Oseas 11

₁Ca na' ñaqai 'ec ñaaqaipioqui' so llaalqaipi so Israel,

ca ỹim se'xorentac;

ca so'maxare, ma' ỹaalec, ca' soỹaxana'a quiyi Egipto.

₂Qam na' paguec soỹaxantapega,

ca' paguec nqo'neetauec caỹim.

Na ỹalamaxareteripi copata'a na lachitaxanataxanaxat quená'maq 'naac qota'olqaipi,

chaqai ỹa'ue na lichiinaxanaxat quena lashiilqaipi.

₃Qam quedá'ogue dajo ỹim sashaxantac so llaalqaipi so Efraín,

ca' sapaxaguinegue da llicyaxac,

qam so'maxare se ỹa'yiiñiguit quiyim ỹim ná'maq scochiitapega.

₄'Ec lepateta'gue ca la'na'gue nqaishin da lesotaxa da icochaxac

chaqai 'ec lequeete' da i'xorenataxanaxa,

ca' ñauega'a aỹim;

leseequete'oga nqaishin quenaua ỹashilque,

'ec nqaishin ca noctoqui' ñaqai llipetac;

ñqai'guiñi, ca' saanem ca lepetaxanaxat.

₅Qam yi'maxare se ỹa'maxaren rapilliua'.

Vichiguiño' pila ma'le nqaishin yi Egipto,

chaqai qoỹoiquentac ma'le quiyi Asiria.

₆Ca lecat taalgoto ma'le naua na'aate' quiyi'maxare,

chaqai qai'guenaxajñi ma'le na lquepaqataxanaxat,

qanopoxoỹaxajñi, sauaxat dá'maq na'deenaxac ỹo'ueetetac.

₇Na ỹalamaxareteripi ipaqueteguelec quiyim noỹootec caỹim;

ỹalamaxatashiguim da laualaxac,

qam qaica ca ỹotauan.

₈¿Negue' cá'maq shinta'gue quiyim saxanñi qami' Efraín?

¿Negue' cá'maq shinta'gue quiyim salachi' qami' Israel?

¿Seshito' quiyim ñopoxoỹaxajñi qami', 'nejem dá'maq shine'tegue na' ñopoxoỹaxajñi yi na'a' Adma,

loqo'm sa'ue ca nouaxanaxashichi', 'nejem nqaishin dá'maq shine'tegue na'le yi na'a' Zeboim?

¡Añi i'taxanata 'ue da lachitachic,

ma' 'ue da lqouagaxa caqami'!

₉Mese ipaguigui nqaishin dá'maq 'neeta da ỹonogoxonaxac;

tot liỹa ñopoxoỹaxajñi yi Efraín,

ma' ỹim, ỹim qota'olec, mesqai ỹim qom.

Ỹim ná'maq ỹim sco'teeta, ỹim sentañigui naua lavilliñi' qamiri,

chaqai se ñanac quiyim 'ue ca ñopoxoỹaxajñi.

₁₀Yi'maxare quegue ma'le ñi qara'gaxala',

chaqai ñi'maxare ronoqo 'ec ca sauaxaic leta'a.

Ronoqo quená'maq lalamaxareteripi,

ca na'maxare i'loxolta'guit, chicqa'gue da lauashiguim.

₁₁'Nejem ana qo'oole nanac i'loxolta'guit chicqa'gue da Egipto;

'ec na coviguiñic ma'le chicqa'gue da Asiria;

ca' so'uet quiyim liỹa nauguilo naua lauori.

Ỹim na'gaxala', se'taxajñi da ỹa'qaatec.