Isaías 28

₇Chaqai 'ue na liỹa rapaqategueri' nqohin quena lataxa,

chaqai 'ue na qoñicqojlec sauaxat da lquesaxanaxa na lataxa:

na netaxaỹaxanqajanqaipi chaqai na letaxaỹaxaquiripi ñi qota'olec rapaqatajlec

sauaxat da lquesaxanaxa ná'maq ne'teetapigui,

na'laxatañi yi la'deenataxanaxac sauaxat na lataxa;

huaañi sauaxat da lquesaxanaxa na ne'teetapigui,

chi rapaqategueri' ỹit quena' 'ue da leuanaxanaxac,

se nachiñigui ca llicyaxac ca 'neeta quena' imit ca nasauaxaset.

₈Naua'que na lqui'ỹaxalate' qaica ca lco'taqa',

no'qajlgoto quena nesalaxat.

₉Quena' retaqatapigui aỹim, ca 'naac:

“¡Naiquena ỹahotaque 'ue ca 'naapegalo qomi',

ỹapaxaguineguelo qomi' cá'maq ỹachaxantac ñi qota'olec!

¡Mashic 'ec qomi' ñaaqaipioqui' nqai'en,

₁₀mashic 'ec chita'gue sa'deenaq setaxaỹaxalec aca lere,

se no'uene'ueque naua qara'qaatqa!”

₁₁Hua', ca no'm se na'xaỹaxañii,

ca 'vii ma'le caua na'qaatqa sqa ỹaataxa'ueguelo ỹoqa'alo na'qaatqa,

chaqaida 'neeta'gue ca letaxaỹaxac ñi qota'olec quenajo qomyipi.

₁₂Shi'gue 'neetapegalo qamiri quesom:

“Hua'ñi najo, ca' lo'yiiñi,

hua'ñi najo, ca' nco'machiuec;

ca nco'matec queda lesoochi ca soochaxaic.”

Qam se na'xaỹaxañii.

₁₃Vichiguiño' ñi qara'gaxala' ma' retaxaỹa, 'neeta'gue meca noctoqui'

quiyim chita'gue ỹahotaque ỹa'den lere.

Qaiyi ma' eec qaua, ca' reloxoỹashiguim,

ca' coñiraq, co'ỹaañigui aca noqoina,

ca chaqa'ma' neetagui.

₁₄Vichiguiño' ñaq na'xaỹaxañiỹalo naua la'qaatqa ñi qara'gaxala',

qamiri ỹalliripi se ra'maqataxan,

qamiri lashillipi na qomyipi quena Jerusalén.

₁₅Qamiri 'ñiỹac:

Qomi' shi'gue ña'deenaxa'e' so nelauaxa,

ña'maxataxa'e' só'maq ỹoiquentac na leuaxaiquipi,

qaiyi ma' naguelecna ca ne'xoric,

ca' se ỹovitalo qomi';

sedaanqaque quiyim ñañoxotaxaugui da na'maachic,

se'guenaxaugui da nayinaxanaxac.

₁₆Vichiguiño' ñi qara'gaxala' 'naac:

Sa'ue ma'le ca qa' sella'ñi yi na'a' Sión,

cajo qa' ỹaatqajam nca'acsec, 'xoic lesega'a,

ca'maxare qaỹa'auaxanñi qa',

ca ỹa'maqachiguiñi quiyim qanoqojshiguim qaỹo'xon.

Ca cá'maq pi'ỹa'a ma'le, ca' qaica huapigui lauel i'maqatapeuc.

₁₇Ca' quecajo qano'xonshiguim quiyim ỹalamqachiguiñi nqaishin sahote'e da 'maxaraic no'ueenataxanaxac,

chaqai quiyim qanaloqojonta' sahote'e da 'maxataxaric.

Ca cá'maq 'xachitac nañoxochiugui,

daañitaque nañoxochiugui da na'maachic

qaỹopoxoỹaxachigui ma'le caca qalachi,

ca' ca huaxaỹaq i'paxanlec nqai'en ca re'guenqari.

₁₈Se ipac ca na'deenaxaguii queso nelauaxa,

qaica ca 'negue ma'le ca na'deenaxaguii queso loiquenatec da nelauaxa.

Chalego ma'le ca re'xoriguii,

ca' rpataxaiñi ma'le ca'maxare.

₁₉Ca' quiyim novitalo qamiri, ca rauogolliñitac.

Naua'que naua nete'etari noviretapegalo qamiri quiyi na'xa'a chaqai yi pe.

Ca noma' chaqai 'xahiỹa'guit, ca chaqa'ma' re'loxolqachichii.

₂₀'Ec quiyim nenanñi, qam se ladoguelec ca lomala',

chaqai napootapi'ña ca se ladoguelec nepo'oqui'.

₂₁Ñi qara'gaxala' ma' ro'ueenataxan 'ec nqai'en na'le cada qa' ladocai Perazim,

ma' pa'aauo reloqui 'ec nqai'en na'le quiyi ca'megue Gabaón,

quiyim ỹo'uet da lo'ueenataxanaxac, 'eno'm 'ec ỹoqa'a,

quiyim ỹomat dá'maq ỹo'ueetetac, 'eno'm 'ec se re'xogui.

₂₂Ca' chaqaida, ca' ¡'xañiñi quiyim 'ue ca re'naxantac!,

'neeto' lotqai caua riquiichiri paguec ỹaueguero;

ma' sa'qa'ta ñi qara'gaxala' sqaica lqalanec

shi'gue ỹaanec da la'qaatec quiyim qanomachichiguiñi ná'ogue na qomyipi quena 'laua.