Da 'neeto' na' qanaqajñi so amorreoipi
1-2So Adonisedec, só'maq lashi yi na'a' lodegaxat Jerusalén, ỹaatqajam chalego lqolonaxa na' ỹa'den quiyim so Josué loxonec so Hai chaqai dá'maq 'ne'teco' na'le so'maxare chaqai quesó'maq lashi, ca chaqaido' dá'maq 'ne'teco' na'le yi Jericó chaqai so lashi, chaqai queso Gabaón laseripi huaqui'chiguit so Israel llaalqaipi, ca' nagui, ca' ỹalequeta'guita saua'maxare. Ca' queso'maxare, ca' ỹo'uet quiyim 'xoic da lqolonaxa, ma' yi Gabaón ỹaatqajam lodegaxat yi na'a', paguec lecaic quiyi Hai, chaqai ná'maq na'ñi yi'maxare ỹaatqajam 'ñaaxaiquipi. 3Ca' vichiguiño' so Adonisedec ỹa'ue so ila' la'qaatec quesaua nashil, Hohan na'ñi yi Hebrón, Piream na'ñi yi Jarmut, Jafía na'ñi yi Laquis, chaqai so Debir na'ñi yi Eglón, 'naaco':
4—Naiquena, yotauañii ñalauataxa'e' yi Gabaón, ma' na'deene'e' so Josué chaqai so Israel llaalqaipi.
5Ca' notauanta' saua cinco nashil amorreo lase': 'óna so na'ñi yi Jerusalén, chaqai saua liỹa' nera'ñi yi Hebrón, Jarmut, Laquis chaqai yi Eglón. Ca sá'ogue so nalliripi saua'maxare quepegue' nosoralec yi Gabaón quiyim nalauate'e'.
6Ca só'maq neeta'ñi yi Gabaón ila' da la'qaatec queso Josué neeta'ñi yi nco'matqa' quiyi Gilgal:
—Qaica ma' se qarotauañi' quet, ma' qomi' relaataxahi'. Se naỹaloxoriñi' quiyim qarotauañi', 'ootaxañirelgoto qomi', ma' ná'ogue na lashillipi na amorreoipi naalec ana quemaralec qa' ladocaipi, na'maxare notauanta' ỹahotaque nalauajto qomi'.
7Co'na'le, ca' so Josué eec, chicqochi'ñi yi Gilgal, liỹaatac so nalliripi 'ñaaxaiquipi. 8Ca' ñi qara'gaxala' 'naaco' queso'maxare:
—Totaxan ro'chita na'maxare, ma' ỹim saanec quiyim ná'ogue qadoxonqui', ca' qaica ca ishit nachaata'guit qami'.
9Ca' so Josué eec, chicqochi'ñi yi Gilgal, queetagui so pe. Ca' i'laxatejlec so amorreoipi. 10Ca' ñi qara'gaxala' ỹo'uet quiyim qano'daxatetec so Israel llaalqaipi. Ca' so Josué 'xoico' so ỹalauat quiyi Gabaón. Ime, ca' ỹocaneta queso nayic quiyi Bet-horón, ca' queeta da lalauataxanaxac quena amorreoipi, chi ỹovireta'a yi Azeca chaqai yi Maceda. 11Ca' so amorreoipi co'na' mashic qui'ñigui so ca'megue quiyi Bet-horón co'na' 'eetapeguem so Israel llaalqaipi, ca' ñi qara'gaxala' ỹo'uet quiyim anac aso qalachi. Ca' ỹaatqajam 'xoic so ỹalauat nqai'en, paguelec so ỹalauat queso Israel llaalqaipi.
12Ca co'na' ñi qara'gaxala' ỹaanec quiyim noxonec so amorreoipi queso Israel llaalqaipi. Ca' so Josué 'qaachigui nqai'en so qomyipi co'na' 'naac quiñi qara'gaxala':
“Qami' ra'aasa, vire'e ma' ralo'irelec yi Gabaón;
vire'e qami' shiraigo, ma' ralo'irelec yi ca'megue quiyi Ajalón.”
13Ca' ñi ra'aasa chaqai ñi shiraigo huere'e,
chi ỹovireta'a na' so Israel llaalqaipi nomajñi so npa'guenaxauaripi.
Ca' chaqaida 'neeta da la'qaataxanaxac aso lere lomalate na 'maxaraic da no'ueenataxac. Aso ra'aasa hua'e na'le quena lavinñi na piguim. Peeta'a ỹovi' ca 'óna na'xa'a se reda.
14Ca' dajo ỹaatqajam se qaiuanapega quedá'maq chicqota'gue chaqai dá'maq taỹa'gue ỹaatqajam qaica ca 'nejem sojo na'xa'a quiyim ñi qara'gaxala' na'xaỹaxana so ỹale, ma' ñi'maxare ro'ootaxanteguelec so Israel llaalqaipi.
15Ca co'na' ime dajo, ca' so Josué chaqai so Israel llaalqaipi pila yi nco'matqa' quiyi Gilgal.
(10.16—21.42 Ỹovirelec quiyim qanaqajñi yi Canaán. Qanasectaxachigui yi 'laua, ca qoỹaanougui so llaalqaipi so Israel.)
