Lucas 9

₁So Jesús lapoonta' saua doce lapaxaguinatqaipi, ca ỹaanem da la'ñaxac chaqai da lquesaxanaxa quiyim ỹo'daauec ná'ogue nanchaqaina ne'ec lecmaxaiquipi, chaqai quiyim ỹomatec na ỹoreta'oguit nalolaxaseteripi. ₂Ca' ilate' quiyim ỹa'xate' quiyim ñi qota'olec ỹoiquentac ná'ogue najo, chaqai quiyim ỹomatec na ralolaxaic. ₃Ca' 'naapegalo' saua'maxare, 'naaco':

—Sqaico' 'xachii quena nayic. Sqai 'xachii aca rashillichii, chaqaca qachoxoguii, chaqai ca qanoxohi, chaqaca qadamii. 'Xachii ca 'oonoqui' nelamaxaguii, mesqai dos. ₄Canchaqaica 'imec vireu'a, ca chaqaica ñiỹa'ñi, toco' ma' ỹovita quiyim quihe'e ca noma'. ₅Qam ca hua'ñi quiyim se qaicoñiỹaxaguit, ca' oquiỹa'e ca na'a'. Ca chigoxohi na lamoxoỹaxa quenaua qapiaachiri. Ca' chi netanec quiyim chi nasauaxaseteguelta' so'maxare.

₆Ime, ca' que' saua'maxare, querepegue' ná'ogue ná'maq hua'ñi na na'aaterolqai', ca' ỹa'xatesac da na'qaatec chicqaugui da nca'laxa chaqai ỹomaterec na ralolaxaiquipi.

₇Ca' so nashi Herodes co'na' ỹa'den ná'ogue ná'maq ỹo'ueetetac so Jesús, ca' ỹaatqajam se ỹa'den ca 'neeta, ma' 'uo' na 'neetapega quiyim liỹa nca'leuec so Juan. ₈Chaqai 'uo' na 'neetapega chaqaiso so la'qaataxanqajnec ñi qota'a leenaxat Elías quiyim lotqai liỹa nachaxan. Chaqai 'uo' na 'neetapega quiyim sqoue cá queso 'auaxaic letaxaỹaxaquiripi ñi qota'a quiyim 'ue ca liỹa nca'leuec. ₉Qam so Herodes 'naaco':

—Chaqaỹim selaataxanlec na'le quiyim qaichaxauec ca lqahic so Juan, qam ¿chi' nega'ỹo' case'e sa'qaateguelec quiyim ỹaatqajam 'xoic na na'qaataxanaxac?

Ca' so Herodes ỹaatqajam ỹahotaque ỹauana so'maxare.

₁₀Co'na' so lapaxaguinatqaipi so Jesús mashic rapil, ca qara'qaataxantapeguem quedá'maq lo'ueenatqaipi. Ca' so'maxare nodaqajantec so qomyipi quiyim ỹauega yi 'laua sqoỹoqaque quiyi na'a' Betsaida. ₁₁Qam co'na' qaỹa'den dajo queso qomyipi, ca co'uaataxan. Ca' so Jesús ỹacoñi'chiguit sá'ogue, ca ra'qaataxantapeguem queda 'neeta ñi qota'olec chaqaiñi ỹoiquentac ná'ogue najo, chaqai ỹomatec so ralolaxaiquipi.

₁₂Ca co'na' mashic vit, ca saua doce lapaxaguinatqa noquiictot so Jesús. Ca' qohinapega so'maxare:

—Pilaxachi' na qomyipi, qaiyi pil, ca' nco'matec ma'le. Chaqai idaanaque ca loq quenaua na'aate', loqo'm quena sqoỹoqaque, ma' quena seuqate'e ỹaatqajam sqaica canchaqaica.

₁₃Qam so Jesús 'naapegalo':

—Qamiri 'ỹaañim cá'maq loq na'maxare.

Ca saua'maxare 'neraco':

—Qaica ca liỹa qonoq. Qainauate' naua cinco paañi' chaqai naua doosolqai' nalliñi'. Qaidaata no'm qomi' seshiujnaxanqaque ca na'ic, qaiyi que'e ná'ogue najo qomyipi.

₁₄Ma' sham ỹovi' cinco mil so ỹalliripi. Qam so Jesús 'naapega so lapaxaguinatqaipi, 'naaco':

—'Ñiỹapega quiyim nqa'xanñi, lapo'ojta' cincuentatac nqai'ñii.

₁₅Ca' chaqaida qohine'tegue, ca sá'ogue nqa'xanñi. ₁₆Ca' so Jesús ỹaconalo saua cinco paañi' chaqai saua dos nalliñi'. Ime, ca' ra'ishiguim quena piguim, ỹaanot da na'aachic ñi qota'olec. Ca co'na' ime, ca ỹasectaqchiguilo, ca ỹaanouguilo saua lapaxaguinatqa, ca imeendec queso qomyipi. ₁₇Ca sá'ogue so qomyipi que'e, ca co'na' sá'ogue quema'. Ca co'na' ime, ca qalapon so ni'ỹoxot, no'qaate' saua doce canastos quena lahillipi.

₁₈'Uo' so na'xa'a co'na' so Jesús nqouagaxaintac, nodaatec, ca' saua lapaxaguinatqa liỹareta'pe co'na'le. Ca inate', 'naaco':

—¿Negue' ca 'naaco' quen na qom quiyim negue' aỹim?

₁₉Ca saua'maxare 'neraco':

—'Ue na qom 'naac qami' Juan nachilaxanataxanaq, chaqai na liỹa 'naac qami' Elías, chaqai 'ue na liỹa 'naac sqoue quiyim 'ue ca nca'leuec quesaua 'auaxaiqa la'qaataxanqajanqaipi ñi qota'a quiyim liỹa nca'leuec.

₂₀Ca lot inate' saua'maxare, 'naaco':

—Qam qamiri ¿negue' ca 'ñiỹac caỹim?

Ca' so Pedro 'naaco':

—Qami' chaqaqami' na' qami' nashi nca'laxaqui, chicqoiro'ot ñi qota'olec.

₂₁Qam so Jesús qatalo saua'maxare quiyim qaica ca qara'qaataxana quedajo. ₂₂Chaqai 'naac:

—Najo ỹale llaalec ỹaatqajam 'xoic ma'le ca le'xoric, chaqai se qaicoñiguit quena qo'xoiquipi, chaqai na lashillipi na letaxaỹaxanqajanqaipi na qomyipi quena' qaretaxaỹa'pegue' ñi qota'a, chaqai ná'maq rapaxaguinataxanta'pegue na naqataxaquipi, chaqai qaỹalauat ma'le. Qam ma' ỹovirerec caua tres na'xata', ca' liỹa nca'leuec.

₂₃Ime, ca' 'naapega sá'ogue so qomyipi:

—No'm 'ue ca ỹahotaque quegue aỹim, ca 'maxaraic quiyim coua'e da chi no'ueenataxac, ca' quegue aỹim naua'que naua na'xata', 'eno'chi na'laañi da nachaalataxac. ₂₄Ma' ca nishiitaque nca'laxatec da nachaalataxac, ca na'laxatañi. Qam ca na'laañi da nachaalataxac soualec aỹim, ca chaqaica ca nca'laxatec da nachaalataxac. ₂₅Ma' ¿negue' ca 'negue queca qom no'm laueguec ná'ogue na hueetalec na 'laua, qam na'laañi, loqo'm chi nasauaxatalta'? ₂₆Ma' ca npocoxolec aỹim chaqai da ỹa'qaatec, qai'neeta najo ỹale llaalec npocoxolec ma'le ca'maxare, ma' ỹovirelec quiyim rapil ma' ỹovita quiyim nashi, naquetaugui da lauaq ñi leta'a chaqai na co'teeta lelaatqaipi piguim laseripi. ₂₇Ỹaatqajam llic da sa'xat caqamiri 'vio' caua quená'maq hueete'ena nagui ỹalequetaho saqa' ileu iuanchigui ma'le ñi qota'olec ỹoiquentac ná'ogue najo.

₂₈Ca co'na' mashic ỹovi' ocho na'xata' ỹa'xat dajo so Jesús, ca quishi'megue aso qa' ladocai, ca nqouagaxain, liỹareta'pe saua Pedro, Jacobo, chaqai so Juan. ₂₉Ca co'na' so Jesús nqouagaxaintac, ca ỹoqa'a da no'ueenataxac, na lashic chaqai saua loho ỹañigui, qashilec da lalacqa'. ₃₀Ca' quiyi, ca re'xoi' saua dos qomi' retaqata'pegueto so'maxare. Qa' chaqaisauo' saua Moisés chaqai so Elías. ₃₁Ỹaatqajam hueesaugui so nqashilegaxa, qaica ca 'nejem lauaq. Ca' retaqasapigui da 'neeta ca lelauaxa so Jesús ma' ỹovita yi Jerusalén. ₃₂Qam so Pedro chaqai saua nauegaxaua' ỹaatqajam 'xoic na lelaxague'. Qam liyi neloosauec. Ca iuanchirigui da lauaq so Jesús chaqai saua dos ỹale' lapoota'to so'maxare. ₃₃Ca' queco'na' saua ỹale' sham ỹore'ogalo nqo'neesauec queso Jesús, ca retaqa so Pedro, 'naaco':

—Qami' napaxaguinataxanaq, ¡chalego la'maxa quiyim quenajo seuqate'e! So'ueetaxai' caua tres ni'ỹaxaqui', 'óna caqami', chaqai ca liỹa queda Moisés, chaqai ca liỹa queda Elías.

Qam so Pedro se ỹa'den ca 'neeta da la'qaatec. ₃₄Ca co'na' ñaq retaqatac, ca novi' so naueguelec, ca ỹaatqajam lepajlgoto, ca' ỹaatqajam 'uo' da lqolonqa' co'na' iuanchirigui quiyim hueesaugui so naueguelec. ₃₅Ca 'uo' so qara'xaỹaque na'qaatec, 'maqatougui so naueguelec, 'naac:

—'Eda da ỹaalec ỹoqo'itaxat, chaqaida na'xaỹaxañiỹa.

₃₆Ca co'na' ỹoxogue sojo na'qaatec, ca lotqai qaiuane'ta so Jesús qaidaatam. Ca saua'maxare i'maretem', chaqai sqaica ca ra'qaataxanta quedá'maq ỹauanchirigui.

₃₇Ca queca liỹa na'xa'a, co'na' rapilliñi caso qa' ladocai, 'xoico' na qom qateta'guit so Jesús. ₃₈Ca 'uo' so ỹale 'maqachiguiñigui so qomyipi, retaqa, netenegue da la'qaatec, 'naaco':

—Qami' napaxaguinataxanaq, ñaq qouaquiric 'ajñi' yi ỹaalec. Ma' ỹaatqajam qaiyiita 'oonoqui' ỹaalec. ₃₉'Uo' so le'ec lecmaxaic quena' ỹovitot, ca' ỹaualqachit chaqai ileueta nqai'en. Ca nac nqai'en na ro'i quena lap. Ỹaatqajam 'ue da lqa'viic, chaqai sqai ỹaxanec. ₄₀Qam mashic shi'gue ñi'xoresene'toto daua rapaxaguinataxahi' quiyim ỹo'derauec, qam se ishite'.

₄₁Ca' so Jesús 'naaco':

—¡Ca quena qomyipi sqaica nqai huelec chaqai hualoxonyipi! ¿Tegue' canchaqa lagui viitaque quiyim qamiri iỹaata'pe quiyim ñaqai eec da iualaxavic? Naviquitegue najo ca qachaalqui'.

₄₂Qam co'na' noquiigo so ne'nec, ca' so le'ec lecmaxaic nenaxañi quena 'laua, ca lotqai ileueta nqai'en. Qam so Jesús nelaxa so le'ec lecmaxaic, ca imeuec nqai'en so ne'nec. Ime, ca ỹopilaxatot so leta'a. ₄₃Ca sá'ogue so qomyipi ỹaatqajam 'ue da le'laxa queda lquesaxanaxa ñi qota'a.

Qam co'na' ñaqai sá'ogue i'laqatapega da lo'ueenataxanaxac so Jesús, ca so'maxare 'naapegalo saua lapaxaguinatqa, 'naaco':

₄₄—Ñaqai ỹaatqajam na'xaỹaxañii'ta dajo, chaqai se couahi'e quiyim najo ỹale llaalec qoỹaanougui ma'le na qomyipi, ca na'maxare ỹoiquentac ma'le.

₄₅Qam so lapaxaguinatqaipi se ỹa'den da qohintapega, ma' chi qohinegue se qaỹa'deenaxanaxanegue chaqai 'ue da lqolonaxa quiyim rashiilaxan quiyim qaỹa'xatem ca leloxaỹaxac da na'qaatec.

₄₆Ca' so lapaxaguinatqaipi nqueuoreta'ta' quecá'maq paguec lecaic quesaua'maxare. ₄₇Qam so Jesús ỹa'den da la'deenataxanaxac saua'maxare. Ca' ỹacone'oga so noctoqui', ca nauaxaỹaxane'e'. ₄₈Ca 'naaco':

—Ca icoñiguit najo noctoqui' quiyim ỹaatqajam huelec aỹim, ca' chaqaỹim icoñiguit. Ca cá'maq icoñiguit aỹim, icoñiguit qai'neeta ñí'maq yila'. Ma' cá'maq 'ec sqaica ca lemaqachic caqamiri, ca' chaqaica cá'maq paguec ma'le ca lecaic.

₄₉Ca' so Juan 'naaco':

—Qami' napaxaguinataxanaq, 'uo' so seuanaxa ỹale ỹo'deetapeguec na ne'ec lecmaxaic, ro'goxontapega da qadeenaxachi', qam se sa'maxarenaq, ma' se liỹareta'pe qomi'.

₅₀Qam so Jesús 'naaco':

—'E', sqo lliỹapeguem, ma' no'm se qanpa'guenaxaua, ca' chi qarotaua.

₅₁Ca co'na' tot qoỹoqaque quiyim so Jesús taigue da piguim, ca ỹa'ñaxachigui na lauel quiyim taigue da Jerusalén. ₅₂Ca ỹa'auaxante' saua lelaatqa, ca saua'maxare querepegue' na hua'ñi na sqailligueme' na qom quiyi 'laua Samaria, qaiyi ỹa'maqatañi 'ue ca lanatqa'. ₅₃Qam so qomyipi na'ñi yi Samaria se ỹacoñiguit so'maxare, ma' ỹa'den taata'gue da Jerusalén. ₅₄Ca' saua lapaxaguinatqa Jacobo chaqai so Juan na' ỹa'deene' dajo, ca 'neraco':

—Qami' qara'gaxala', ¿tegue' chaqai 'maxariñi' quiyim soỹaxanqaque ca norec chicqo'ot na piguim, qaiyi nomatañi ná'ogue na'maxare, 'nejem ca 'ne'tegue na'le so la'qaataxanqajnec ñi qota'a leenaxat Elías?

₅₅Ca' so Jesús ra'ỹauguilo saua'maxare, ca retaxaỹalo, ca 'naapegalo':

—Qamiri sqa 'yiiñii negue' ca se re'xogui chicqo'ot dajo se no'uen ra'deenataxanaxaguii. ₅₆Ma' najo ỹale llaalec mesqa naque quiyim na'laxatañi na nachaalataxac na qomyipi. Chaqaidaata quiyim ỹahotaque nca'laxatec.

Ime, ca' que', querepegue' ca liỹa na'a'.

₅₇Ca co'na' queesa'gue so nayic, ca 'uo' so ỹale 'naac queso Jesús:

—Qami' ỹa'gaxala', aỹim sahotaque shiguegue qami' quecanchaqa 'itegue.

₅₈Ca' so Jesús 'naaco':

—Aca nouaxaỹaxa 'ue lauac, chaqai ana qo'oole ná'ogue 'ue na lpa'gue', qam najo ỹale llaalec qaica ca lo'xaỹoqsoqo'.

₅₉So Jesús ca lotqai 'naapega so liỹa:

—Quitegue aỹim.

Qam so'maxare 'naaco':

—Qami' ỹa'gaxala', ñaq yayaxañirac ñaqa 'au seshinñi yi ita'a.

₆₀Ca' so Jesús 'naaco':

—Ñaqa 'xañirac ná'maq 'ec leuaxaiquipi ñaq ishinñi na lasouaxanqaipi. Qam qami' qui', 'xachi' quiyim ñi qota'olec ỹoiquentac ná'ogue najo.

₆₁Ca 'uo' so liỹa 'naac:

—Qami' ỹa'gaxala', sahotaque shiguegue qami', qam ñaqai 'au spoyiguin yi iuo'.

₆₂Qam so Jesús 'naaco':

—Ca qom quiyim mashic ỹashil-lec ca lasaugaxanaxat, ca nqovilca, ca' sqa taiguit da lo'ueenataxanaxac ñi qota'olec quiyim ỹoiquentac ná'ogue najo.