So Israel llaalqaipi pacta aso huaaxai leenaxat huaaxai toc
1Ca' ñi qara'gaxala' ỹalamaxachichigui so Moisés quiyim 'naapega:
2—'Ñirapega na Israel llaalqaipi quiyim pil. Ca na'ño' ma'le quiyi naloote'oga yi Pi-hahirot, ñiichiguiñigui na lavinñi quiyi Migdol chaqai aso huaaxai, quiyi naloote'oga yi Baal-zefón. Ca ỹana'ño' ca nco'matqa' yi naloote'oga yijo 'laua quena lahi aso huaaxai. 3Ca' quiyi, ca' ñi Faraón 'ñiichigui lauel ma'le: “So Israel llaalqaipi, ca tot ỹa'den ca taigue ỹo'meetac quiyi 'laua qaica qom.” 4Ca' ỹim so'uet ma'le quiyim ñi Faraón ra'ñii añi le'taxanata, ca' co'uajlgoto qamiri ma'le. Ca' quiyi hua'ñi ma'le, ca sachaxanem ñi'maxare da iquesaxanaxa chaqai qai'neeta ná'ogue na nalliripi. Qaiyi ỹa'den ná'ogue na Egipto laseripi quiyim chaqaỹim ná'maq ỹim na'gaxala'.
Ca' chaqaida 'ne'tegue so Israel llaalqaipi. 5Ca' so lashi yi Egipto 'uo' so la'xaỹaxac quiyim so Israel llaalqaipi qoỹit. Co'na'le, ca' so nashi chaqai so lotauaripi ỹoỹoota'a da la'deenataxanaxac queso'maxare. Ca 'neraco': ¿Chi'neco' ma' saxanqatec so Israel llaalqaipi quiyim eec, ca' tot ro'ueenataxanoto qomi'?
6Ca' so Faraón relaataxanlgoto quiyim qaỹa'maxachiñi saua nahoglena lauataxaqui'. Ca' i'xat so nalliripi. 7Ca' i'xat aso seiscientos caná'maq no'uen nahoglena chaqai ná'ogue ana liỹa nahoglena quiyi Egipto, cañi 'óna neetañigui ñi 'óna nouaataxanaq lashi. 8Ca' ñi qara'gaxala' ỹo'uet ra'ñiigui lauel nqai'en so Faraón. Ca' co'uajlec so Israel llaalqaipi, 'eno'm so'maxare ỹaatqajam chalego da lquesaxanaxa na' ca'e yi'maxare.
9So Egipto laseripi sá'ogue so nalliripi chaqai neetañigui ana nahoglena chaqai na shipiguiripi eec, co'uajlec so Israel llaalqaipi. Ca ỹoviralco' na'le neeto'oto' na lahi aso huaaxai quiyi Pi-hahirot naloote'oga yi Baal-zefón yí'maq neeta'ño' nco'matetapeguec. 10Ca co'na' so Israel llaalqaipi retan quiyim so Faraón chaqai so Egipto laseripi tot qoỹoxoguit, ca' chalego da lqolonaxa. Ca' ỹashiila ñi qara'gaxala' quiyim qaỹotauan. 11Chaqai queso Moisés, ca qohinaco':
—¿Ca' sqaco' aca napal lahi' quiyi Egipto, ma' naqachira'alo qomi' quiyim vi'saque qareleu quena 'laua qaica qom? ¿Chi'neco' ma' 'ñitetegue dajo coqomi'? ¿Chi'neco' ma' naqachira'alo qomi' quiyi Egipto? 12Ca' chaqaida dá'maq shinqaiquen na'le caqami' queda Egipto: Qarayaxañirac quiyim so'ueenataxanqatac quena Egipto. ¡Paguec la'maxa quiyim qomi' na'aqa, qam quiyim se qareleualec na 'laua qaica qom!
13Qam so Moisés 'naaco' queso qomyipi:
—Sqaica ro'chiỹaque queda 'ñiitari'. Chaqaida 'ñiitari', ca' 'ajñii cá'maq lo'ueenataxanaxac ñi qara'gaxala' quiyim nca'laxaterec qamiri, ma' tot qaica ma' liỹa quet huañiỹa ná'maq daañita'guit nagui Egipto laseripi. 14Qaica huapigui qavillii, ma' ñi qara'gaxala' reloquilgoto nagui qamiri.
15Ca' ñi qara'gaxala' 'naaco' queso Moisés:
—¿Chi'neco' quiyim yashiilahitac quiyim sotauañii? ¡'Ñirapega na Israel llaalqaipi quiyim eec, ipaca quedá'maq taỹa'gue! 16Ca' chaxañirishiguim ana rashillichi'i', nalojlec nqai'ñi' da rqai'laxachi' ana huaaxai. Ca' shicchigui nqai'ñi' na huaxaỹaq cana huaaxai, qaiyi na Israel llaalqaipi pacta, 'ec rashivichigui. 17Ca' ỹim sa'ñaxat añi le'taxanata na Egipto laseripi quiyim quelgoto ỹocana'pe qamiri. Ca' re'oq nqaishin ma'le da iquesaxanaxa quena Faraón chaqai quená'ogue na nalliripi chaqai cana lahoglena chaqai quena shipiguiripi. 18Ca ma' sachaxanem da iquesaxanaxa na Faraón chaqai quena lahoglenaipi chaqai quena shipiguiripi, ca' na Egipto laseripi ỹa'den ma'le quiyim aỹim na'gaxala'.
19Ca queco'na'le, ca' so qota'a lelaatec piguim le'ec chaqai so lapo naueguelec só'maq 'auetauco' quen queso Israel llaalqaipi, ca' ỹadalaxat ca loma', ca co'uaataxanta queso qomyipi. 20Ca' so lapo naueguelec, ca hueetañigui na lavinñi queso nalliripi nouaataxanaq so Egipto laseripi chaqai queso Israel llaalqaipi. Ca' queso Egipto laseripi, ca napalligui so naueguelec, qam queso Israel llaalqaipi, ca' coỹaretalec. Ca vichiguiño' so Egipto laseripi se ỹovi' so Israel llaalqaipi quesá'ogue so pe.
21Ca' so Moisés ỹachaxanshiguim so lqai'laxat nalojlec nqai'en aso huaaxai, ca' ñi qara'gaxala' nela' so quesaxan nonot chicqa'gue da lqodoigue, naquetac quesá'ogue so pe. Ca' shicchigui nqai'en aso huaaxai, ca' chaqaido' da 'neeta na'le, ca' ñi qara'gaxala' ñigui nqai'en aso huaaxai 'laua rashivijlec. 22Ca na' pacta so Israel llaalqaipi 'ec 'laua rashivijlec. Ca 'ec nquepaqataxanaxat so huaxaỹaq quenaua lahil da nemaq chaqai queda loic.
23Ca sá'ogue so lahoglenaipi chaqai so shipiguiripi queso Faraón coỹarejlec liỹaataxasom, ca na' ỹoviriñigui na lavinñi aso huaaxai. 24Qam na' na'xa'atac, ca' ñi qara'gaxala' ỹa'ajan so nouaataxanaq nalliripi yi Egipto quesó'maq hueetaugui ỹaviquetaugui naueguelec. Ca' chicqochigui quiyim tot na'maxajta' so'maxare. 25Ca' na'aa ana lasaxalona ana lahoglena, ca' sham tot ishit quiyim eec. Ca co'na'le, ca 'naaco' na Egipto laseripi:
—Seetqapeguem na Israel llaalqaipi, ma' ñi la'gaxala' ro'ootaxanlec na'maxare, ca npa'xañiguita qomi' quiyim nco'ỹa'to.
26Qam ñi qara'gaxala' 'naaco' na'le queso Moisés:
—Nachaxañirishiguim na rqai'laxachi' naloqojñiterelec ana huaaxai, qaiyi pilta' na huaxaỹaq, ca' taalec ma'le na Egipto laseripi chaqai ana lahoglena chaqai na shipiguiripi.
27Ca' so Moisés ỹachaxanshiguim da lqai'laxat, naloqojnejlec aso huaaxai. Ca na' mashic richiguiñi, ca pilta' so huaaxai, ca' ipaquichigui dá'maq chaqai'en 'neetari'. Ca co'na' so Egipto laseripi ỹahotaque llic quiyim 'eet, ca' natena'guit so huaxaỹaq caso huaaxai. Ca' da 'neeto' na'le na' ñi qara'gaxala' iyinñi nqai'en so'maxare. 28Ca co'na' pilta' na huaxaỹaq caso huaaxai, ca polec nqai'en so nahoglenaipi chaqai so shipiguiripi chaqai sá'ogue so nalliripi so Faraón só'maq taañigui aso huaaxai ỹocantac so Israel llaalqaipi. Ca sá'ogue nimiichiguiñi, qaica ca no'ueenauec ca'laaxaic. 29Qam so Israel llaalqaipi paca'ta aso huaaxai 'ec 'laua rashivijlec. Quenaua lahil, ca 'ec lquepaqataxanqate' so huaxaỹaq queda loic chaqai queda nemaq.
30Ca quesojo na'xa'a, ca ñi qara'gaxala' nca'laxatec so Israel llaalqaipi queso Egipto laseripi. Ca' so Israel llaalqaipi ỹaatqajam iuanchigui na leuaxaiquipi hueeto'ot na lahi aso huaaxai queso Egipto laseripi. 31Ca' so Israel llaalqaipi na' iuanchigui da chalego lecaic lquesaxanaxa ñi qara'gaxala' quedá'maq 'ne'tegue queso Egipto laseripi. Ca' só'maq Israel llaalqaipi ỹa'dooto naua le'cootal ñi qara'gaxala'. Ca' queco'na'le, ca' ỹaatqajam qoyiuejlec ñi qara'gaxala' chaqai so lelaatec Moisés.
