Hechos 6

₁Ca' quesaua na'xata' noquiiquetauec na icoñiguit da na'qaatec, ca ná'maq ỹa'xate' naua griego la'qaatqa chi nco'uaata'ta' quená'maq ỹa'xate' naua judío la'qaatqa. Ma' saua'maxare 'neraco' quiyim aná'maq pa'ỹe aná'maq ỹa'deene' naua griego la'qaatqa sqailligueme' qaicochiỹa quena' qaimeenec na na'ic quiyi na'xa'a. ₂Ca' saua doce lelaatqa so Jesús lapoondeta' sá'ogue só'maq mashic ỹacoñiguit da na'qaatec. Ime, ca 'nerac:

—Se ỹa'maxañi quiyim qomi' saxanaxañi da qara'qaataxanaxac quiyim sa'xataq da la'qaatec ñi qota'olec, ca qaralamaxalec semeenaxauec na na'ic. ₃Vichiguiño' qamiri qarqaỹa', michiỹaque caqamiri caua siete ỹale' cauá'maq qaipi'ỹa'alo quiyim ỹo'ueete' dajo, chaqai 'ue na ỹa'deene' chaqai no'qaachiguilo queca Espíritu Santo, ca chaqaicaua ma'le caua ỹa'ajandac da no'ueenataxanaxac. ₄Ca' qomi' qolqatalec da qanqouagaxainaxac chaqai sapaxaguinataxanaxague da la'qaatec ñi qota'a.

₅Ca sá'ogue ỹa'maxarenta dajo. Ca qanca'au'a so Esteban só'maq no'qaachigui queda lpi'ỹaxac chaqai quiñi Espíritu Santo, chaqai so Felipe, so Prócoro, so Nicanor, so Timón, so Parmenas, chaqai so Nicolás só'maq na'ñi yi Antioquía. So'maxare shi'co' quen huelec da lo'ueenataxanaxac na judioipi. ₆Co'na'le, ca qaỹaueguero saua'maxare quiyi hueese'e saua Jesús lelaatqa. Ca qanqouagaxainlgoto chaqai qaỹashil-lgoto saua'maxare.

₇Ca' da la'qaatec ñi qota'a lama'xa nqo'neetauec, ca 'xoic na icoñiguit da na'qaatec quiyi Jerusalén. Vire'ta na netaxaỹaxanqajnec quena judío laseripi ỹacoñiguit da na'qaatec quiyim pi'ỹa'a.

₈So ỹale leenaxat Esteban no'qaachigui queda nquesaxanaxa chaqai queda lqouagaxa ñi qota'a. Vichiguiño' ỹo'uet na se qaiuanapega quena qomyipi chaqai na netanqaipi. ₉Ca 'vio' saua ỹale' naneresau'a añi napoonaxanaxaqui leenaxat lapooqo' na qaỹosouec na'aquipi, chaqai saua liỹa' chicqora'gue da Cirene, da Alejandría, da Cilicia, chaqai da 'laua Asia. Ca' chaqaiso só'maq retaqata'guit so Esteban. ₁₀Qam qaica ca lligo, ma' so'maxare quena' retaqa, da la'deenaxanaxa ỹachigoqto'ot so Espíritu Santo. ₁₁Ca 'vio' saua qaishiuetene' quiyim 'nerac 'qaachirigui so'maxare quiyim se ỹa'maxañi ca ỹa'xat queso Moisés chaqai quiñi qota'a. ₁₂Ca' queda, ca 'em ro'o so qomyipi chaqai so qo'xoiquipi, chaqai so rapaxaguinataxanta'pegue na naqataxaquipi. Ca' qai'guentalec so Esteban, ca qaiconlec, qaỹauegueu'a so nashillipi ỹo'ueetegueñi na leloxoỹaxaquipi. ₁₃Qaidaanapigui qai'neeta caua liỹa', qaỹahotaque quiyim se ỹa'maxañi ca ỹa'xate'. Ca 'neraco':

—Najo ỹale ỹaatqajam sqai ỹaxanñi quiyim se no'uen na ỹa'xatetac, pa'guentac añi co'teeta no'ueenaxanaxaqui quena Jerusalén chaqai na naqataxaquipi chicqo'ot na'le so Moisés. ₁₄Najo ỹale ỹaatqajam sa'xaiqa'ta na' 'naac quiyim sojo Jesús, Nazaret le'ec, quiyim 'naaco' ỹopoxoỹaxachigui añi qaro'ueenaxanaxaqui, chaqai 'naaco' quiyim ỹadalaxate' naua qano'ueenataxaco, qaỹalate' naua no'ueenaqterañi lapaxaguinataxanaxaco na'le so Moisés.

₁₅Ca' so nashillipi chaqai sá'ogue só'maq nqa'xantañi quiyi'maxare, co'na' ra'ỹo'ot so Esteban, ca ỹoqa'a na lashic, 'nejem na lashicyaxac na chicqashiguim qota'a lelaatec.