1Co'na'le, ca' so Isaac roỹaxane'oga so Jacob, ca' ỹaanem da no'uen llicyaxac, ca 'naapego':
—Sqa vito' roua'e' quena 'aallipi na'ñi na Canaán. 2Mo'e', 'itegue da Padan-aram yí'maq na'ñi ca qapichi' Betuel. Ca' vite roua'e' quecaua llaale ca neteesqochi' Labán. 3Ca' ñi qota'olec ñí'maq sqaica lqalanec nqouaguegue qami', chaqai ỹo'uet quiyim 'xoic ca qachaalaxai'pi, qaiyi chicqochigui qami' ca 'xoic ỹoreta'oguit qomyipi. 4Chaqai quiyim ỹaanem qami' chaqai ca qachaalaxai'pi qai'neeta ca lqouagaxa ỹachaxanem na'le so Abraham, qaiyi ralamaxarichii na 'laua senqatalec nagui, shinqatari' ca ỹoqa'a ca chicqa'gue, ma' ñi'maxare ỹachaxanapeguem quiyim ỹaanem so Abraham.
5Ca' chaqaido' da 'neeta na' so Isaac ilategue so Jacob da Padan-aram. Ca' so Jacob ỹovito' ca la'a' so Labán só'maq llaalec so arameo le'ec leenaxat Betuel, lqaỹa aso Rebeca, late'e' saua Jacob chaqai so Esaú.
'On so Esaú
6Ca' so Esaú co'na' iuanchigui so Isaac ỹaanem da lqouagaxa so Jacob, ca' ilategue da Padan-aram quiyim ỹa'ue ca loua queda'maxare. Qai'neeta iuanchigui na' so leta'a na' ỹaanem da lqouagaxa, ca' qata quiyim se ỹa'ue loua cana 'aalo na'ñi yi Canaán, 7chaqai quiyim so Jacob taigue nqohin da Padan-aram, ca' chaqaida nqai'en dá'maq qohinapega quesaua leta'al. 8Ca quedo' na'le, ca' so Esaú ỹa'deene' saua leta'al se nqo'deta ana 'aalo na'ñi yi Canaán. 9Ca' quiyo' na'le, ca' quepegue' so Ismael, llaalec so Abraham. Ca' loua aso llaale, leenaxat Mahalat, so'maxare lqaỹo' so Nebaiot, 'eno'chaqai 'vii saua loua' nera'ñi yi Canaán.
Ñi qota'olec nachaxana so Jacob quiyi Betel
10Ca' so Jacob eec, chicqochi'ñi yi Beerseba, que'tegue so nayic taỹa'gue da Harán. 11Ca co'na' 'ue yi ỹovita 'laua, ca la'qa'ño', ma' mashic inoxonño' aso ra'aasa. Ca' 'uo' so qa' icona quiyi'maxare, ca' na'xana'a, ca' nenanñi, laq. 12Ca 'uo' so le'guemataxac, ca iuano' so naviaxala' na'deetañi quena 'laua, ca ỹoviro'ot na piguim. Ca' queso'maxare, ca na lelaatqaipi ñi qota'olec naqueta'ñigui so'maxare, ca' lotqai pilshiguim. 13Qai'neeta iuano' ñi qara'gaxala' nachaatetañi reloqotalec so'maxare. Ca 'naaco' quen:
—Ỹim ná'maq ỹim na'gaxala', ỹim qota'olec queso qapichi' Abraham, chaqai so qataa'i' Isaac. Qami' chaqai na qachaalaxai'pi saanem ma'le najo 'laua ná'maq vi'sa'ñi. 14Ca ca'maxare ỹovireta'a ma'le quiyim ỹaatqajam 'xoic, 'nejem na lamoxoỹaxa na 'laua, ca' neuagaxajlec ma'le da rapiguim chaqai da 'guiñi chaqai da lqodoigue chaqai da lauashiguim, chaqai ná'ogue na qomyipi quena 'laua chicqochigui da nqouagaxa qami' ma'le chaqai na qachaalaxai'pi. 15Ca' ỹim iỹaatac qami' scochi'sapegaxaua' quecanchaqai 'itegue, chaqai yapilaxata qami' ma'le najo 'laua. Se salachi'sac chaqai somachichigui dá'maq sachaxantac quiyim saanem qami'.
16Ca co'na' nelouec so Jacob queso le'guemataxac. Ca ra'deenataxantac, 'naaco': Ỹaatqajam llic ñi qara'gaxala' hueete'e najo, qam ỹim se sa'den.
17Ca' 'xoic da lqolonaxa, ca ra'deenataxantaco', 'naaco': Ỹaatqajam 'xoic lichic najo 'laua, ma' najo na'ñi na la'a' ñi qota'olec, ¡chaqai lasom na piguim!
18Ca' queso liỹa nete'e no'teetashiguim ne'laxashiguim so Jacob, ỹacono' só'maq na'xanaxat qa', ca nachaalataxanñi letanec ỹaanot ñi qota'olec, ca' ỹocorelec queca aceite. 19Chaqaiyi yi'maxare 'uo' na'le so 'auaxaic na'a' leenaxato' Luz, qam so Jacob ỹoỹooto'o' da leenaxat, ỹanco' Betel, loqo'm qota'olec la'a'.
20Ca' yí hua'ño' na' so Jacob 'uo' da ỹaanec la'qaatec, 'naaco':
—No'm ñi qota'olec liỹaatac aỹim, chaqai cochiitapega aỹim queda ỹicyaxac queda saata'gue, chaqai ỹo'uet ca noq chaqai ca ỹooỹac, 21chaqai no'm qaica nqaida caỹim ma' yapila na la'a' ñi ita'a, ma'le, ca' ñi na'gaxala' chaqaiñi ñí'maq qota'olec caỹim. 22Ca' najo qa' salamaxajñi, ca' chaqaina lauo' ma'le ñi qota'olec. Chaqai se neme quiyim saanem ñi qota'olec ca 'óna queca diez quecá'ogue cá'maq nañaañim ñi'maxare.
