Gálatas 6

₁Qamiri ỹaqaỹa', no'm 'ue ca 'óna caqamiri ỹo'ma'guit ca lasauaxaset, ca' qamii ma' mashic ta'ñiguilo so Espíritu, ca' tauañii, qaiyi ne'laxashiguim. Qam chicqochigui nqai'ñii añi re'taxanatahi ca neneequesenaxaguii. Chaqai ca 'óna no'm ỹo'uet, qam netelañi, 'neeto' lotqai ca'maxare qai'neeta qai'guen. ₂Quiñi 'óna notauante'e' queca li'ỹaac ca liỹa, ca cá'maq ipacqajanchigui dajo, ca' ỹomachigui da lelaataxanaxac so Cristo.

₃Ma' no'm 'ue ca 'neetapigui lauel quiyim 'ue ca 'negue, quiyim qaica ca 'negue, ca' ca'maxare chi nayinteguelta'. ₄Ca' quiñi 'óna chi nimitalta' quedá'maq chi no'ueenataxac, ca' quiyi, ca nauata'guit no'm ỹa'maqachiguiñi, qam quiyim queda chi no'ueenataxac, qam mesqai queca liỹa. ₅Ma' quiñi 'óna i'xatetegueri' cá'maq chi li'ỹaac.

₆Qam cá'maq qaỹapaxaguinegue da la'qaatec ñi qota'a, ca' nouane'te' ca napaxaguinatqo' quecanchaqaica louenec.

₇'Neeto' chi nayiñiteguelta', ma' qaica ca ishit iualaxainari' ñi qota'a. Ma' cá'maq ỹanñi ca qom, ca' chaqaica cá'maq naqat ma'le ca laỹaxac. ₈No'm 'ue ca qom ỹanñi dá'maq chi lqo'itaxanqachic na loshicmaxa, ca' dajo no'ueenataxac ỹo'uet ma'le quiyim naqat ca chi lelauaxa. Qam cá'maq ỹanñi cá'maq ỹahotaque so Espíritu Santo, ca' so'maxare ỹaanem quiyim naqat ca'maxare dá'maq chi lca'laxa sqaica ca lqodoc. ₉Ca' vichiguiño' 'maxaraic quiyim se qarco'te'guesop quiyim so'ueetqatac ca ỹa'maqachiguiñi; ca no'm se qarco'teuec, ca ma' ỹovita ca laloqo', ca seconaxaguit ca laseue' cá'maq so'ueetqatac. ₁₀Vichiguiño' quiyim 'ue ca seshitaq so'ueetaq, ca 'ue ca so'ueetaq ỹa'maqachiguiñi quená'ogue na qomyipi, qam paguec quená'maq chi qarpi'ỹaxauaripi.

₁₁Ñaqai 'ajñii naua lecaigue' nauá'maq chaqai ỹirqa selatalo qamiri nagui. ₁₂Na qomyipi ỹilenta'pe qamiri quiyim qaỹa'ue ca netanaxaset na roshicmaxahi, ỹahotaque dajo, ma' qaiyi se qaỹocana'pe quena liỹa qomyipi, souetapigui so Cristo na' qaipateno queso npatenaxala'. ₁₃Ma' vire'ta ná'maq qaỹa'ue na netanaxaset na loshicmaxa se ỹo'uet ná'ogue ná'maq 'naac na naqataxaquipi. Qam ỹahotaque quiyim 'viichii ca netanec na roshicmaxahi, qaiyi nemaqajan na'maxare, ma' ishite' quiyim 'ue ca netanec na roshicmaxahi. ₁₄Qam caỹim, sqaica ma' sa'maxaren quet quiyim ñimaqajan, ta'ta'a quedá'maq lelauaxa so qara'gaxala' Jesucristo na' qaipateno queso npatenaxala'. Ma' chicqochigui so npatenaxala' so Cristo, ca' caỹim 'ec ileu ná'maq 'ueenataxac hueetalec na 'laua, chaqai aỹim 'ec yileu quená'maq 'ueenataxac hueetalec na 'laua. ₁₅Ma' no'm qomi' ña'daqatau'a so Cristo Jesús, ca' qaica quet cá'maq 'negue ca qom quiyim 'ue ca netanec na loshicmaxa, loqo'm sqaica. Ma' chaqaidaata da qanachaalataxac quiyim qaỹadalaxat, maxasa' 'ue ca 'negue. ₁₆Ca ná'ogue ná'maq queetalec dajo ñicyaxac, chaqai ná'ogue ná'maq ỹaatqajam lalamaxaret ñi qota'a, ca' icoñiguit da na'maxa chaqai da ne'xorenataxanaxa.

₁₇Ca' nagui taachi'ñi quiyim qaica quet cá'maq yquepaxatetac, ma' nauá'maq icoñirqate' na ỹoshicmaxa ichoxote' quiyim ỹaatqajam ỹim lelaatec so qara'gaxala' Jesús.

₁₈Qamiri ỹaqaỹa', so qara'gaxala' Jesucristo ỹaanema qamiá'ogue da lqouagaxa. Ajá'a, ca' chaqaida 'neeta dajo.