So Judá chaqai aso late Tamar
1Ca' quesojo ñaaxa, ca' so Judá ca'e so lqaỹaripi, ca' quepegue' yi la'a' so ỹale leenaxat Hira, naugui yi na'a' leenaxat Adulam. 2Hua'ño'yi, na' iuana aso llaale so ỹale Canaán le'ec leenaxat Súa, ca louo' na'le. Ca co'na' mashic loua, 3ca aso'maxare 'mano'. Ca 'uo' so llaalec, ca ỹanco' leenaxat Er. 4Ime, ca lotqai liỹo' 'man, ca 'uo' so liỹa llaalec, ca ỹanco' leenaxat Onán. 5Ca lotqai liỹo' 'ue so llaalec, ca ỹanco' leenaxat Sela. So'maxare ne'qaaño' co'na' so Judá neeta'ño' yi Quezib.
6So Judá ỹo'naxano' só'maq ỹi llaalec leenaxat Er caso 'aalo leenaxat Tamar. 7Qam ñi qara'gaxala' se nqo'to' dá'maq no'ueenataxac so Er, ca' icona da nachaalataxac. 8Ca' so Judá 'naapego' so llaalec Onán:
—O'ñichiguit añi pa'ỹe añí'maq loua na'le yi ropiichi'i'. Repaquichichiguit quiyim roua'e', qaiyi yi rqaỹa'e' 'ue aca llaqtaxai chicqochigui qami'.
9Qam so Onán ỹa'den quiyim ne'qaañi ca llaalec, ca 'ec se lalamaxaret llaalec. Ca' vichiguiño' quena' viguit aso pa'ỹe ỹahotaque ca la'maqa' quiyim sqai 'man aso'maxare, qaiyi cá'maq lqaỹa qaca aca llaqtaxai chicqaugui so'maxare. 10Ca' ñi qara'gaxala' se nqo'ta qai'neeta dá'maq 'neetari' so Onán, ca' qai'neeta icona da nachaalataxac. 11Co'na'le, ca' so Judá 'naaco' caso late Tamar:
—Quirepegue' yi la'a' ca qataa'i', ca ñira'ñi. Qam chaqai 'ñi'sari' qami' pa'ỹe, sqo 'ñi', toco' ma' ỹi ñi ỹaalec Sela, ca roua'e' ma'le.
Qam so Judá 'neetapigui lauel quiyim qai'neeta ileu ma'le so llaalec Sela, 'nejme' da 'neete' saua lqaỹa'. Ca' aso Tamar quepegue' yi la'a' so leta'a.
12Ca co'na' mashic 'vii saua ñaxari, ca ileuo' aso loua so Judá, asó'maq llaale so Súa. Ca co'na' ime'uegue so lasouaxac so Judá, ca quepegue' yi na'a' leenaxat Timnat, yí'maq hueeta'ñi na nepetquetac ana lalo qagreta. Ca qaicoỹa' queso nauochaxaua leenaxat Hira, adulamita le'ec. 13Ca co'na' aso Tamar ỹa'den so ni'ỹoqo' taigue da Timnat quiyim nepetec aso lalo qagreta, 14ca' aso'maxare naqate' saua loho netanqa quiyim pa'ỹe. Ca' ỹa'ue so napoxoqui, qaiyi qaica ca no'uenegue. Ca' nqa'xanñi, ñiichi'ñi na lahi so ñigo quiyi na'a' leenaxat Enaim. Yi'maxare neeta'ñigui na lahi so nayic taỹa'gue da Timnat. 'Ne'teco' dajo aso'maxare, ma' retano' quiyim mashic ỹi so Sela, qam se qaỹo'naxañiguit aso'maxare.
15Ca co'na' so Judá iuane'ta, ca 'neetapego' nanatqa lo'o', ma' ỹapootalco' na lqahic. 16Ca ỹoqta'a, ma' ỹahotaque nqo'neu'a aso'maxare, qam ma' se ỹa'den quiyim chaqaso' aso late. Ca 'naaco' caso'maxare:
—¿'Maxariñite' quiyim sahoqe ca qaranatec?
Ca aso'maxare renataxano':
—¿Negue' cá'maq nañaañi', no'm sahoqe ca qaranatec?
17Ca' so Judá 'naaco':
—Sa'uo' ca 'óna quetaq ñilata qami' ma'le queso iloipi.
Ca aso'maxare 'naaco':
—Hua', ỹa'maqachiguiñi. Qam vite ca no'ueenaqchirañi quenaua rouenaxahi', toco' ma' ỹovita quiyim nelachi' ca'maxare.
18Ca' so Judá 'naaco':
—¿Negue' cá'maq vi'saque quiyim ño'ueenaqtañi?
Ca aso'maxare 'naaco':
—Ỹim sahotaque quiyim no'ueenaqchirañi ana retanaxanqachi'i' quena' 'chiriñi ca qadeenaxachi', liỹa'uegue' na lequet, chaqai ana rashillichi'i' lo'qo'isa'a.
Ca' so Judá ỹaane' saua'maxare, ca nenañi'ñi' aso'maxare. Ca' i'manqachitañi. 19Ca co'na' ime, ca' aso Tamar naqate'e so napoxoqui lapooque' na lqahic. Ca' ỹañiñi saua loho netanqa quiyim pa'ỹe.
20Ca co'na' mashic shi'gom, ca' so Judá ila'o' so quetaqoqui', ilategue so nauochaxaua adulamita le'ec, qaiyi aso 'aalo ỹopilaxate' saua louenqa. Qam so nauochaxaua tot ỹanata aso 'aalo. 21Co'na'le, ca inato' só'maq qomyipi na'ñi yi'maxare, 'naaco':
—¿Negue' ca neeta'gue aca 'aalo nanatqa lo'o' na'ñi na Enaim, cá'maq neetau'e na'le na nayic lahi?
Ca saua'maxare 'neraco':
—'Taque', quenajo qaca aca 'aalo nanatqa lo'o'.
22Co'na'le, ca so'maxare pila yí'maq neeta'ñi so Judá, ca 'naaco':
—Se sanata acá'maq 'aalo. Chaqai yí'maq qomyipi na'ñi yi'maxare 'naac quiyim quiyi'maxare qaca aca 'aalo nanatqa lo'o'.
23Ca 'naaco' so Judá:
—Hua', ca chaqai hueeto'oto' caua ỹouenqa aca'maxare, qaiyi qaica cá'maq i'neeta'pe qomi', qam qaiyi qaỹa'deenta quiyim aỹim mashic sela' so quetaq, qam qami' sqa nachita.
24Ca co'na' mashic ỹovirerec saua tres shiriguiri, ca 'uo' so la'xaỹaxac so Judá. Qohinaco':
—Añi rachi'i' Tamar 'uo' ca lapaatapi'ñi' liỹa ỹale, ca' nagui 'manaxai.
Ca' so Judá ỹaualaq, ca 'naaco':
—Vigue'oguiyi, ca' copachiu'a.
25Ca co'na' mashic qaỹaueguec aso'maxare, ca ilato' da la'qaatec so ni'ỹoqo', 'naaco':
—Cá'maq louenqa nauajo, ca' chaqaica cá'maq yi'manqachit. Ñaqai 'ajñii' negue' cá'maq louenqa nauajo ana netanaxanqate chaqai na lequet chaqai ana nashilete.
26Ca' so Judá co'na' no'ueneguelo sauá'maq chi louenqa, ca 'naaco':
—Ỹaatqajam paguec ỹa'maqachiguiñi dá'maq 'ne'tegue caỹim, ma' ỹim ná'maq se ipac quiyim so'naxañiguit so ỹaalec Sela.
Ca' tot qaica ma' liỹa quet nanoiquiñiguit aso'maxare.
27Ca co'na' ỹovire'oga so na'xa'a lco'oxoqui aso Tamar. Ca' huaaya' saua llaalqa ne'qa'iñi. 28Ca co'na' sham ne'qa'iñi, ca 'uo' so 'au nañaanec da lqai'laxat quesaua'maxare. Ca asó'maq ncochaaxa coñirigui da lqai'laxat queso hilo toc. Ca 'naaco':
—Najo ná'maq 'au ne'qaañi.
29Qam co'na' ncopaata, ca' so noctoqui' liỹa ỹopilaxato' da lqai'laxat. Ca' so lqaỹa só'maq 'auo' ne'qaañi. Vichiguiño' aso ncochaaxa ỹanco' leenaxat Fares, loqo'm ñiguec, ma' 'naaco':
—¡Quecá'maq 'neeto' ma' na'aavirec!
30Co'na' ime, ca lotqai ne'qaañi so liỹa noctoqui' só'maq coñirquio' na'le da lqai'laxat so hilo toc. Ca ỹanco' leenaxat Zara.
