Josué 24

₁So Josué lapoonta' sá'ogue so llaalqaipi so Israel quiyi Siquem. Ca' roỹaxana ná'ogue na qo'xoiquipi, na'gaxalateripi, chaqai na imitac na nasauaxaset, chaqai na liỹa nashillipi, ca ná'ogue nachaatou'a nqai'en ñi qara'gaxala'. ₂Ca 'naac quesá'ogue so qomyipi:

—Da la'qaatec ñi qara'gaxala', ñí'maq qota'olec quena Israel, 'neetasa': Nallaaqo' quesaua 'auaxaqa qata'allii Taré chaqai saua llaalqa Abraham chaqai so Nacor neeso'ot na lahi aso lachiugue Eufrates, nqouagaxainsacoto' quen na nashiilqaipi. ₃Qam ỹim ñaqata'a na'le so Abraham na' neeto'ot na lahi aso Eufrates. Ca' ỹouoxontac nqaishin na'le ná'ogue najo 'laua Canaán, ca 'ue na'le so llaalec Isaac. Ime na'le, ca' ñoquiigaxatetauec so llaalqaipi. ₄Ca' so Isaac sa'vii saua dos llaalqa, Jacob chaqai so Esaú. Ca' so Esaú saanem quiyim naalec yi 'laua 'xoic ana quemaralec qa' ladocai quiyi Seir. Ca' so Jacob chaqai so llaalqaipi taategue da Egipto. ₅Ca na'le, ca' selate' saua Moisés chaqai so Aarón. Ca' ñalauajñi so Egipto laseripi, vire'ta na' ñaqata'alo qamiri quiyi'maxare. ₆Ca na' so 'auaxaic qataa'illipi eec, ca'e yi Egipto, ca' so Egipto laseripi rocanaxan ỹahote'e ana nahoglena lauataxaqui chaqai na shipgaq, chi ỹoviretaxaso'ma aso huaaxai leenaxat toc. ₇Ca' so qomyipi na' roỹaxanot najo ra'gaxalari, ca ỹim sa'ue so napalaxa lodegaxat pa'aata'gue nqaishin da hueeta'gue so Egipto laseripi. Chaqai so'uet quiyim taalec so huaxaỹaq caso huaaxai so Egipto laseripi, ca' polec nqai'en. Ca' qamiri huañichigui dá'maq so'uet na'le quiyi Egipto.

Ca na' ime dajo, ca' qamiri shi'gom quiitalec yi 'laua qaica qom, ₈vire'ta na' ñauegalo qamiri na na'laua na amorreoipi pa'ỹa'gue da lqodoigue cana lachiugue Jordán. So'maxare nalauajto qamiri, qam ỹim so'uet quiyim qadoxoñiguii, ca' qamiri qaica ca viỹaque, ca' huootaxañiỹa'gue na na'laua.

₉Ime, ca' so Balac, llaalec so Zipor, lashi na Moab llaalqaipi, anac quiyim nco'ỹa'to qamiri. Ca' so Balac relaataxana so Balaam, llaalec so Beor, ma' ỹahotaque se no'uen ca la'qaatec inaxalgoto qamiri. ₁₀Qam ỹim sqai saxanegue so Balaam quiyim inaxalgoto qamiri ca la'qaatec se no'uen, ca' no'uen da la'qaatec taalgoto nqai'ne' qamiri. Ca' lotqai ñca'laxaterec qamiri.

₁₁Ca na'le, ca' qamiri paguiỹa'ta aso lachiugue Jordán, chaqai viriỹau'a yi Jericó. Ca só'maq neeta'ñi yi Jericó, amorreoipi, ferezeoipi, cananeoipi, hititaipi, gergeseoipi, heveoipi chaqai so jebuseoipi, so'maxare nalauajto qamiri. Qam ỹim so'uet quiyim qadoxoñiguii so'maxare.

₁₂Ca' saua dos lashil na amorreoipi mese qadoxonaxahi qamiri quenaua ro'goxonqachiri lecat chaqai na no'xoshic. Qam ỹim so'uet quiyim chalego da lqolonaxa caqamiri, ca so'maxare 'eet na' saqa' viriri'. ₁₃Ca' ỹim saanema qamiri ná'maq 'laua sqai ñiilec na'le aca qadañicshii, chaqai na 'imqaipi se no'xoñiishiguim na'le, qam nagui ñiitalec. Chaqai saanema qamiri ana nanecse 'uva chaqai ana 'oliva mesqai ñiiñi na'le, qam nagui a'guiitac.

Ca lotqai 'naac so Josué:

₁₄—Ca' vichiguiño' quedá'ogue dajo, ỹaatqajam ro'chiỹa ma'le ñi qara'gaxala', chaqai ỹaatqajam quiijlec. Ca' ỹaatqajam 'xañiñi na nqouagaxaintacot nqolaquipi so 'auaxaic qataa'illipi queda lahi yi Eufrates chaqai quiyi Egipto, ca' ỹaatqajam quiilec ñi qara'gaxala' qota'olec. ₁₅Qam no'm sqai 'maxariñii quiyim quiilec ñi qara'gaxala', ca' nagui, ca' nca'aiua'a cá'maq viitaque quiilec, na nqolaquipi ná'maq imaqachintac na'le so 'auaxaic qataa'illipi na' neetalec da lahi aso lachiugue Eufrates, loqo'm na lqolaquipi na amorreoipi, ná'maq ñiitañigui qamiri nagui. Qam ỹim chaqai na ỹaalqaipi qolaxalec ñi qara'gaxala' qota'olec.

₁₆Ca co'na'le so qomyipi 'naaco':

—¡Qomi' se seshitaq qolqa'e ñi qara'gaxala', qaica ma' qolaxague quet na nqolaquipi! ₁₇Ma' ñi qara'gaxala' chaqaiñi ñí'maq naqaterec qomi' na'le na' qomi' na'aqa quiyi Egipto. Chaqai ỹaatqajam seuanqachigui ná'ogue ná'maq ỹo'uet chalego lecaic se qaiuanapega, chaqai ñi'maxare ỹaatqajam quepaqataxanteguelgoto qomi' quena ñanaguinqata'gue chaqai quená'ogue na ỹoreta'oguit qomyipi ñanaguinqachigui. ₁₈Chaqai ñi'maxare peloguec ná'ogue na ỹoreta'oguit qomyipi sauaxate' qomi', chaqai ỹo'daauec na'le na amorreoipi neetalec na'le najo 'laua ná'maq senqatalec nagui. Vichiguiño' qomi' qai'neeta qolaxague ñi qara'gaxala', ma' ñi'maxare chaqaiñi ñí'maq qota'olec coqomi'.

₁₉Ca' so Josué 'naaco' queso qomyipi:

—Qamiri peeta'a sqai shichii quiilec ñi qara'gaxala', ma' ñi'maxare ỹaatqajam qota'olec co'teeta chaqai qaica ca ỹa'maxaren. Chaqai ñi'maxare se ishit quiyim na'ñaxachiguit na se no'uen chaqai na nasauaxaseteripi. ₂₀Qam no'm qamiri tot qoquiilec lachii ñi qara'gaxala', ca' quiigue na nqolaquipi, ca' ñi'maxare ishit ỹo'uet ca se no'uen caqamiri. 'Eno'm 'xoic da re'qoochigui lqouagaxa caqamiri, qam qaiyiita nalauachiñi qamiri ma'le.

₂₁Ca' so qomyipi 'naaco' queso Josué:

—Qomi' se seshitaq so'ueetaq da 'ñirac, qomi' qolaxague ñi qara'gaxala'.

₂₂Co'na'le, ca' so Josué 'naaco':

—Qamiri no'viñita'gue dá'maq ra'qaachiguii quiyim 'ñiỹac quiigue ñi qara'gaxala'.

Ca' so qomyipi 'naaco':

—Ajá'a, qomi' ño'uenqata'gue da qara'qaatec.

₂₃Ca lotqai 'naaco' so Josué:

—Cha'regue naxaiuec ná'ogue na nqolaquipi hueeto'oto qamiri ná'maq nqouagaxaiñitacot, qaiyi ỹaatqajam nachinchiriñi naua re'taxanatahi quiyim maqachiñitac ñi qara'gaxala' qota'olec quena Israel.

₂₄Ca' so qomyipi 'naaco':

—Qomi' qolaxalec ñi qara'gaxala' ñí'maq qota'olec, chaqai cá'maq ỹa'xat, ca' so'ueetaq.

₂₅Ca' quesojo na'xa'a quiyi Siquem so Josué ỹo'uet quiyim na'maxate'e' sá'ogue so qomyipi, ca' ỹaanougui da naqataxaquipi chaqai da nelaataxanaxaquipi. ₂₆Ca' ỹiriñi ná'ogue caso nelere laqataxaco lomalate ñi qota'a. Ime, ca' icona so qa' lodegaxat, ca' illo'ot aso qo'paq leenaxat encina, na'ñi yi qouagaxainqa' quena' qanqouagaxainot ñi qara'gaxala'. ₂₇Ca co'na' ime, ca' so Josué 'naapega sá'ogue so qomyipi:

—Najo qa' ỹaatqajam ỹa'deenta ná'ogue na la'qaatqaipi ñi qara'gaxala' ỹaanouguilo qomi' ma' ỹaatqajam 'qaachigui ná'ogue na na'qaatqaipi. Ca na'maxare ỹaatqajam ỹa'deente' qamiri, qaiyi qaica ca noqolliguit quiyim 'naac se ỹauanapega ñi qota'olec.

₂₈Ime, ca' so Josué ila' so qomyipi quiyim quiñi 'óna pila cá'maq chi lalamaxaret la'a'.