Daniel 1

₁Na' ñaqai hueetauguilo saua tres ñaxari quiyim nashi so Joacim quiyi Judá, ca' so nashi quiyi Babilonia, leenaxat Nabucodonosor, ỹovira'a yi Jerusalén, ca' nahiquinchiguiñi yi na'a' queso nalliripi. ₂Ca' ñi qara'gaxala' ỹaxanegue quiyim so Nabucodonosor loxonec so Joacim, chaqai qai'neeta quiyim icona so louenqaipi ñi no'ueenaxanaxaqui quiñi qota'olec. Ca' so Nabucodonosor ỹauec so loxonqaipi queda Babilonia, ca' so louenqaipi ñi no'ueenaxanaxaqui quiñi qota'olec illaugui ñí'maq chi nqouagaxainaxaqui quena lashiilec nqolaquipi. ₃Ca na'le, ca' ỹilen so Aspenaz, la'gaxala' na ro'ueenataxantac quiñi nashi lauo', quiyim ỹachigoxotaugui na llaalqaipi so Israel quená'maq nashi llaalqaipi chaqai quená'maq nesallaxanec llaalqaipi, nca'au'a ỹauego ₄na ne'naqaipi 'maxaraic da no'ueenataxac, qaica ca la'aqset na loshicmaxa, 'ue na ỹa'den, co'ỹaxaraic, ỹomata'ta' ná'ogue ỹa'den chaqai ta'chiguit ro'ueenataxan quiñi lauo' so nashi. Ca' qaỹapaxaguinegue quiyim 'xaiguit nqohin na Babilonia laseripi, da leraxanaxac chaqai da letaxaỹaxac. ₅Ca' so Nabucodonosor qai'neeta chilnataxanegue quiyim so ne'naqaipi qaiqui'ỹaxanegue ná'maq loq chaqai na lataxa ne'taxat so'maxare, chaqai quiyim qaỹapaxaguin quesaua tres ñaxari. Ca ma' ỹomate', ca chaqa'ma' ro'ueenataxantot so nashi.

₆Ca' queso ne'naqaipi ỹalequesaho saua Daniel, Ananías, Misael chaqai so Azarías chicqoraugui so llaalqaipi so Judá. ₇Ca saua'maxare qaỹoỹoota'alo daua leenqate' queso nashi quiñi lauo' so nashi. Ca' so Daniel leenaxat nqai'en Beltsasar, ca' so Ananías ỹanegue Sadrac, so Misael ỹanegue Mesac, chaqai so Azarías ỹanegue Abed-nego. ₈Qam so Daniel se ỹa'maxaren quiyim ỹalecqajñiguit na loq quená'maq loq chaqai na lataxa ne'taxat so nashi, ca' ỹashiilo'ot so lashi so neloxoỹaripi quiñi nashi lauo', ca 'naac quiyim sqai 'xoic ca nepagaxallic quiyim ỹalecqajñiguit na loq na liỹa na'iquipi. ₉Qam ñi qota'olec ỹo'uet quiyim so lashi so nelaatqaipi na'yiiñiguit so Daniel. ₁₀Qam 'naaco' queso'maxare:

—Ỹim yo'cha'a ñí'maq ỹa'gaxala' ỹashi. Ma' ñi'maxare 'naapiguiỹa' quecá'maq a'guii chaqai cá'maq ni'chiigui. Ca no'm iuanalo qamiri se nalouo na qashicyaxaguii quena liỹa ne'naqaipi, ca' qamiri yasauaxachii ma'le quiyim ñi ỹashi ỹo'uet quiyim qayalauat.

₁₁Ca' so Daniel lotqai retaxaỹa'pegue' so neloxoỹaq, só'maq ỹilen so lashi so nelaatqaipi quiñi lauo' so nashi, só'maq reloqota'alo saua Daniel, Ananías, Misael chaqai so Azarías. Ca 'naaco' queso'maxare:

₁₂—Ñi'xoresene'tot qami' quiyim qari'guiñi' qomi' relaataxahi' quiyim qami' laataxañi' quiyim quenauajo diez na'xata' qanaata ana nanecse lo'ualaxa sa'guinqatac, chaqai qainaata na huaxaỹaq ñi'taqatapigui. ₁₃Ca ma' ime'ueque sauajo na'xata', ca naloqojñiriguita naua qarashiigo' naua lashiigo' só'maq ne'naqaipi ỹa'queetac ná'maq loq ñi nashi. Ca ma'le, ca' 'viiquiñi'sac cá'maq 'ñiteteguelo qomi', ma' 'ue cá'maq huañita coqomi'.

₁₄Ca' so neloxoỹaq ỹa'maxarenta dá'maq qohinapega, ca' ỹa'ue da le'guenaxanaxac quesaua diez na'xata' quesaua'maxare. ₁₅Ca na' ime' saua diez na'xata', ca' naua lashiigo' saua'maxare paguec no'ueente' chaqai paguec retapichiguilo quesá'ogue so ne'naqaipi só'maq ỹa'queetac na loq so nashi. ₁₆Ca' chaqaida 'ne'tegue so neloxoỹaq i'xat so na'ic chaqai so lataxa loxe' quet saua'maxare, ca' ỹodou'alo saua'maxare na nanecse lo'ualaxa quiyim ỹa'ic.

₁₇Ca' quesauajo cuatro ne'naqa ñi qota'olec ỹaanema da lco'ỹaxarigue' chaqai ỹa'yiinchirigui dá'ogue da 'neeta ana lere chaqai ná'ogue na na'deenec. Ca' so Daniel ỹa'den qai'neeta ná'ogue na leloxoỹaxaquipi na neuanaxanaxac chaqai na ne'guemataxac. ₁₈Ca na' ỹovirec so laloqojnec so nashi quiyim qaỹaueguero saua ne'naqa quiyi neeta'ñi so nashi, ca' so lashi so neloxoỹaripi quiñi lauo' so nashi, ca' ỹauego quiyim qaỹa'ajan. ₁₉Ca' so nashi retaxaỹa'pegueto saua'maxare, ca quesá'ogue so ne'naqaipi qaica ca ỹanata 'nejme' saua Daniel, Ananías, Misael chaqai so Azarías. Ca saua'maxare chaqa'ma' no'ueendañi quiyim ro'ueenataxantot so nashi. ₂₀Ca' quená'ogue nanchaqaina quená'maq ỹouen ca na'deenec chaqai da nco'ỹaxaric quesó'maq renataxanegue na'le so nashi, ca ỹa'den quiyim qaica ca nalo'guita quesá'ogue so liỹaripi, ỹaatqajam ỹapaquerauec quesá'ogue so pi'xonyipi chaqai ná'maq richaauec nqai'en nanchaqaina, quená'ogue na lauo' so nashi. ₂₁Ca' so Daniel no'ueenañi quiñi lauo' so nashi, chi ỹovireta'a so 'auaxaic ñaaxa na' nashi so Ciro.