So Jesús rapaxaguinataxanegue da leloxoỹaxac cá'maq ỹalat aca loua
1Ca' so Jesús ca'e yi Capernaum, ca' quepegue' yi 'laua leenaxat Judea chaqai yi 'laua pa'ỹa'gue da lqodoigue caso lachiugue Jordán. Ca' quiyi, ca' so qomyipi lotqai lapoỹau'a yí'maq hueeta'ñi so'maxare. Ma' chi no'ueenataxac, ca lotqai rapaxaguinataxantac. 2Ca 'vio' saua fariseo nqo'nera'a so Jesús ỹahosaque ỹachi'iñi. Ca inate' so'maxare no'm qaỹa'maxarenta quiyim ca ỹale ỹalat aca loua. 3Ca' so Jesús 'naaco' quesaua'maxare:
—¿Negue' cá'maq lelaataxanaxac so Moisés na'le caqamiri?
4Ca saua'maxare 'neraco':
—So Moisés ỹa'maxarenta quiyim ca qom ỹo'uet aca lomalate lerecse, ca' ca'maxare ishit ỹalat aca loua.
5Ca' so Jesús 'naaco' quesaua'maxare:
—So Moisés ỹaanec da lelaataxanaxac na'le caqamiri, ma' paguec da la'ñaxague' naua re'taxanatahi. 6Qam na' ñaqai 'avichiguiñi na' ñi qota'olec ỹo'uet ná'ogue nanchaqaina, ca “ỹo'uet na ỹale chaqai ana 'aalo”. 7“Ca' vichiguiño' quedajo, ca' ca ỹale ca'e ca leta'a chaqai aca late'e, ca' lauora ca loua. 8Ca' saua dos qomi', qam 'ec 'oonoqui' qom.” Ca' totqai dos qomi', ta'ta'a quiyim 'oonoqui' qom. 9Ca vichiguiño' ca qom se ishit quiyim iuagaxajchi cauá'maq mashic ỹo'naxanta' ñi qota'olec.
10Ca co'na' mashic neesa'ñi ca la'aate', ca sauá'maq lapaxaguinatqa lotqai inate' quecá'maq 'neeta dajo. 11Ca' so Jesús 'naaco':
—Ma' ca qom no'm ỹalat aca loua, ca' o'ñiguit aca liỹa 'aalo, ca ca'maxare 'ue ca lasauaxaset, ma' o'nelec aca 'auaxai loua. 12Chaqai no'm aca 'aalo ỹalat ca loua, ca o'ñiguit ca liỹa ỹale, ca ca'maxare qai'neeta 'ue ca lasauaxaset, ma' o'nelec ca loua.
So Jesús ỹaanem da no'uen llicyaxac so ñaaqaipioqui'
13Ca 'uo' so ñaaqaipioqui' qanauegueu'a so Jesús, ma' qaỹahotaque quiyim ỹashil-lec so'maxare, qam saua lapaxaguinatqa retaxaita ná'maq nauecqataxanaripi. 14Ca co'na' so Jesús iuanchigui dajo, ca' ro'o. Ca 'naaco' quesaua'maxare:
—Ñaqai 'xañiỹac na ñaaqaipioqui' ñaqa nacpegue' aỹim, sqai quepaqchita'piguit, ma' da lo'ueenataxanaxac ñi qota'olec quená'maq hueetagui, chaqaina ná'maq neneequesenaxai 'neetari' meca noctoqui'. 15Ỹaatqajam llic da shinac caqamiri, cá'maq sqai 'neetari' ca noctoqui' quiyim icoñiguit da lo'ueenataxanaxac ñi qota'olec ma' ỹoiquentac ná'ogue najo, ca' se inoxona'a.
16Ca' so Jesús qa'aalougui so ñaaqaipioqui', ca' ỹaanem da no'uen llicyaxac, chaqai sá'ogue ỹashil-lec.
So ne'nec nesallaxanec retaqata'pegue' so Jesús
17Ca co'na' so Jesús lotqai liỹa eec, ca 'uo' so novi' ỹale ne'guenta, ca ỹa'yi'iñi naua le'cootal quiyí'maq reloqota'ñi so'maxare. Ca renataxano':
—Qami' ná'maq ỹaatqajam huagaxaraic napaxaguinataxanaq, ¿negue' cá'maq shinta'gue quet quiyim sovirau'a ca nca'laxa sqaica lqodoc?
18Ca' so Jesús 'naaco':
—¿Chi'negue ma' 'ñirapiguiỹa' quiyim aỹim huagaxaraic? Ma' qaica huagaxaraic, qaiñiita ñi 'oonoqui', ca' chaqaiñi ñí'maq qota'olec. 19Mashic 'yiiñi' na nelaataxanaxaquipi: “Se nocachisa'e' aca se roua'e'; sqa lauataxañi'; sqo cuachi'; sqaica ca 'majñisac; sqa yinaxañi'; se napaquiralec ca qataa'i' chaqai aca qachii'i'.”
20Ca' so ỹale 'naaco':
—Qami' napaxaguinataxanaq, ná'ogue najo so'ueetetac shi'gue na' ñaq aỹim noctoqui'.
21Ca' so Jesús nqo'te'ta, ca ra'ỹo'ot. Ca 'naaco' queso'maxare:
—Ỹaatqajam 'oonoqui' dá'maq saqa' 'viichi': mo'e', miiñi' ná'ogue na rovinqui', ca 'ỹaañirougui na 'xoraiquipi, ca' 'ue ma'le ca resallaxa'e' queda piguim. Ca ma' ime, ca naquitegue aỹim, 'eno'm rilliviralec aỹim.
22Qam co'na' 'qaachigui dajo, ca' so ỹale 'uo' da lachitachic. Ca' eec rachicota, ma' ỹaatqajam nesallaxanec.
23Ca' so Jesús ra'ỹaugui só'maq lapoỹaho, ca 'naaco' quesaua lapaxaguinatqa:
—¡Ỹaatqajam 'ue da lqalaic queca nesallaxanec quiyim inoxona'a da lo'ueenataxanaxac ñi qota'olec ma' ỹoiquentac ná'ogue najo!
24Ca' saua lapaxaguinatqa ỹaatqajam 'ue da le'laqa' queda la'qaatec, qam so Jesús lotqai liỹo' 'naac quesaua'maxare:
—Qamiri ỹaalqa, ¡ỹaatqajam 'ue da lqalaic quená'maq pe'eetapega da lesallaxa quiyim inoxona'a da lo'ueenataxanaxac ñi qota'olec ma' ỹoiquentac ná'ogue najo! 25Paguec se qalaq aca nauaanaxanaxa late'e quiyim queetougui nqohin ca a'na lauac, queca nesallaxanec quiyim inoxona'a da lo'ueenataxanaxac ñi qota'olec.
26Ca co'na' qara'xaỹa dajo, ca 'xoico' na ne'laxa, ca chi nenatetecta' saua'maxare:
—Ca ¿nega'ỹo' cá'maq ishit qanca'laxatec ma'le?
27Ca' so Jesús ra'ỹauguilo, ca 'naaco' quesaua'maxare:
—Na chaqai qomyipi se ishit ỹo'uet dajo, qam ñi qota'olec ishit, ma' ñi'maxare qaica ca lqalanec.
28Co'na'le, ca' so Pedro 'naaco':
—Qami' qara'gaxala', qomi' ỹaatqajam cá'ogue ca qarouenqaipi ño'ueenaqtaqatañi, ca ñanaguinaxague qami'.
29Ca 'naaco' na'le so Jesús:
—Ỹaatqajam lliqueta da shinac caqamiri, quecanchaqaica quiyim no'ueenaqtetañi ca la'a', loqo'm caua lqaỹa' ỹale', loqo'm caua lqaỹa' 'aalo, loqo'm ca leta'a, loqo'm aca late'e, loqo'm aca loua, loqo'm caua llaalqa, loqo'm ca na'laua, sauaxat aỹim chaqai da na'qaatec chicqaugui da nca'laxa, 30ca' icoñiguit ma'le quenajo 'laua paguec cien liỹa ca la'aateripi, lqaỹaripi ỹalliripi chaqai 'aallipi, late'ellipi, llaalqaipi, chaqai na'lauaripi, 'eno'm 'ue da nocanaxac. Chaqai quecá'maq 'laua ñaqa naata qai'neeta icoñiguit ma'le da nca'laxa sqaica lqodoc. 31Qam 'xoic ma'le quená'maq nagui 'auaxaic, co'uaataxanta ma'le, chaqai 'xoic ma'le quená'maq nagui co'uaataxanta, ca 'auaxaic ma'le.
So Jesús lotqai liỹa ỹa'xatalec da lelauaxa
32Ca co'na' queesa'gue so nayic, taasa'gue da Jerusalén, ca so Jesús 'aueta queso lapaxaguinatqaipi, qam ỹaatqajam 'ue da le'laqa' quiyim coỹaresaho, qam 'ue da lqolonqa'. Co'na'le, ca lotqai so Jesús liỹa roỹaxanalo ỹoỹooteterec saua doce lapaxaguinatqa, ca ỹaatqajam ra'qaataxane'talo quedá'maq 'neeta ma'le so'maxare. 33Ca 'naaco' quesaua'maxare:
—'Ajñii qamiri nagui saaqata'gue da Jerusalén, ca' yí, hua'ñi ma'le najo ỹale llaalec ma' qoỹaanou'a na la'gaxalateripi na netaxaỹaxanqajanqaipi quena' qaretaxaỹa'pegue' ñi qota'a chaqai na napaxaguinataxanaripi quena naqataxaquipi. Ca na'maxare ma'le, ca ỹaanec da la'qaatec quiyim qaỹalauat chaqai qoỹaanougui na mesqai judioipi. 34Ca na'maxare ỹaatqajam 'ue da le'naxanaxac ma'le, chaqai qaỹouaxan, chaqai qanatoxogui na lashic, chaqai qaỹalauat. Qam ma' ime' caua tres na'xata', ca lotqai liỹa nca'leuec nqohin.
So Jacobo chaqai so Juan rashiilaxane', 'ue ca roỹaxandaque
35Co'na'le, ca so Jacobo chaqai so Juan, llaalqa so Zebedeo, nqo'nera'a so Jesús. Ca 'neraco':
—Qami' napaxaguinataxanaq, tegue' chaqai 'maxariñi' quiyim 'ue ca sashiilaxanqaque caqami'.
36Ca so'maxare inate'o' saua'maxare:
—¿Negue' cá'maq viitaque saanema qamiri?
37Ca saua'maxare 'neraco':
—Quiyim ma' coñichiguit ca ro'ueenataxanaxaqui' 'xoic da lecaic ma' qami' nashi, ca' qomi' ñqa'xanqata'ñi, 'óna queda qatoiqui' chaqai ca liỹa queda nemaqai'.
38Ca' so Jesús 'naaco' quesaua'maxare:
—Qamiri sqa 'yiiñii cá'maq shiilaxañitaque. ¿Peeta'a shichii 'xachii da ñi'guenaxac 'ec qane'taxañigui ma'le aỹim chaqai da chilaxac qanachilaxañigui ma'le aỹim?
39Ca saua'maxare 'neraco':
—Ajá'a, seshitaq.
Ca' so Jesús 'naaco':
—'Nesa ma' llic quiyim qamiri quiichiugui ma'le da ñi'guenaxac 'ec qane'taxañigui aỹim chaqai da chilaxac saañigui ma'le. 40Qam dajo quiyim nqa'xañiñi queda ỹoic chaqai queda ñimaq, mesqaỹim ná'maq saanema qamiri. Ta'ta'a quiyim qoỹaanem cá'maq 'em mashic qaỹa'maxatetañi yi'maxare.
41Ca co'na' 'qaachirigui dajo saua liỹa' diez lapaxaguinatqa, ca qaro'ỹalo so Jacobo chaqai so Juan. 42Qam so Jesús roỹaxanouguilo, ca 'naapegalo':
—Qamiri 'yiiñita da leloxoỹaxac na nashillipi quiyim reloxoỹa'a na ỹoreta'oguit qomyipi, na'maxare 'eco' ilaretac na liỹaripi, chaqai ná'maq quesaxanaxaiquipi, na'maxare ỹo'uet quiyim qana'xaỹaxana ca lelaataxanaxac ná'ogue na liỹaripi. 43Qam caqamiri sqai 'neeta dajo ma'le. Ta'ta'a cá'maq ỹahotaque ỹapacauec caqamiri, ca' chaqaica cá'maq quelola ná'maq liỹaripi; 44chaqai canchaqaica caqamiri quiyim ỹahotaque 'auaxaic, ca' chaqaica cá'maq 'ec na'ac quená'ogue na liỹaripi. 45Ma' vire'ta najo ỹale llaalec mesqa nac ỹahotaque quiyim qaiquelola, ta'ta'a quiyim ná'ogue quelola, chaqai quiyim ỹaanec da nachaalataxac 'ec laseue' nqai'en quiyim 'xoic ca qanca'laxatec qomyipi.
So Jesús nauanñi nqai'en so qai'laq Bartimeo
46Ca co'na' qaỹovita yi na'a' Jericó. Ca co'na' so Jesús mashic inoxonec quiyi na'a', liỹareta'pe saua lapaxaguinatqa chaqai 'xoic so liỹa qomyipi. Ca 'uo' so qai'laq leenaxat Bartimeo, llaalec so Timeo, nqa'xantañi quena lahi so nayic, rashiilaxantac. 47Ca so'maxare co'na' 'xaỹa'guit so Jesús Nazaret le'ec, ca ỹaualaq so'maxare, 'naaco':
—¡Jesús ma' qami' llaalec so qarashi David, yi'xoriñi'!
48Ca 'xoico' ná'maq 'neetapega so'maxare quiyim i'maqata, qam so'maxare lama'xa ỹaualaq:
—¡Qami' llaalec so qarashi David, yi'xoriñi'!
49Co'na'le, ca' so Jesús hua'e, ca 'naaco':
—Ñaq oỹaxañiỹa ñi'maxare.
Ca' qaroỹaxano' na'le so qai'laq, ca qohinapego':
—Na'ñaxachi', ne'laxachirishiguim, ma' da'maxare roỹaxana qami'.
50Ca inaqauec aso le'laalo, ca nenojshiguim, ca nqo'neu'a so Jesús. 51Ca' so Jesús inato' na'le so'maxare, 'naaco':
—¿Negue' cá'maq vi'saque quiyim sa'ue caqami'?
Ca' so qai'laq 'naaco':
—Qami' napaxaguinataxanaq, ỹim sahotaque ñiuanñi.
52Ca' so Jesús 'naaco':
—Mo'e', qui', nagui mashic remi'rec, ma' qami' vi'relec.
Ca chaqa'ma' neuanñi so qai'laq, ca' quegue so Jesús.
