1Chaqai qamiri 'cororipi, ỹaatqajam 'viichii cá'maq ỹa'maqachiguiñi, chaqai ỹaatqajam pacqajñiichigui ca nishiuetenaxac ca relaachiguii. 'Yiiñitapega quiyim qamiri qai'neeta 'ue ñi ra'gaxalari neeta'gue da piguim.
2Quiitalec sqai 'xañiñi da nqouagaxainaxaguii. Nelohitauec, chaqai 'ỹaañitacot da na'aachicyaxaguii ñi qota'a. 3Chaqai qai'neeta nqouagaxaiñitalgoto qomi', qaiyi ñi qara'gaxala' ỹo'uet quiyim qaica quepaxate' qomi' quiyim sa'xataq da na'qaatec, dá'maq se qaiuanapega na'le na'qaataxac so Cristo, ma' chaqaida dá'maq 'em ỹim ncoñiiteguesec nagui. 4Nqouagaxaiñii, qaiyi seshit quiyim ỹaatqajam sa'xateta dá'maq leloxoỹaxac dajo na'qaatec, ma' chaqaida dá'maq so'uet ma'le.
5Ỹaatqajam na'deenaxanqachiñii quena' taxaiỹa'pegue' ná'maq saqa' icoñiguit da na'qaatec. Nquipichita'pegueto nauá'maq no'viiñi na'xata' quiyim 'ue ca redaaqari. 6Daañiỹaque quiyim se neme qanqo'talo chaqai qaimaqachinta'pe naua ra'qaataxahi, chaqai quiyim 'yiiñii cá'maq ỹaatqajam 'maxaraic leloxoỹaxac quiyim taxaiỹa'pegue' ca liỹa.
Da pa'aatec niquinaxanaxaquipi
7Ca ñí'maq qanauochaxaua qarqaỹa Tíquico, ñí'maq ỹaatqajam qamaxaraic qarotaua chaqai ỹo'ueenataxanaxaua quena' so'ueenataxanqot so qara'gaxala', ñi'maxare ỹaatqajam ỹa'xatema qamiri ma'le dá'maq shintari'. 8Vichiguiño' selatalo qamiri ñi'maxare, qaiyi ỹa'xatema qamiri dá'maq shinqatari', chaqai quiyim ỹa'ñaxate' qamiri. 9Ñi'maxare liỹaatac ma'le ñi Onésimo, ñí'maq qanauochaxaua chaqai qamaxaraic qarqaỹa, ñí'maq chicqotouguilo qamiri na'le. Ñaua'maxare ỹa'xatema qamiri ma'le dá'ogue dá'maq shinqatari' quenajo.
10Chaqai ñi Aristarco, ñí'maq ñcoñiitaxaua, ilatalo qamiri da liquinaxanaxac, chaqai qai'neeta ñi Marcos, ñí'maq lqaỹa liỹa ca Bernabé. Chaqai qamiri mashic shi'gue saqatetapegalo quiyim ma' ỹovitalo qamiri ñi Marcos, ca' quelolliỹa. 11Qai'neeta ilatalo qamiri da liquinaxanaxac ñi Jesús, Justo dá'maq liỹa leenaxat. Quená'maq judío laseripi icoñiguit da na'qaatec, qainauate' nauajo nauá'maq yotauanta'pe sa'xatqatac da na'qaatec ma' ñi qota'a ỹoiquentac ná'ogue najo, chaqai ỹahosaque da ỹa'ñaxac. 12Ilatalo qamiri da liquinaxanaxac ñi Epafras. Ñi'maxare qai'neeta lelaatec so Jesucristo, chaqai qai'neeta chicqotouguilo qamiri na'le. Ñi'maxare ỹaatqajam se neme nqouagaxainteguelgoto quen qamiri, qaiyi qaica ca se no'uen ra'deenataxanaxaguii. Ta'ta'a quiyim ỹaatqajam nañaañita quiyim 'viichii cá'maq ỹahotaque ñi qota'a. 13Ma' ỹim ỹaatqajam sauanchigui ñi Epafras ỹaatqajam 'ue da leuogoxo caqamiri, chaqai qai'neeta quená'maq neeta'ñi yi na'a' Laodicea chaqai yi Hierápolis. 14Chaqai ñí'maq qanauochaxaua Lucas, ñí'maq natarenataxanaq, ilatalo qamiri da liquinaxanaxac, chaqai qai'neeta ñi Demas.
15Viraqchii'a da iquinaxanaxac ca qarqaỹaripi na'ñi yi Laodicea. Iquinaxanaxac qai'neeta caca Ninfas chaqai quecá'maq mashic icoñiguit da na'qaatec lapooqo' yi la'a' aca'maxare. 16Ca' ma' ime taxailec qamiri najo ilaata, ca' larigue da Laodicea, qaiyi qaretaqalec qai'neeta ma'le quiyí'maq mashic icoñiguit da na'qaatec na'ñi yi'maxare. Chaqai taxailec qai'neeta ma'le aca ilaata chicqa'ñi yi Laodicea. 17Chaqai 'ñiỹaco' ma'le dajo queca Arquipo, 'ñiỹapego' quiyim ỹaatqajam ipaquejlec ỹomachichigui dá'maq lo'ueenatec qoỹaanem queso qara'gaxala'.
18Ca' ỹim Pablo chaqai shiriñi dá'maq iquinaxanaxac selatalo qamiri. 'Neeto' couahi'e quiyim aỹim ncoñiiteguesec. Ca' ñi qota'a ỹaanema qamiri cá'maq no'uen qayicyaxaguii. Ajá'a, ca' chaqaida 'neeta dajo.
