Lucas 5

₁Ca 'uo' so na'xa'a so Jesús hueeto'ot yi tocot aso latogot late'ogue' hua'ñi yi Genesaret. Ca' ỹaatqajam 'xoic so qom novita, vire'ta npataxata', ma' so'maxare ỹahotaque quiyim na'xaỹaxana ca la'qaatec ñi qota'a. ₂Ca' so Jesús idaana'alo saua dos qom lahiri huaxaỹaqse co'chiichiguilo, neeso'ot na tocot aso latogot late'ogue', ma' só'maq noqoinaxanyipi renotec quesaua'maxare. Ca' quiỹota'pe saua lalecqa. ₃Ca' so Jesús renojñigui aso 'óna, aso'maxare looỹac so Simón. Ca 'naapega so'maxare cocho'qui' noquigaqtaxasom. Ime, ca so Jesús nqa'xanñi caso qom lahi', ca' quelec quiyim ỹapaxaguin so qomyipi co'na' no'ueeno'ot so tocot. ₄Ca co'na' ime da letaxaỹaxac, ca' 'naapega so Simón, 'naaco':

—Nqo'naqchiraxasom quiyi la'paqa' aná'maq senqatañigui. Ime, ca' alliguiiñi ana roqoinaxanaxaguii.

₅Ca' so Simón 'naaco':

—Qami' napaxaguinataxanaq, qomi' sá'ogue so pe soqoinaxanqatac, qam sqaica ca qaroqoinecsec. Qalaxam qami' mashic qarelachi', ca' nagui aỹim senaxañi na ỹaleguec.

₆Ca co'na' mashic qainaxañi so naleguec, ca' ỹaatqajam 'xoic so noqoinecsec nallin. Ca vire'to' sham secta'gue so naleguec. ₇Ca saua'maxare rategaxanalo saua liỹa' neesañigui aso liỹa huaxaỹaqse qaiyi nague', ỹotauane' saua'maxare. Ca' saua liỹa' nague', ca' ỹaatqajam qano'xataxachichiguilo saua dos qom lahiri huaxaỹaqse. Vire'to' ỹame'quet iyiñiñi saua'maxare. ₈Ca co'na' iuana dajo so Simón, ca' ỹa'dooto naua le'cootal so Jesús. Ca' 'naapega, 'naaco':

—Noỹoochirec caỹim qami' ỹa'gaxala', ma' ỹim ỹaatqajam aỹim ỹale sauaqhuaic.

₉Ma' so Simón ỹaatqajam no'chi, chaqai sá'ogue só'maq liỹaatac sauaxat da 'neeta só'maq loqoinecseripi. ₁₀Chaqai so Jacobo chaqai so Juan llaalqa so Zebedeo chi liỹa' so Simón qai'neeta no'chi'. Qam so Jesús 'naapega so Simón, 'naaco':

—Totaxan ro'chi'i', ma' nagui sanagui qami' quiyim qami' noqoinaxanaq quena qomyipi.

₁₁Ca co'na' mashic ỹaueguereta saua qom lahiri huaxaỹaqse, ca' ỹaatqajam qano'ueenaqtetaguilo, ca' quetegue so Jesús.

₁₂Ca co'na' hueetau'a so 'óna quiyi na'aateripi so Jesús, ca' anaco' so qom rishiita na loshicmaxa. Ca' ỹa'dooto naua le'cootal, ỹoviraqtañi na latap quena 'laua. Ca' ne'xoresene'tot so'maxare, 'naaco':

—Qami' ỹa'gaxala', 'nesam shichi'o', quiỹo'irec na yalolaxa.

₁₃Ca' so Jesús ipootau'a so'maxare, ca' 'naapega, 'naac:

—Ajá'a, seshit. Nagui, ca' qami' remi'rec.

Ca co'na' naauec da la'qaatec, ca' so nalolaxa ca'e na loshicmaxa so ralolaxaic. ₁₄Ca' so Jesús 'naapega so'maxare:

—Qaidaata quiyim qami' oqui', nachaxañireu'a ñi letaxaỹaxanqajnec na qomyipi quena' qaitaxaỹa'pegue' ñi qota'a. Ime, ca' 'ỹaañiro aca rachitaxanataxanqachi'i' aca relaataxanlec nallaaqo' so Moisés, acá'maq ñigui quiyim qami' remi'rec, qaiyi ỹa'den ná'ogue quiyim mashic qami' remi'rec queso ralolaxa'e'.

₁₅Qam da lichoxoric so Jesús ỹaatqajam noquiiquetauec, ca' ỹaatqajam 'xoic na qomyipi quepegue', ma' ỹahotaque quiyim na'xaỹaxana, chaqai ỹahotaque quiyim ỹomatec so'maxare na ralolaxa. ₁₆Qam so Jesús ta'oga ca 'laua sqaica qom. Ca' hua'ñiyi, ca nqouagaxaintac.

₁₇Ca 'uo' so na'xa'a so Jesús rapaxaguinataxantac, ca 'uo' na ỹalequetaho, nqa'xantañi, ná'maq ỹalequetaugui na fariseoipi, chaqai ná'maq rapaxaguinataxanta'pegue na naqataxaquipi, novi', chicqa'ogalo naua na'aate' quiyi Galilea chaqai yi Judea chaqai Jerusalén. Ca' da lquesaxanaxa ñi qota'olec re'oq queso'maxare quena' ỹomatec na ralolaxaiquipi. ₁₈Ca' novirero' saua ỹale' notaansagui so lacanec so liỹa', ma' se ra'ñiigue. Ca' ỹahosaque inoxonaqtero queso 'imec quiyim qaỹodou'a so Jesús. ₁₉Qam sqaica ca lliguero, ma' ỹaatqajam ỹapaguelec na qom. Ca qarenojshi'megue da pa'aashiguim queso 'imec, ca' qanaqat na lahi so lelaq. Ime, ca' quiichi'ñigui nqohin so lacanec so ralolaxaic, taachi'ñigui nqohin so qomyipi yí'maq hueete'e so Jesús. ₂₀Ca' so Jesús co'na' iuana da lpi'ỹaxac so'maxare, ca' 'naapega so ralolaxaic, ca' 'naac:

—Qami' nagui ná'ogue na rasauaxashichi' qaỹapalaxat.

₂₁Ca ná'maq rapaxaguinataxanta'pegue na naqataxaquipi chaqai ná'maq ỹalequetaugui na fariseoipi chaqa'ma' ra'deenataxantac, 'naac:

—¿Nega'ỹo' dá'maq dajo ỹale? ma' napaqueteguelec ñi qota'olec queda la'qaatec. Ma' sqaica ca ishit ỹapalaxat na nasauaxaseteripi. Chaqaiñiita ñi qota'olec.

₂₂Qam so Jesús ỹa'den da la'deenataxanaxac so qomyipi. Ca 'naaco':

—¿Chi'neco' ma' ra'deenataxanaxaguii dá'maq dajo? ₂₃¿Negue' ca paguec se qalaq quiyim qohinac: “Ná'ogue na rasauaxashichi' qaỹapalaxat”, loqo'm qohinac: “Ñirishiguim, ca' qui'”? ₂₄Qalaxam nagui nachaxanalo qamiri najo ỹale llaalec quiyim ỹaatqajam 'ue da lquesaxanaxa quena 'laua quiyim ỹapalaxat na nasauaxaseteripi.

Ca' 'naapega so ỹale se ra'ñiigue, 'naaco':

—Nagui shiñirapegaxaua', ñirishiguim, nañireta' na qacanqui'. Ime, ca' qui', quirepegue' ca ra'aachi'.

₂₅Ca chaqa'ma' ne'laxashiguim só'maq se ra'ñiigue, ỹauanchigui sá'ogue so qomyipi. Ime, ca' inanta' so lacanec só'maq hueetalec, ca' pil queca la'a', imaqachintac ñi qota'a. ₂₆Ca' sá'ogue so qomyipi ỹaatqajam 'ue da le'laxa, chaqai qaimaqachintac ñi qota'a, chaqai ỹaatqajam 'ue da lqolonaxa. Ca' 'naaco':

—Quena na'xa'a ỹaatqajam sqaica 'nejem da lecaic da seuanqachigui.

₂₇Ca co'na' ime dajo, ca' so Jesús inoxonec, ca iuanejlec so ỹaconta'piguit ana nishiuete so nashi quiyi Roma. So'maxare leenaxat Leví, ca' nqa'xantañi, neeta'ñi yi lishiuetenaxanqa' ná'maq rishiuetenaxantac. Ca' 'naapego', 'naaco':

—Naquitegue aỹim.

₂₈Ca' so Leví ne'laxashiguim, no'ueenaqtetañi sá'ogue, ca' quegue so Jesús.

₂₉Ime, ca' ỹo'uet so lqui'ỹaxac lodegaxat, illa'ñi yi la'a', lqui'ỹaxaua so Jesús. Ca' ỹaatqajam 'xoico' so ỹalequetaho quesó'maq ỹacona'piguit ana nishiuete so nashi quiyi Roma, chaqai 'xoic ná'maq liỹaripi nqa'xantañi, reloqotalec so nqui'ỹaxala'. ₃₀Qam so fariseoipi chaqai so liỹaripi só'maq rapaxaguinataxanta'pegue na naqataxaquipi, ca' queeteguelgoto saua nale' so Jesús. Ca' 'neetapegalo:

—¿Chi'neco' qamiri ma' rqui'ỹaxauahi ná'maq sauaqhuaiquipi chaqai ná'maq ỹacona'piguit ana nishiuete ca nashi quiyi Roma?

₃₁Ca' so Jesús 'naaco':

—Se ỹouen ca natarenataxanaq ca qom quiyim no'uenta, chaqaicaata ca ralolaxaic maq ỹouen. ₃₂Aỹim se ñanaque quiyim soỹaxana ca qom lo'yaxanec, ta'ta'a ca sauaqhuaic, qaiyi ỹalate' naua lanatqa.

₃₃Ca' so qomyipi inat so Jesús, 'naaco':

—¿Chi'neco' ma' ỹapaguec da nqopaaqachitaxac chaqai da nqouagaxainaxac ná'maq coỹareta'pegue' so Juan chaqai na fariseoipi, qam naua rapaxaguinataxahi' ta'ta'a da lqui'ỹaxague' chaqai da ne'taxague'?

₃₄Ca' so Jesús 'naaco':

—¿Tegue' chi ishit qopat nqai'ñii ca nalecsec queca shilaq, quiyim ñaq ỹalequetaho cá'maq ỹahotaque quiyim shilo? ₃₅Qam ma' ỹovita ca laloqo' quiyim qanaqata'a ca o'naq, ca' qaigueme ishit nqopaaqachit.

₃₆Chaqai ỹa'uo' ca laloqojnaxanaxat, 'naaco':

—Qaca aca ishit naquilguec ca lahi aca neloxoqui dalaxai, ime, ca' rapalatenaxana caca itereta neloxoqui. Ma' no'm 'ne'tegue, ca na'axat aca loxoqui dalaxai, chaqai ca lahi dalaxaicolec sqa taiguit aca mashic itereta loxoqui. ₃₇Chaqai se ishit qaỹocoriñigui ca loshicmaxa leteraxaic ca lataxa saqa' ime. Ma' no'm qohine'tegue, ca' cajo lataxa quiyim dalaxaic ishit ỹasectaqta'gue aca loshicmaxa, ca' na'laañi cá'maq lataxa dalaxaic, chaqai 'neeta aca lahi' loshicmaxa. ₃₈Vichiguiño' ca dalaxaic lataxa, ca qaỹocoriñigui acá'maq dalaxaỹole loshicmaxa ca isecỹac, ca' qaiyi quecaua'maxare qaica ca na'laañi. ₃₉Qai'neeta qaica ca mashic ni'chigui ca ñaaue lataxa, ime, ca' lotqai nishiitaque ca dalaxaic lataxa, ma' ca'maxare 'naac: “Na ñaaue lataxa paguec loyac.”