Josué 3

₁Ca' queso liỹa nete'e na' nete'etam, ca' so Josué chaqai sá'ogue so Israel llaalqaipi eec ca'e yi Sitim, ca' ỹovita aso lachiugue Jordán. Qam na' saqa' ỹapacta, ca' nco'matec. ₂Ca na' ime' saua tres na'xata', ca' so nashillipi queugui yi co'matqa'. ₃Ca' 'ue da naqataxac qoỹaanem so Israel llaalqaipi:

—Ma' huañii'tegue ana laqataxaco lahi' ñi qara'gaxala' qai'xateta quena qaretaxaỹaxanqajanqaipi quena' qaretaxaỹa'pegue' ñi qota'olec, ca' nenoxoñiuec, quiigue, coỹaritauo. ₄Qaiyi 'yiiñii cá'maq quii'tegue ma'le, ma' qaica ca caqamiri quiyim 'ue quet ca shi'gue que'tegue cajo ñicta. Qam mesqai ỹaatqajam leseequejlec nqai'ñii aso lahi' naua naqataxaco. Qaidaata quiyim chi coỹaritalec aso'maxare 'uo' ca mil metros nqai'ñii ca leseeque'ta'uegue.

₅Ca' so Josué 'naaco' queso qomyipi:

—Nco'taxachita, ma' ma' nete'e, ca huañiỹa ñi qara'gaxala' ỹo'uet ca se qaiuanapega.

₆Ca' quesaua netaxaỹaxanqajanqa 'naaco':

—Coñiỹot añi naqataxaco lahi', ca' paguiỹa'ta ana lachiugue, 'avita quena qomyipi.

Ca' saua netaxaỹaxanqajanqa ỹacontot aso naqataxaco lahi', ca' 'auesaxasom queso qomyipi. ₇Ca co'na'le, ca' ñi qara'gaxala' 'naaco' queso Josué:

—Taachi'ñi quenajo na'xa'a, ca' so'uet quiyim naua'que na'xata' nqo'neetauec paguec qaremaqachiñi' quena Israel llaalqaipi, qaiyi na'maxare iuana ma'le quiyim qami' iỹaatac, 'nejem dá'maq shintari' na'le queso Moisés. ₈Ca' qami' 'ñirapega na netaxaỹaxanqajanqaipi ná'maq i'xateta añi lahi' naua naqataxaco quiyim ma' ỹoviraxasom quena lahi aso Jordán, ca' nachajñi, hueetañigui yi huaxaỹaq caso lachiugue.

₉Ca' so Josué 'naac queso llaalqaipi so Israel:

—Nqo'ñiiuo, ca' na'xaỹaxañiỹa ca la'qaatec ñi qara'gaxala' qota'olec. ₁₀Dajo dá'maq netanec ma'le, qaiyi 'yiiñita quiyim ñi qota'olec ỹalequetauguilo qamiri, chaqai quecá'maq loxoỹa'gue, ñi'maxare i'leguec ma'le na Canaán laseripi, na hititaipi, na heveoipi, na ferezeoipi, na gergeseoipi, na amorreoipi chaqai na jebuseoipi. ₁₁Ñaqai 'ajñii, añí'maq lahi' naua laqataxaco ñí'maq la'gaxala' ná'ogue na qomyipi quena 'laua, pacta ma'le na Jordán, 'auetauec caqamiri. ₁₂Vichiguiño' nagui, ca' coñiu'alo caua doce ỹale', quiñi 'óna quecaua'maxare chigoqchiỹaugui na llaalqaipi naua doce llaalqa so Israel. ₁₃Chaqai ná'maq netaxaỹaxanqajanqaipi quená'maq i'xateta añi lahite' naua laqataxaco ñí'maq la'gaxala' ná'ogue na qomyipi quena 'laua, ca ma' co'viri'ñigui naua lapiaate' na huaxaỹaq, ca' aso lachiugue shicchigui ma'le na huaxaỹaq, ná'maq chicqashi'mquera qaguiguit, nachajñi, sqai eec.

_14-16Ca' so Israel llaalqaipi ca'e na lauootoripioqui' na'daañi, ca' eec, pacta aso lachiugue. Ca' 'auesauec saua netaxaỹaxanqajanqa i'xatete' aso lahite' naua naqataxaco. Qam so Jordán i'paxanleco' quen quena' ỹovita quiyim qanaqat ana nanecsec. Ca só'maq la'uaxac so huaxaỹaq qaguiguit, 'ec 'ue so lquepaxaset ỹoxe'ogam quiyi Adam yí'maq na'a' huaqate'e' ada na'ajnaxanaxalate Saretán. Qam na huaxaỹaq taỹaxaso'ma aso huaaxai leenaxat leuaxai, ca queeta, chi ỹovireta'a quiyim imeuo. Ca' na huaxaỹaq quesojo lachiugue secta'chi, ca' so Israel llaalqaipi pacta aso'maxare, ta'ajte'e yi nalo'ojta'a yi Jericó. ₁₇Sá'ogue so qomyipi pacta aso lachiugue leenaxat Jordán, qam so que'ejta'gue llima. Ca só'maq netaxaỹaxanqajanqaipi só'maq i'xateta aso lahite' saua laqataxaco ñi qara'gaxala' ỹaatqajam nachaachichiriñi quena lavinñi so Jordán quiyi 'laua ra'ñijlec.