Qaỹa'xateta'guit quiyim qanca'laxatec yi Israel
1Ñi ne'espíritu ñi qara'gaxala' hueetalec aỹim,
ma' ñi qara'gaxala' ỹim lca'acsec,
ca' yila' quiyim sa'xatem da no'uen la'xaỹaxac na 'xoraiquipi,
sotauan ná'maq 'ue na leuogoxo,
sa'xat quiyim qaỹosouec na ncoñiitecseripi;
2sa'xate' naua na'xata' lqouagaxaqui' ñi qara'gaxala',
ca na'xa'a quiyim ñi qota'olec coqomi' ỹa'ue qarovi' quena qanpa'guenaxauaripi.
Yila' quiyim llo'daxachigui lauel ná'ogue ná'maq rachicota,
3ca' 'ue ca saanem na noỹentagui quiyi Sión:
da lachicoxo ñigui nqaishin da netoonaxac,
da oỹenaxac ñigui nqaishin da naỹaac,
da lachitachic ñigui nqaishin da no'ueenaxanaxac.
Na'maxare 'neetari' ana qo'paq lanecse ñi qara'gaxala' qota'olec,
ma' ỹahotaque ỹachaxan da lquesaxanaxa.
4Liỹa qano'xonshiguim na na'aateripi
ná'maq shi'co' quen 'guiñi, qanopoxoỹaxajñi.
5Na ỹoqa'a chicqa'gue qomyipi reloxoỹa'a ma'le
ana qalohi qagretaipi, na na'lauahi chaqai na qadanaxanqari 'uva loma'.
6Chaqai qaỹamata'guelo qamiri ma'le netaxaỹaxanqajanqa quiyim qaretaxaỹa'pegue' ñi qara'gaxala',
lelaatqa ñi qota'olec coqomi'.
Ca coñiguit ma'le da lesallaxa na liỹa ỹoqa'a qomyipi,
ca' no'viichiigui ná'maq no'uen looỹac na'maxare.
7Ma' na ỹalamaxareteripi 'xoic na'le da le'xoric
ma' ỹaatqajam se qanqo'ta chaqai qanoquiaatapega,
vichiguiño' quená'maq chi la'a' na'laua,
ca' paguec ca icoñiguit nesallaxa,
ca' 'ue da netoonaxac qaica lqodoc ma'le.
8Ma' ñi qara'gaxala' nqo'ta dá'maq ỹa'maqachiguiñi,
ca' se nqo'ta da nocataxac chaqai da nalauataxanaxac.
Ca' ñi'maxare ỹaatqajam ỹaqamaxateta ỹaanem aca nishiuete na lalamaxareteripi,
ca ỹa'ue ma'le ca na'deenaxac quenaua'maxare sqaica lqodoc.
9Na llaalqaipi ỹaatqajam choxoraic quena ỹoreta'oguit qomyipi;
ná'ogue ná'maq iuana chaqa'ma' ỹa'den
quiyim ñi qara'gaxala' no'ueenaxat da no'ueenataxac.
10Chalego da la'maxa iuel
chaqai 'xoic da ñitoonaxac quiñi qara'gaxala' qota'olec,
ma' ñi'maxare 'xoic da lotaanaxanaxac caỹim,
¡ỹaatqajam ỹa'ue da ỹoxonaxanaxac!
Shinta ca sham shilo quena' no'ueet ỹanñi aca no'uen nado'o,
chaqai aca 'aalo sham shilo ỹañiñi naua no'ueetqate'.
11Ma' 'ec aca nanecse quena' ñaxajshiguim quena 'laua
chaqai quena no'ualauec na llaxataxa na nanaxanqa',
ca' chaqaida 'ne'tegue ñi qara'gaxala' quiyim 'ec ñaxatec nqai'en da loxonaxanaxac,
ca' ná'ogue na ỹoreta'oguit qomyipi ỹo'uen ca no'ueenec imaqachintac ñi'maxare.
