹaatqajam lauochaxat. Ca' co'uaataxanto' ila' so'maxare, ma' 'neetapigui lauel: “Qaican qohinegue ma'le, ma' ỹaalec.” 7Qam so no'ueenataxanaripi na'deenta', ca 'naaco': “'Ena richi'guit ná'maq qaỹahotaque quiyim taalec nqohin na 'laua. 'Maxaraic salauataq, qaiyi taalgoto qomi' ma'le quiyim qaralamaxaret najo 'laua.” 8Co'na'le, ca' qaiconlec, ca' qaỹalauat. Ime, ca qainaxa'uegue da lahi so 'laua.
9Ca renataxano' so Jesús:
—¿Negue' cá'maq 'ne'tegue ma'le só'maq ỹaatqajam lalamaxaret yi 'laua? Nanac, qam nalauajñi so 'ueenataxanaxairipi, ca' ỹoqa'a ca ỹaanem so na'laua quiyim ro'ueenataxanlec.
10¿Saqa' taxahilgoto' quen yaua naneresañi la'qaatqa ñi qota'olec? Ma' 'nerac:
Só'maq qa' ỹañijin so 'imec lo'ollipi,
chaqaiso só'maq nollaañi nqohin ca 'imec.
11Ca' dajo ỹo'uet ñi qara'gaxala',
ca' 'ec chalego loyac coqomi'.
12Co'na'le, ca' so qomyipi ỹahotaque coñi' so Jesús, ma' ỹa'den quiyim so'maxare ỹo'uet so laloqojnaxanaxaqui, qam taỹauguilo nqai'ne' saua'maxare. Qam no'chi' saua'maxare quena qomyipi, ca no'ueenaqtesañi so Jesús, ca' que'.
Qainataxanta'pegue ca nishiuetenaxac so nashi quiyim qaishiueten
13Co'na' ime, ca 'vio' saua fariseo qailatalo so Jesús chaqai saua nale' so Herodes, ma' qaỹahotaque quiyim 'ue ca ỹo'maac la'qaatec so'maxare, ca qaỹachigoxochichigui nqohin ca lasauaxaset so'maxare. 14Ca' saua'maxare nagrepegue' so'maxare, ca' inate', 'neraco':
—Qami' napaxaguinataxanaq, sa'deenaq quiyim 'xachisac dá'maq ỹaatqajam lliqueta, chaqai se na'xaỹaxañita ná'maq chaqai 'naac na qom, ma' se ra'iisapigui da chi no'ueenataxac na qom. Ta'ta'a quiyim paxaguinataxañitegue dá'maq llicyaxac dá'maq no'uen 'ueenataxac ỹa'maxarenta ñi qota'olec. ¿Ỹa'maqachiguiñi quiyim seshiuetenaq ñi lashi na nashillipi quiyi Roma, loqo'm 'e'? ¿Seshiuetenaq, loqo'm se seshiuetenaq?
15Qam so Jesús ỹa'den quiyim se no'uen da 'neesa'pegue saua'maxare, ca 'naaco':
—¿Chi'negue ma' viitaque quiyim yachiiñi? Ñaq nodoiquena aca chiróla, ñaq sa'ajan.
16Ca' qanoda'a. Ca co'na' ỹa'ajan, ca' so Jesús renataxano':
—¿Negue' lashic ñí'maq ñijo, chaqai yí'maq neenaxat naneretañi?
Ca saua'maxare 'neraco':
—Ñí'maq lashi na nashillipi quiyi Roma.
17Ca' so Jesús 'naaco' quesaua'maxare:
—'Ỹaañim ñí'maq lashi na nashillipi cá'maq chi lalamaxaret ñi'maxare, chaqai 'ỹaañim ñi qota'olec cá'maq lalamaxaret ñi qota'olec.
Ca saua'maxare 'ue da le'laqa' queda la'qaatec.
Qarenataxanta'pegue ca 'neeta quiyim liỹa nca'leuec ca qom
18Ca co'na'le, ca 'vio' saua saduceo querepegue' so Jesús, ma' na'maxare 'naaco' quen quiyim tot ishit nca'leuec na leuaxaiquipi. Ca co'na'le, ca ỹo'ueete' da la'qaataxanaxague', 'neraco':
19—Qami' napaxaguinataxanaq, so Moisés no'ueenaqtauguilo qomi' ỹeretañi quiyim no'm 'ue ca qom ileu, qam saqa'leca llaalec acá'maq loua no'ueenañi, ca' ca lanoq o'ñiguit acá'maq pa'ỹe, qaiyi ỹa'ue ca llaalec cá'maq lopiichi mashic ileu. 20Ca 'uo' so siete nqaỹaripi. Ca 'ono' só'maq ỹi, ca so'maxare ileu, qam qaica ca llaalqaipi. 21Ca só'maq lanoq lotqai o'ñiguit asó'maq li'ỹoxoua. Qam so'maxare qai'neeta ileu, qam qaica ca llaalec. Ca' chaqaida 'neeto' na'le quesó'maq liỹa lqaỹa. 22Ca vire'to' na' sá'ogue so siete o'ñiguit aso'maxare, qam qaica ca 'ue ca llaalec. Ca vire'to' na' ileu qai'neeta asó'maq 'aalo. 23Ca ma' ỹovita quiyim liỹa qanca'laxatec na leuaxaiquipi, ca ¿nega'ỹo' cá'maq ỹaatqajam loua aso'maxare? Ma' sá'ogue só'maq siete louo' na'le aso'maxare.
24Ca' so Jesús 'naaco' quesaua'maxare:
—Qamiri o'miỹac, ma' sqa 'yiiñii ca reloqo'teguelo naua nanerasañi na'qaatqa, chaqai da lquesaxanaxa ñi qota'olec. 25Qam ma' ỹovita quiyim liỹa qanca'laxatec na leuaxaiquipi, ca tot qaica ca 'on chaqai tot qaica ca ỹo'naxan aca llaale, ma' na'maxare 'nejem ma'le na nelaatqaipi piguim laseripi.
26Qam quedá'maq 'neeta quiyim liỹa qanca'laxatec na leuaxaiquipi, ¿saqa' taxahilco' quen aso lerecse so Moisés, cá'maq 'neeto' na' ñi qota'olec retaqata'pegue' so'maxare 'maqatapougui aso qo'paqo'lli' ỹaviquetaugui? Ma' ñi'maxare 'naaco': “Chaqaỹim ná'maq ỹim qota'a queso Abraham, chaqai so Isaac, chaqai so Jacob.” 27Ma' ñi qota'olec mese qota'olec quena leuaxaiquipi, ta'ta'a ná'maq nca'leetauec. Ca' qamiri ỹaatqajam o'miỹac.
Dá'maq nelaataxanaxac paguec qoyiuejlec
28Ca 'uo' so novi' quena rapaxaguinataxanta'pegue na naqataxaquipi 'qaataco' na'le queso qanoqollictetapigui. Ca ỹa'den quiyim so Jesús ỹaatqajam 'maxaraic da la'qaatec na' ỹopilaxachiguit da nenataxac. Ca so'maxare renataxano' na'le, 'naaco':
—¿Negue' cá'maq paguec qoyiuejlec quená'ogue na nelaataxanaxaquipi?
29Ca' so Jesús 'naaco':
—Dá'maq 'auaxaic nelaataxanaxac quená'ogue 'neetasa': “Ñaq na'xaỹaxañii, qamiri Israel llaalqaipi, ñi qara'gaxala' qota'olec, ñi'maxare qaiñiita na'gaxala'. 30Rauochitegue rqo'chita ñi ra'gaxalachi' qota'olec, machiro'ot añi re'taxanata'e', chaqai dá'ogue da nachaalataxaqui', chaqai na ra'deenataxanaxaqui', chaqai quedá'ogue da rquesaxanaxa'e'.” Dajo dá'maq 'auaxaic nelaataxanaxac paguec qoyiuejlec. 31Chaqai dá'maq liỹa chaqai 'nejem da'maxare 'neetasa': “Rauochitegue rqo'chita ca rqaỹa'e', 'nejem nqai'ñi' qami' quiyim chi nauochiralta'.” Ca' qaica liỹa nelaataxanaxac paguec quiyim qoyiuelec, qainauate' nauajo.
32Co'na'le, ca so napaxaguinataxanaq quena naqataxaquipi 'naaco':
—'Maxaraic da 'ñirac, qami' napaxaguinataxanaq. Ỹaatqajam lliqueta da ra'qaachiqui', quiyim 'oonoqui' ñi qota'olec, chaqai qaica ca liỹa, qaiñiita. 33Chaqai quiyim qarqo'ta ñi'maxare, somatqo'ot añi qare'taxanata, chaqai da qara'deenataxanaxac, chaqai da qanachaalataxac, chaqai dá'ogue da qarquesaxanaxa, chaqai quiyim qarauotegue ca qariỹa, 'nejme' qomi' chi ñauochaqalta', ma' da'maxare napacalec ná'ogue na nachitaxanataxanqateripi quena' qoỹaanot ñi qota'olec, chaqai ana nachitaxanataxanqate quena' qaỹavigaxat cada ncopatoxonaxalate.
34Ca co'na' so Jesús ỹa'den quiyim ỹa'maqachiguiñi da la'qaatec so'maxare, ca 'naaco':
—Tot qoỹoqaque quiyim noxoñira'a da lo'ueenataxanaxac ñi qota'olec ma' ỹoiquentac ná'ogue najo.
Ca' quiyi, ca tot qaica ca liỹa renataxan.
¿Chi negue' cá'maq llaalec só'maq nashi nca'laxaqui?
35Ca so Jesús co'na' rapaxaguinataxantac hueetaugui añi no'ueenaxanaxaqui late'ogue', ca 'naaco':
—¿Negue' cá'maq 'neeta quiyim ná'maq rapaxaguinataxanta'pegue na naqataxaquipi 'naac quiyim cá'maq nashi nca'laxaqui naxan llaalec so qarashi David? 36Qam chaqaiso só'maq David co'na' qaretaqaugui queso Espíritu Santo, 'naaco':
Ñí'maq qara'gaxala' qota'a 'naaco' quiñi ỹa'gaxala':
“Nqa'xañiriñi queda ỹoic,
toco' ma' sillo'oto naua qapiaachichi' ná'ogue na npa'guenaxaua'e'ipi.”
37Ca ¿negue' quet cá'maq 'neeta quiyim ca nashi nca'laxaqui quiyim llaalec quet so David, ma' chaqaiso só'maq David 'naac quiyim la'gaxala' so'maxare?
Ca ma' 'xoic so qomyipi ỹaatqajam nqo'ta quiyim na'xaỹaxantapega so Jesús.
So Jesús ỹoviraqtetapega ná'maq rapaxaguinataxanta'pegue na naqataxaquipi
38Ca co'na' rapaxaguinataxantac, ca 'naaco' na'le so Jesús:
—Rovichii'o' ná'maq rapaxaguinataxanta'pegue na naqataxaquipi, ma' na'maxare ỹaatqajam nqo'ta ỹansañi naua loho ladocaqa, chaqai qaỹa'maxate'tegue quiyim qaiquin queca nayic. 39Na'maxare imitete'e ná'maq paguec loyac qa'xanqa' quena lapoxoqui na judioipi chaqai ná'maq paguec loyac quenaua nqui'ỹaaqate', 40chaqai iỹalaxat quiyim pa'aalec ca la'a' aca pa'ỹe, ca quedá'maq chi nañoqotaxac ca ladocaic nqai'en da nqouagaxainaxac. Ca' chaqaina ná'maq paguec lecaic ma'le ca nouaxanaxaset.
Aso lame aso pa'ỹe 'xorai
41'Uo' so na'xa'a na' so Jesús hueetau'a aso no'ueenaxanaxaqui late'ogue', nqa'xantañi quiyi leseeque'ta yi na'ñi aso nachitaxanataxanqate lahi', ỹa'ajantac na qomyipi inaqategueñi ana lachitaxanataxanqate caso'maxare. Chaqai 'xoic na nesallaxanqaipi 'xoic ana inaxañi lam. 42Co'na'le, ca' noviro' aso pa'ỹe 'xorai. Ca' inaqaiñi saua doosolli' lamirolli' qaica ca nishaapigui. 43Ca' so Jesús roỹaxanalo saua lapaxaguinatqa, ca 'naaco' quesaua'maxare:
—Ỹaatqajam llic da shinac caqamiri, quiyim asojo pa'ỹe 'xorai paguec aso inaxañi quená'ogue na liỹaripi inaqategueñi ana lam cañí'maq nachitaxanataxanqate lahi'. 44Ma' ná'ogue na'maxare inaxañi aná'maq naauec li'ỹoqote, qam ada'maxare quedá'maq le'xoric, qam ỹaano sá'ogue asó'maq louenec laseuete.
