So Pablo chaqai so Bernabé hueese'e yi Iconio
1Quiyi Iconio so Pablo chaqai so Bernabé niỹaresaho, inoxondougui añi lapoxoqui na judioipi, ca na' ỹaatqajam retaxahi', ca 'xoic so icoñiguit da na'qaatec quena judío chaqai quená'maq mesqai judío. 2Qam ná'maq judioipi ná'maq sqai huelec so Jesús, ca quigui ná'maq sqai judioipi quiyim qana'yiiñiguilo, ỹahotaque quiyim na'axat na la'deenataxanaxac queso nqaỹaripi. 3Ca' quedajo, ca' saua'maxare shi'gom neesa'anyi, se no'chiiralec da la'qaataxanaxague', ma' pi'ira'a ñi qara'gaxala'. Ma' ñi qara'gaxala' ỹachaxan quiyim llic da la'qaataxanaxague' saua'maxare ỹa'xatesac da le'xorenataxanaxa ñi qota'olec, qoỹaanema da lquesaxanaxa quiyim ỹo'ueete' na netanec chaqai na se qaiuanapega. 4Qam so qomyipi quiyi na'a' noỹoota'chi, 'uo' na qoshiiteguelec na judioipi chaqai na liỹa qoshiiteguelgoto saua lelaatqa so Jesús. 5Ca ná'maq judioipi chaqai ná'maq sqai judío na'yiiñiguit na nashillipi quiyi na'a', qaỹahotaque quiyim qaishiuene' chaqai qainaxe' quena qa'. 6Qam so Pablo chaqai so Bernabé, co'na' ỹa'deene' dajo, ca' nanalochaxane', taategue da na'a' Listra chaqai da Derbe, hueraugui yi Licaonia, chaqai naua'que naua lahil yi 'laua. 7Ca ỹa'xatesac da na'qaatec chicqaugui da nca'laxa.
Qainaq quena qa' so Pablo hua'ñi yi Listra
8Quiyi Listra 'uo' ca ỹale se qaua. Chi nqa'xantañi, ma' naca'ogue' se ra'ñiiguelo naua lichil. Ca' se ỹauanapega ỹouoiguiri'. 9So ỹale na'xaỹaxantapego' da ỹa'xatetac so Pablo. Ca' so Pablo idaana'a so'maxare, ca iuana so ỹale quiyim 'ue da lpi'ỹaxac, ca ishiteta imeuec. 10Ca' so'maxare nelamaxaren, 'naapego':
—Nachaachichiriñi, co'ỹaxañiriñi naua richilli'.
Ca' so ỹale nenojshiguim, nachajñi, ca chaqa'ma' ỹouoiguiri'. 11Ca co'na' qaỹauanchigui da ỹo'uet so Pablo, chaqa'ma' ỹaualqagui so qomyipi, qam ỹahota'ahi naua la'qaatqa na Licaonia le'ec. 'Naaco':
—¡Ỹaatqajam qota'olqa daua renotegue'sopa qomi', 'nejme' na qom!
12Qaipe'taxantaque quiyim so Bernabé chaqaiso só'maq qohinac qota'olec Júpiter, chaqai queso Pablo qohintapego' chaqaiso so qota'olec Mercurio, ma' chaqaiso só'maq netaxaỹaq. 13Ca' so neloxoỹaq cañi no'ueenaxanaxaqui queso nashiilec Júpiter neeta'ñi yi ñigo quiyi na'a', ca'maxare nodooro caua toorol chaqai ana qo'paq lenoỹaxai 'ueetqate, ma' so'maxare chaqai so liỹa qomyipi ỹahotaque quiyim qaỹalauate' caua toorol quiyim nachitaxanataxanqate' quiyim qanqouagaxainoto saua Jesús lelaatqa. 14Qam co'na' so Pablo chaqai so Bernabé retane' dajo, ca nasectaqta'ahi saua loho, ma' se ỹa'maxarene' dajo. Ca' taaringui yi lavinñi so qomyipi, ca' nelamaxarene', 'neraco':
15—¡Qamiri ỹalliripi! ¿Chi'neco' ma' 'viichitac dajo? Ma' qom qomi', shinqata maqamiri. Ma' chaqaida dá'maq 'em ñoviraq quiyim shinqapegalo qamiri quiyim 'xañiñi na se no'uen qaica ca 'negue, ca' quiilec ñi qota'olec nca'leetauec, ma' ñí ỹo'uet na piguim chaqai na 'laua chaqai ana huaaxai, chaqai ná'ogue ná'maq nanchaqaina. 16Ma' quesaua 'auaxaqa na'xata' ñi qota'olec ỹaxanegue na qomyipi quiyim nanoiquentac quecá'maq shim 'neeta. 17Qam ñaqaiyiita da nachaxanaxac ñi'maxare, quedá'maq no'uen lo'ueenataxanaxac, quena' ỹa'ue na ỹaxat, chaqai lo'yaxanec nqai'en na laỹaxac na nanecsec, chaqai sqoue nqai'en ca qonoq, ca' qomi' ñitoonqatac.
18Qam 'eno'm 'nerac dajo, qam qaiyiita sham se quepaxat quiyim so qomyipi ỹahotaque ỹalauate' saua toorol, ca qoỹaando quiyim qanqouagaxainoto saua'maxare.
19Ca 'vio' saua ỹovirero judío lase' chicqora'gue da Antioquía chaqai da Iconio, ca 'nerapega so qomyipi, ca qainaq quena qa' so Pablo. Ca' co'na' qohintapega mashic ileu, ca qaỹahoglene'ogue da lahi yi na'a'. 20Qam co'na' lapoỹata' só'maq mashic ỹacoñiguit da na'qaatec quiyi hueeta'ñi so Pablo, ca so'maxare ne'laxashiguim, ca lotqai liỹa taugui yi na'a'. Ca co'na' liỹa nete'e, ca inoxondec queso Bernabé, taategue da Derbe.
21Ca co'na' ime ỹa'xatesac da nca'laxa quiyi Derbe, ca' 'xoic so laueguegue' hua'anyi ỹacoñiguit da na'qaatec. Ca piltegue da Listra, da Iconio, chaqai da Antioquía. 22Ca' saua'maxare ỹa'ñaxatesac sauá'maq neesalec yi 'laua so mashic icoñiguit da na'qaatec quiyim na'ñaxate'tegue da lpi'ỹaxac. Chaqai 'neraco' quiyim ỹouen 'xoic le'xoric ca qom, ca' qaigueme inoxoneu'a da lo'ueenataxanaxac ñi qota'a ma' ỹoiquentac ná'ogue najo. 23Chaqai qai'neeta qaỹa'ue na na'gaxalateripi cana no'ueenaxanaxaquiripi. Ca co'na' ime so qouagaxainaxac chaqai so nqopaaqachitaxac, ca' qoỹaanoto dá'maq qoyiuetaugui letelaxa ñi qara'gaxala', ñí'maq huerelec saua'maxare.
So Pablo chaqai so Bernabé piltegue da Antioquía huaugui yi 'laua Siria
24Ca co'na' ime queterelec yi 'laua Pisidia, ca chi ỹoviresa'a yi 'laua Panfilia. 25Ca ỹa'xatesac da na'qaatec quiyi na'a' Perge, ca' quiyi, ca taatego' da Atalia. 26Ca' quiyi, ca renotero, ca taategue da Antioquía, yí'maq hua'ño' na' qoỹaanema da lo'ueenataxanaxague' dá'maq nagui ỹomate'. Chaqai qai'neeta hua'ñi co'na' qoỹaanguita da le'xorenataxanaxa ñi qota'olec. 27Ca co'na' ỹovijta yi Antioquía, ca' lapoondeta' ná'maq mashic ỹacoñiguit da na'qaatec. Ca' ỹa'xate' ná'ogue ná'maq ỹo'ueeto' ñi qota'olec quesaua'maxare, chaqai ỹa'xatesac da 'neeto' ñi'maxare co'na' 'ec ỹauate'oga da lpi'ỹaxac na mesqai judío, qaiyi qoyiuelec ñi qara'gaxala'. 28Ca' so Pablo chaqai so Bernabé shi'gom neesa'anyi, ỹalequesaugui só'maq mashic ỹacoñiguit da na'qaatec.
