Malaquías 3

₁Ñi qara'gaxala' sqaica lqalanec 'naac: Ỹim sela' ma'le ca ilaatec quiyim ỹa'maxajñi ca ñayicyaxac. Ñí'maq na'gaxala', ñí'maq daañitaque, ñi'maxare nquipitaugui inoxonougui ma'le ñi lo'ueenaxanaxaqui. Chaqai mashic novi' ná'maq ỹa'xateta'guit ca 'deenaxac ná'maq repaguitaque qamiri!

₂Qam ¿negue' cá'maq nalo'guit ma'le cá'maq na'xa'a loviraxaqui? ¿Negue' cá'maq ishit nachaatetañi ma'le? Ma' da loviraxac 'ec ma'le ca norec, ca qarco'taxajñi; 'ec ma'le ca quiỹoxonaxat ma' naqat na qarishile. ₃Ñi qara'gaxala' nqa'xanñi, ca' co'taxat ma'le na netaxaỹaxanqajanqaipi, ná'maq chigoxougui so Leví, 'ec cá'maq co'taxat ca plata chaqai ca 'oro, ỹahote'e norec. Ime, ca' naua'maxare ishit ỹaando ca lachitaxanataxanaxat quiñi qara'gaxala', ipacqajanchigui dá'maq ỹaatqajam 'neeta ca nachitaxanataxanaxat. ₄Ca' ñi qara'gaxala' netoonegue ma'le ca lachitaxanataxanaxat yi Judá chaqai yi Jerusalén, 'nejem ca netoonaxac na'le quesaua 'auaxaqa na'xata'.

₅Ñi qara'gaxala' sqaica lqalanec 'neetasa' da la'qaatec: Ỹim semite' qamiri ma'le queda rasauaxashichii. Chaqai ỹim ná'maq seuanchigui ná'maq ỹoiquen ca liỹa, ná'maq lapaatapi'ñi' ana se loua, ná'maq nallitalta' quena' 'ue da ỹa'xat, qam se ipacqajñigui, ná'maq qa'viita'pegue na 'ueenataxanaxairipi chaqai ana pa'ỹe chaqai na na'pelyipi, chaqai ná'maq se ỹa'maxata'gue na ỹoqa'a ca chicqa'gue, chaqai ná'maq napaqueteguelec aỹim.

₆Ỹim ná'maq ỹim na'gaxala'. Se ñadalaxat. Vichiguiño' qamiri chigoxoỹaugui so Jacob se qanomachiñi qamiri. ₇Qamiri se na'xaỹaxañiỹa na ỹaqataxaquipi, ca noỹoochiuec, 'nejem dá'maq 'neeta na' noỹootec so 'auaxaic qataa'illipi. Ỹim na'gaxala' sqaica lqalanec, shinac caqamiri: ¡Rapilliua' aỹim, ca' ỹim sopilliguita qamiri! Qam qamiri 'ñiỹac: ¿Negue' quet cá'maq 'neeta quiyim sopilaxa qami'? ₈Ca' ỹim senataxan: ¿Ca qom ishito' quiyim ỹachiguiñi ñi qota'olec? ¡Ma' qamiri yachiitegueñi! Qam qaiyiita nataxañitac: ¿Negue' cá'maq 'neeto' quiyim sachoqotegueñi qami'? Qam ¡qamiri yachiitegueñi cañi qanasectaxatec quiyaua diez chaqai cañi rachitaxanataxanqachii! ₉Ajá'a, ná'ogue na qomyipi neetalec najo 'laua, qamiá'ogue qamiri chi yachiitegueñi. Vichiguiño' ỹim se no'uen nqaishin da no'ueenataxaguii. Ỹim na'gaxala' sqaica lqalanec, shinac dajo caqamiri: ₁₀Nodohiuo añi 'oono'lli' añí'maq qanasectaxatec quen quiyaua diez quiñi nachitaxanataxanaxat lahi' añi no'ueenaxanaxaqui, qaiyi 'ue ca na'ic quiñi iuo'. Ñaq yi'guiñii quedajo pogoño' se sauatouguilo naua nqotel quena piguim, ca' chalego ca ra'maxahi ñocori'ñalo qamiri. ₁₁Ca' mesqai saxanegue quiyim na nichigaxanaq nichiguiñi na qadañicshiguii ala chaqai naua qadanaxahi 'uva lomaate'. ₁₂Ná'ogue na ỹoreta'oguit qomyipi 'naac ma'le chalego ra'maxahi, ma' chalego lemaqachic ma'le na 'laua ñiitalec. Ỹim na'gaxala' sqaica lqalanec, shinac dajo.