Juan 18

₁Ca co'na' ime 'naac dajo, ca' so Jesús eec, nauequetecto saua lapaxaguinatqa, taita'gue da laseego so ñaachi leenaxat Cedrón. Hua'ño'yi so nanecse loma', ca' so Jesús taugui, liỹaata'pe saua lapaxaguinatqa. ₂So Judas só'maq ỹahotaque ỹaano so Jesús qai'neeta iuana so nanecse loma'. Ma' so Jesús 'xoico' quen hueeta'ñi yi'maxare, lapoota'guita saua lapaxaguinatqa. ₃Ca' so Judas ỹovira'a yi'maxare. Qam 'ue so nalliripi chaqai saua nouaataxanaq lase' neloxoỹa' cañi no'ueenaxanaxaqui qanelarerec queso lashillipi na netaxaỹaxanqajanqaipi chaqai na fariseoipi. Qam ỹaatqajam naloochiguiñi na lo'goxonqateripi, chaqai ne'xateta na lcoỹeraxanqateripi. ₄Qam so Jesús ma' mashic ỹa'deentari' dá'ogue dá'maq 'neeta ma'le, ca ca'guit, ca inato', 'naaco':

—¿Negue' cá'maq daañitaque?

₅Ca saua'maxare 'neraco':

—Sedaanqataque ca Jesús, le'ec yi Nazaret.

Ca' so Jesús 'naaco':

—Chaqaỹim na'taxare.

Ca' so Judas só'maq ỹaano so'maxare, ỹalequetauguilo saua'maxare. ₆Ca co'na' so Jesús 'naac: “Ỹim na'taxare”, ca saua'maxare qoshii', ca sá'ogue huaañi. ₇Ca lotqai liỹa inate' so Jesús saua'maxare:

—¿Negue' cá'maq daañitaque?

Ca saua'maxare 'neraco':

—Sedaanqataque ca Jesús, Nazaret le'ec.

₈Ca so'maxare 'naaco':

—Shi'gue shinac caqamiri quiyim chaqaỹim. Ca no'm daañitaque aỹim, qam 'xañiuec na iỹaripi ñaqai eec.

₉'Naaco' dajo, qaiyi ipaquichigui dá'maq 'naaco' na'le so Jesús: “Quená'maq nañaañim ñi qota'a, qaica ca na'laañi.” ₁₀Co'na'le, ca' so Simón Pedro, ma' 'uo' so lecat, ca no'viguishiguimo', ca ỹouaxanec aso loicse lque'la so leenaxat Malco. So'maxare lelaatec so la'gaxala' na netaxaỹaxanqajanqaipi quena' qaretaxaỹa'pegue' ñi qota'a. ₁₁Qam so Jesús 'naaco' queso Pedro:

—Liỹa pilaxachirigui shichirigui aca lahi' na lecachi'. Ma' no'm ñi qota'a ỹovirau'a nqai'en da ñi'guenaxac, 'ec nqai'en aca naqana chim, ca' ¿se ipaguigui quet nqaishin da'maxare?

₁₂Co'na'le, ca so neetaho nouaataxanaq, liỹaatac so lashi, chaqai so nouaataxanaq quena judioipi, iconlec so Jesús, ca' coñite' naua laua'. ₁₃Co'na' ime, ca qaỹauegueu'a yi la'a' so Anás. Ca so Anás chi ladonaxanec so Caifás, ca chaqaiso' só'maq lashi na netaxaỹaxanqajanqaipi queso ñaaxa. ₁₄Chaqaiso' so Caifás só'maq 'naaco' na'le queso judioipi quiyim paguec la'maxa queso qomyipi quiyim 'oonoqui' ca qom ileualec na lauo' laseripi.

₁₅So Simón Pedro chaqai so liỹa napaxaguinatec co'uaatesalec so Jesús. Ca' so liỹa napaxaguinatec lauanatec so lashi na netaxaỹaxanqajanqaipi. Ca vichiguiño' so'maxare liỹaataho so Jesús quiyim inoxona'a yi nasoxoc so nashi. ₁₆Qam so Pedro no'ueena'oga ñi lasom, pa'aatauec. Ca' quedajo, ca nenoxonec só'maq lauanatec so lashi na netaxaỹaxanqajanqaipi. Ca 'naapego' aso neloxoỹaxa quiñi lasom quiyim inoxonaqto so Pedro. ₁₇Ca' so neloxoỹaxa quiñi lasom inato' so Pedro:

—¿Mesqai qami'o' qai'neeta lapaxaguinatec sojo ỹale?

Ca' so Pedro 'naaco':

—'E', mesqaỹim.

₁₈Qam 'xoico' ca no'oomaxa na'le, ca' so nelaatqaipi chaqai so nouaataxanyipi ỹo'ueeto' so lole', ca sá'ogue netontac, qam nachaatetañi. Ca' so Pedro ỹalequetaugui qai'neeta so qomyipi, netontac queso norec.

₁₉Ca só'maq lashi na netaxaỹaxanqajanqaipi inatetac so Jesús negue' sauá'maq lapaxaguinatqa, chaqai negue' cá'maq rapaxaguinataxanta'pegue. ₂₀Ca' so Jesús 'naaco':

—Aỹim ỹaatqajam ñachaxanta quená'ogue na qomyipi quena' setaqa, ca chaqai shintari' quena' sapaxaguinataxan cana lapoxoqui na judioipi chaqai cañi no'ueenaxanaxaqui quena Jerusalén, ñí'maq lapoxoqui ná'ogue na judioipi. Ca' ỹim qaica quet cá'maq ỹa'qaatec soxotetañi. ₂₁Ca' ¿chi'negue ma' yinachi'sac? Nachi' quet ná'maq na'xaỹaxantapiguiỹa', ca na'maxare ỹa'xat cá'maq 'neeta ca ỹa'qaatec. Ma' na'maxare ỹa'den dá'maq sa'xatetac quen.

₂₂Ca co'na' so Jesús 'naaco' dajo, ca' so nouaataxanaq le'ec ỹalequetaho ma' neloxoỹaq cañi no'ueenaxanaxaqui, ỹouaxañigui na lashic so Jesús. Ca 'naaco':

—¿Dajo 'ñirac quiyim pilaxachichiguit da la'qaatec ñi lashi na netaxaỹaxanqajanqaipi?

₂₃Ca' so Jesús 'naaco':

—No'm 'ue ca ỹa'qaatec se ỹa'maxañi, ca 'xachi' cá'maq 'neeta cá'maq se ỹa'maxañi. Qam no'm ỹa'maqachiguiñi dá'maq shinac, ca' ¿chi'negue ma' youaxañi'?

₂₄Ca' so Anás ila' so Jesús coñireta'ta' nqai'ne' naua laua', ilata so Caifás, só'maq lashi na netaxaỹaxanqajanqaipi.

₂₅Ca so Pedro ñaqaida nachaatetañi netontac queso norec. Ca lotqai liỹa qainat, qohinaco':

—¿'Eco' qami' qai'neeta lliquisaugui so lapaxaguinatqaipi da ỹale?

Ca so Pedro noqollictegue, 'naaco':

—'E', mesqaỹim.

₂₆Ca lotqai qainato' queso lelaatec so lashi na netaxaỹaxanqajanqaipi só'maq chi lauo' le'ec so ỹale só'maq so Pedro nouaxanec na'le aso lque'la:

—¡'Eco' seuana qami' na'le quiyi nanecse loma' riỹa'isac da'maxare!

₂₇Ca lotqai liỹa noqolliguit so Pedro. Ca' quiyi, ca noỹeno' so huaqa'e.

₂₈Ca' so Jesús qaỹachigoxochichi'ñi yi la'a' so Caifás, ca qaỹauegueu'a yi la'a' so nashi Pilato. Qam mashic richiitegueñi, ca' so judioipi se inoxona'a yi nasoxoc so nashi, ma' ỹouetete'e quiyim napio'xot da nachaalataxac. Ma' chi no'ueenataxac dajo, ma' no'me', ca se ishit que'e queso na'ic hueetougui so na'xa'a quena' qaỹo'leente so na'xa'a quena' qoyique'e yi Egipto. ₂₉Vichiguiño' so nashi Pilato nenoxonec, ca inato' so qomyipi, 'naaco':

—¿Negue' cá'maq maxaiteguelec quiyim lasauaxaset da ỹale?

₃₀Ca 'naaco' so qomyipi:

—Quetqai mesqai sauaqhuaic, ca se ñauegaxau'a quet qami'.

₃₁Ca 'naaco' so Pilato:

—Viguii qamiri da'maxare, ca' dohilec ná'maq naqataxaquipi hueeto'oto qamiri, ca' chaqai michii qamiri.

Ca' so judioipi 'naaco':

—Qam ma' qomi' judío lase' qaica ca qana'qaatec quiyim 'ue ca salauataq.

₃₂Ca' queda, ca ipaquichigui dá'maq 'naaco' na'le so Jesús quedá'maq 'neeta ma'le quiyim ileu. ₃₃Ca' so Pilato lotqai liỹa inoxono quiñi lauo', ca roỹaxane'oga so Jesús, ca inat:

—¿Qami'o' na' qami' lashi na judioipi?

₃₄Ca' so Jesús 'naaco':

—¿Dajo chi renataxanaxaqui', loqo'm 'ue ca liỹa la'qaataxanaxac caỹim?

₃₅Ca' so Pilato 'naaco':

—¿Qa' ỹim quet judío le'ec? Ná'maq chi qauochi' laseripi chaqai na lashi na netaxaỹaxanqajanqaipi, ca chaqaina ná'maq ỹaano qami' caỹim. ¿Nega'ỹo' cá'maq 'viichi' se ỹa'maxañi?

₃₆Ca' so Jesús 'naaco':

—Da ỹo'ueenataxanaxac quiyim ỹim nashi sqai huelec na 'laua. Ma' queta' chaqaida 'neeta, ca ná'maq coỹareta'pegue' aỹim shi'gue quet nco'ua nco'uahilec, qaiyi se qayayaano quena judioipi. Qam dá'maq ỹo'ueenataxanaxac quiyim aỹim nashi sqai huelec na 'laua.

₃₇Ca' so Pilato 'naaco' queso'maxare:

—¿Ca' llic quiyim ỹaatqajam qami' nashi?

Ca' so Jesús 'naaco':

—Ỹim nashi, chaqaida dá'maq 'ñirac. Ñanaỹa na 'laua na' ñi'qaañi, ma' sahotaque sa'xat dá'maq lliqueta. Ca ná'ogue ná'maq huelec dá'maq lliqueta, ca na'xaỹaxana dá'maq sa'xat.

₃₈Ca' so Pilato 'naaco':

—¿Chi negue' cá'maq lliqueta?

Ca co'na' ime da lenataxanaxac, ca' so Pilato liỹa inoxone'oga so judioipi, ca 'naaco':

—Ỹaatqajam qaica quet cá'maq sanata lasauaxaset dajo ỹale. ₃₉Qam qamiri 'ue da qatoiguii quiyim 'ue ca sosouec quena ncoñiitecseripi quena' ỹovire'oga yi na'xa'a quena' qaỹo'leente ca na'xa'a quena' qoyique'e yi Egipto. ¿Viitaque quiyim sosouec da lashi na judioipi?

₄₀Ca lotqai sá'ogue ỹaualqagui, 'naaco':

—¡'E', mesqai so'irec dajo ỹale! ¡Ta'ta'a ca Barrabás so'irec!

Qam so Barrabás cuataxai.