Ñi qota'olec ỹa'maxarenta quiyim qai'guen so Job
1Quiyi 'laua leenaxat Uz 'uo' so ỹale leenaxat Job. So'maxare ỹaatqajam qaica ca se ỹa'maxañi queda no'ueenataxac, chaqai 'maxataxaraic, chaqai ỹaatqajam quejlec ñi qota'olec, chaqai netelañi quiyim ỹo'uet ca se ỹa'maxañi queca liỹa. 2So Job sieto' saua llaalqa chaqai tres saua llaale, 3chaqai siete mil aso lalo qagreta, chaqai tres mil aso nauaanaxanaxa late'e, chaqai mil so ledaxaqui ñii'lola, chaqai quinientos aso 'ashina, chaqai qai'neeta 'xoic so la'aquipi. So'maxare ỹaatqajam paguec nesallaxanec queda lqodoigue.
4Ca' saua llaalqa so Job na'ualtecto'o' quena' ỹo'ueetetac na lqui'ỹaxac, chaqai se coua'ahi saua tres lqaỹa' 'aalo quiyim ỹale'. 5Ca quena' ỹomate' da lqui'ỹaxague', ca' so Job roỹaxanouguilo saua llaalqa. Ca co'quena' nete'etam, ca' ne'laxashiguim, ca' ỹavigaxat añi lachitaxanataxanqate, 'onatac nqai'en quiñi 'óna llaalec, qaiyi co'it quena lasauaxaset. Ca' so Job se neme 'neeta'gue dajo, ma' sqoue quiyim 'ue ca llaalec se no'uen ca la'qaatec quiñi qota'olec pa'xantauo quena lauel.
6Ca 'uo' so na'xa'a quiyim quepegue' ñi qara'gaxala' so lelaatqaipi piguim laseripi. Ca qai'neeto' ỹoviro so na'ỹaapec só'maq viraqataxanaxai ỹalequetauguilo saua'maxare. 7Ca' ñi qara'gaxala' inato' na'le so'maxare, 'naaco':
—¿Negue' ca chicqoisa'gue?
Ca' so na'ỹaapec 'naaco':
—Chi souoxonta'pe naua lahil na 'laua.
8Co'na'le, ca ñi qara'gaxala' 'naaco':
—¿Mashic huañita ñi ilaatec Job? Qaica ca 'nejem ñi'maxare quena 'laua. Ñi'maxare ỹaatqajam quejlec aỹim, chaqai ỹaatqajam ỹaqamqata, chaqai ne'maxateta, qaica ma' ỹo'uet quet ca se no'uen.
9Qam so na'ỹaapec 'naaco':
—Se nodaachiguiñi quiyim ỹaatqajam ỹaqamqata quiyim ro'ueenataxantacot qami'. 10Ma' qami' qaica ca ỹoviro'ot nqai'ñi'; 'ootaxañiseguelec ñi'maxare chaqai na llaalqaipi. Ca' qaica ca ỹovira'a, chaqai no'ueenaxachi' ná'ogue ná'maq ỹo'uet. Chaqai ñi'maxare paguec nesallaxanec nqai'ñi' quena lalo quená'ogue na 'laua. 11Qam quiyim huootaxañira'gue ná'ogue ná'maq hueeto'ot, ca ma'le, ca 'yiiñi' quiyim se no'uen ca ỹa'xat caqami'.
12Ca' ñi qara'gaxala' 'naaco' queso na'ỹaapec só'maq viraqataxanaxai:
—Ỹa'maqachiguiñi. Cha'regue, 'viiquiñi'sac quecá'maq 'ñi'sa'gue ná'ogue ná'maq louenqaipi ñi Job. Qam ñi'maxare, ca' 'xañisac, se qa'vi'ra'gue.
Ca co'na'le, ca' so na'ỹaapec ca'e ñi qara'gaxala'.
13Ca 'uo' so na'xa'a na' so llaalqaipi chaqai so llaallipi so Job ỹo'uet so lqui'ỹaxac quiyi la'a' so lopiichi'. 14Ca 'uo' so ỹale ỹovira'a yi la'a' so Job, ỹodouo da la'xaỹaxac, 'naaco':
—Sasaugaxanqatac quena no'ueenaxa, qarasaugaxanaxaqui' saua ñii'lola, ca' aso 'ashinaipi que'eetac quena 'uaqapi quiyi sqoỹoqaque. 15Ca' chi ne'laqataxanto so Sabá laseripi, ca' rocacha so qalo'e'ipi chaqai ỹalauat so ỹalliripi, ỹahote'e na lecat. Qaỹimeta qayayit, ca' ñanaiquena sa'ue ra'xaỹaxaqui'.
16Ca na' saqa' ỹomat da ỹa'xatetac sojo ỹale, co'na' noviro so liỹa. Ca 'naaco':
—Nimiichiguiñi so neloxoỹaripi cana qagreta, qanouaxañi'ña caso soxonaxa. Qaỹimeta qayayit, ca' ñanaiquena sa'ue ra'xaỹaxaqui'.
17Ca ñaqai saqa' ỹomat da ỹa'xatetac so ỹale, co'na' noviro so liỹa, ca 'naaco':
—Tres lapooqote' so Caldea laseripi queu'alo qomi', ca' rocacha i'xat so nauaanaxanaxa late'ellipi, ca ỹalauat so ỹalliripi, ỹahote'e na lecat. Ca qaỹimeta qayayit, ca ñanaiquena sa'ue da ra'xaỹaxaqui'.
18Ca' ñaqai ra'qaataxantac so ỹale, ca' lotqai noviro so liỹa ỹale, ca lotqai 'naaco':
—Saua qachaalaxahi' chaqai saua qachaalli' ỹo'ueetesac so lqui'ỹaxague' quiyi la'a' so lopiichi'. 19Na' novi' so nonot chicqo'tegue da pa'a'gue yi 'laua qaica qom, ca i'guenaxajñi so 'imec, ca pataqañi nqai'en sá'ogue so qachaalaxai'ipi, ca' qaỹimeta yayit, ca' ñanac sa'ue da ra'xaỹaxaqui'.
20Ca' so Job mashic paguec da nqui'ic, ca ne'laxashiguim, ca nasectaqta'ahi saua loho, ca ỹoselaxajlec na lqahic, ca ỹa'chi'iñi naua le'cootal, ca nqouagaxainot ñi qara'gaxala'. 21Ca 'naaco':
—Sentauec na' ñovita na 'laua, ca' chaqaida shintari' ma' shique'e. Ñi qara'gaxala' nañaañim ná'ogue ná'maq ỹouenqaipi. Ca ñi'maxare icona liỹa ná'ogue. ¡Ca' da leenaxat ñi qara'gaxala' chaqaidaata 'neetari' qaimaqachintac!
22Ca quedá'ogue dajo so Job qaica ca lasauaxaset, chaqai qaica ca la'qaatec se no'uen quiñi qota'olec.
