Efesios 3

₁Ma' chaqaida dá'maq 'neeta quiyim aỹim Pablo ñqouagaxaintac. Ma' qaycoñiretari' sasoualec so Cristo Jesús, ma' sahotaque quiyim ra'maxaiñi qamiri, ma' qamiri sqai judío lase'. ₂Ca' nalootañi quiyim 'yiiñii dá'maq lqouagaxa ñi qota'a na' yilarelec dá'maq so'ueetetac ma' ỹahotaque quiyim ra'maxaiñi. ₃Ca' ñi qota'a ñi ỹachaxañim da leloxoỹaxac dá'maq se re'xogui lo'ueenataxanaxac, ca ya'deenaxanaxanegue, ca shi'gue 'ue ná'maq cocho'qui' shiriñi caqamiri. ₄Ca ma' taxailec, ca' retañii quiyim ỹaatqajam sa'den dá'maq se re'xogui chicqo'ot so Cristo. ₅Dajo se re'xogui ỹaatqajam qaica ca qaỹa'deenaxanaxanegue quesaua 'auaxaqa ñaxari. Qam nagui, ca' ñi qota'a ỹachaxanem ná'maq co'teeta lelaatqaipi chaqai na letaxaỹaxanqajanqaipi, chicqochigui nqai'en so Espíritu Santo. ₆Dajo se re'xogui leloxoỹaxac 'neetasa': quiyim chicqochigui nqohin da na'qaatec chicqaugui da nca'laxa quiyim ná'maq sqai judioipi qai'neeta icoñiguit dá'maq ỹachaxantac ñi qota'a, 'nejem nqohin ná'maq judioipi, chaqai qai'neeta ỹalecau'a so loshicmaxa so Cristo, chaqai qai'neeta ỹalecau'a ná'maq ỹachaxantac ñi qota'a queso Cristo Jesús.

₇Ca' ỹaatqajam qaica ca sahotaque chi yi'laqac, qa' mashic qailarilec da na'qaatec. Qam da'maxare chicqochigui da lquesaxanaxa ñi qota'a. ₈Ma' ỹim qaica quet cá'maq shinegue, ma' paguec ỹim cocho'qui' quená'ogue ná'maq lalamaxaret ñi qota'a. Qam ñi'maxare queda lqouagaxa, ca' pataxailec quiyim sa'xat da na'qaatec quena mesqai judioipi quedá'maq qaica 'nejem lesallaxa so Cristo. ₉Ca' ñi qota'a ỹamaxailec quiyim sa'deenaxanaxanegue ná'ogue na qom dá'ogue dá'maq leloxoỹaxac dá'maq se re'xogui shi'co' nallaaqo' qoỹoxotetañi quiñi qota'a, ñí'maq ỹo'ueetac nanchaqaina. ₁₀Qohine'teco' na'le dajo, qaiyi quená'maq mashic icoñiguit da na'qaatec chicqochigui ma'le quiyim ná'ogue ná'maq nquesaxanaxa chaqai ná'maq relaataxanac quena piguim iuana da la'deenaxanaxa ñi qota'a quená'ogue nanchaqaina leloxoỹaxaquipi. ₁₁Ca' dajo ỹo'uet ñi qota'a, qam nachiñi'chiguit nqai'en dá'maq sqaica lqodoc ỹahotaque ñi'maxare, ca ipaquichigui imigui nqai'en queso qara'gaxala' Jesucristo. ₁₂Chaqai chicqochigui so Cristo, ca' seuacqachiguiñi quiyim ñqo'naxau'a ñi qota'a, ma' 'ue da qarpi'ỹaxac queso'maxare. ₁₃Ca vichiguiño' saqatalo qamiri quiyim se reuallitegueñi ma' 'ue ñi'guenaxac sauaxate' qamiri. Ma' dajo chi ra'maxahi taỹauguilo qamiri.

₁₄Ca' vichiguiño', ca' ỹim sa'yiichiriñi naua i'cootal ñqouagaxaintacot ñi leta'a so qara'gaxala' Jesucristo, ₁₅ñí'maq chicqo'ot quiyim qaicoñiguit da leenaxat quená'maq ỹoreta'oguit qomyipi neetalec na 'laua chaqai ná'maq lelaatqaipi hueeto'ot na piguim. ₁₆Chaqai sashiilatac ñi qota'a quedá'maq chalego lecaic lesallaxa quiyim ỹaanema qamiri ca na'ñaxac chaqai ca nquesaxanaxa hueetauguilo nqai'ne' qamiri, chicqochigui nqai'en so ne'Espíritu, ₁₇qaiyi so Cristo hueetauguilo naua re'taxanatahi chicqochigui da rpi'ỹaxaguii, qaiyi ra'ñi'iñi qamiri na'yiitalec da ne'xorenataxanaxa, ₁₈ca' qaiyi qamiá'ogue ma' mashic coñiguit da na'qaatec shichii 'yiiñii dá'maq leca'gue, chaqai da ladoquejlec, chaqai da lishigui'ñigui, chaqai da lishicshi'megue dá'maq le'xorenataxanaxa so Cristo. ₁₉Sashiilatac ñi qota'a, qaiyi 'yiiñii dajo ne'xorenataxanaxa, ma' da'maxare napacalec ná'ogue ná'maq seshitaq sa'deenaq, ca' qaiyi ma'le, ca' no'qaachiguilo qamiri queda no'ueenataxac ñi qota'a.

₂₀Ca' nagui, ca' semaqachinaq ñi qota'a ñí'maq 'ue da lquesaxanaxa quiyim ishit ỹapacqajnauec cá'maq ỹo'uet quecá'maq sashiilaxanqataque, loqo'm ca sa'deenqataque, chicqochigui nqai'en da lquesaxanaxa hueetauguilo qomi', ro'ueenataxantac. ₂₁Ca' vichiguiño' ná'maq mashic icoñiguit da na'qaatec imaqachintac ñi qota'a, ma' na'deetau'a so Cristo Jesús. Ca' ¡chaqaida 'neetari' nqohin qaica lqodoc! Ajá'a, ca' chaqaida 'neeta dajo.