Qaỹalauat so Jacobo chaqai qaicoñi' so Pedro
1Ca' quesauajo na'xata' co'na' so nashi leenaxat Herodes rocanaxañigui ná'maq mashic ỹacoñiguit da na'qaatec. 2Relaataxanlec quiyim qaỹalauat so Jacobo, lqaỹa so Juan, qaỹoda'a na lecat. 3Ca co'na' retan dajo quiyim ỹa'maxarenta na judioipi, ca qai'neeta relaataxanlec quiyim qaicoñi' so Pedro. Ca co'na' 'ue dajo hueetouguilo' saua na'xata' napoxoqui' quena' qaỹa'ic na pan qaca aca lalequete. 4Ca co'na' ime quiyim qaiconlec so Pedro qaicoñi', ca' so Herodes relaataxanlec quiyim qoỹanaugui añi ncoñiitaxanaxaqui late'ogue'. Chaqai ỹa'uo' so lapoonta' dieciseis nouaataxanaq, ca ỹasectaqchigui cuatrotac nqai'en quenaua laloqote' quiyim ỹovirelec qareloxoỹa'a so'maxare. Ma' da la'deenataxanaxac so Herodes quiyim ma' ime so nemaqachic, ca' qanaqatec so Pedro quiyim qaichoxotem ná'ogue na qomyipi, ca qaỹalauat. 5Ca' so Pedro ỹaatqajam qareloxoỹa'a cañi ncoñiitaxanaxaqui late'ogue' qoỹantaugui, qam só'maq shi'gue ỹacoñiguit da na'qaatec lama'xa ỹaatqajam nqouagaxaintalec so'maxare quiñi qota'olec.
Ñi qota'a ỹosou'a so Pedro cañi ncoñiitaxanaxaqui
6Ca' queso pe pa'aata'guit so na'xa'a laloqojnec so Herodes quiyim qaỹaueguec so Pedro, qailoxoỹaxañiguit so qomyipi. Ca' laqatam so Pedro, hueetanguilo saua dos nouaataxanaq lase', qaicoñiretam quesaua dos caréna. Chaqai 'vii saua liỹa' nouaataxanaq lase' nauaansac ñi lasom reloqosa'a añi ncoñiitaxanaxaqui. 7Ca chi re'laqataxanto ỹoviro so chicqashiguim qota'a lelaatec. Ca' ñi ncoñiitaxanaxaqui richiitougui nqai'en. Ca' so nelaatec ipootau'a na lahi so Pedro, ca neloxotec, ca 'naapego':
—Chaqa'ma' ne'laxachirishiguim.
Ca' saua caréna nalaqachiriñi sauá'maq neetaguilo naua lqai'laqate' so Pedro. 8Ca 'naaco' so nelaatec:
—Viquiro na nosaataxagui'i', chaqai ñi'riñi caua qapelachichi'.
Ca co'na' ime so Pedro, ca lotqai 'naaco' so nelaatec:
—Lamiro aca rachima'e', ca coỹachitero caỹim.
9Ca' so Pedro coỹarejlec so nelaatec chicqashiguim, qam se ỹa'den quiyim llic loqo'm 'e' dá'maq 'neetari', 'neetapega chi leuanaxanaxac nqohin. 10Qam co'na' napaguelec ca 'auaxaic neloxoỹaqa', ime, lotqai ca liỹa neloxoỹaqa'. Ca co'na' ỹovirere'oga ca lasom imaañi lecat pa'aata'guit ca nayic, ca' ca lasom chi nanoiquentac nauachigui. Ca' inoxondec. Ca co'na' ime queete' co'na' 'óna ca nayic napaguerelec, ca' so nelaatec chicqashiguim, ca ỹaxanec, nodaqajantec. 11Ca' quiyi, ca qaiguemo' ỹa'den so Pedro, ca' 'naaco':
—Nagui, ca' ỹaatqajam sa'den llic quiyim ñi ỹa'gaxala' nela'o' so lelaatec chicqashiguim quiyim ỹahotaque qayayit quiñi Herodes chaqai quená'ogue ná'maq sham 'ne'tegue aỹim na judioipi.
12Ca' so Pedro ra'deenataxantaco' quedajo, ca' quepegue' yi la'a' aca María, late'e so Juan chaqai qai'neeta leenaxat Marcos, yí'maq neeta'ñi so 'xoic qomyipi lapoota'ta' nqouagaxaintac. 13Ca co'na' ỹouaxantapego ñi pa'aauec lasom, ca raỹaauec aso nequetegaxai leenaxat Rode, ra'ajnaxane'oga chi negue' so'maxare. 14Qam co'na' no'ueneguelo naua la'qaatqa so Pedro, ca se ỹauachigui ñi lasom, paguelec da netoonaxac. Ca ne'guentau'a ca qomyipi pa'aataho, ỹa'ue da la'xaỹaxac quiyim so Pedro hueete'e ñi lasom. 15Ca' qohinapego' aso'maxare:
—¡Ỹaatqajam qami' hualoxonaxa!
Qam aso'maxare ỹaatqajam i'taxatetegueñi quiyim llic. Qam saua'maxare 'neraco':
—¡'E', mesqaida; chi lqui'ỹo' ca nachaxan!
16Qam so Pedro ñaqai queetalec ỹotocqotapego ñi lasom. Ca co'na' qaỹauate'oga co'na' qara'i'tot, ca sá'ogue no'daxatetec. 17Qam so Pedro ỹa'ue da letanec quiyim i'maqajlec, nanojshiguim ada laua, ca' ỹa'xat dá'maq 'neeto' na' qanaqatec quiñi qara'gaxala' cañi ncoñiitaxanaxaqui. Ca 'naaco':
—'Xachiỹo' dajo queca Jacobo chaqai queca liỹa qarqaỹaripi.
Ca quiyi, ca' eec, ỹoqa'a ca taigue.
18Qam co'na' richiguiñi, ca 'xoic na nouaataxanaq nimiitaxanaq, ma' se qaỹa'den ca 'neeto' ca Pedro. 19So Herodes relaataxanlec qaidaanaque so Pedro, qam co'na' se qaỹanata, ca relaataxanlgoto saua neloxoỹa' quiyim qaỹalauate'. Ca co'na' ime, ca so Herodes ca'e yi Judea, ca ỹo'uet la'a' quiyi Cesarea.
Co'na' ileu so Herodes
20So Herodes ro'ootapega so qomyipi na'ñi yi na'a' Tiro chaqai yi Sidón. Qam saua'maxare na'deenta' quiyim querepegue' só'maq nashi, qoyiqueto'ogue quiyim qaishiueten so Blasto, ma' ỹaatqajam lodegaxat lotaua so Herodes, quiyim ỹashiilo'ot so lashi quiyim ỹaanem ca leuagaxa so qomyipi, ma' quiyí'maq na'laua so qomyipi ỹachigoxotalec na lepetaxanaxat yi na'laua so nashi. 21Ca' so Herodes ỹa'uo' so laloqojnec na'xa'a quiyim lapoỹata' sá'ogue so qomyipi. Ca co'na' ỹovire'oga sojo na'xa'a, ca' no'uet, ỹañiñi saua no'ueetaxaqui' nashi loho. Ca' nqa'xanñi caso nashi nqa'xanaxaqui, ca ỹa'uo' da la'qaataxanaxac. 22Ca' sá'ogue so qomyipi ỹaualqatagui:
—¡Ñijo retaqatac mesqai chaqai qom, ỹaatqajam 'ec qota'olec ñi'maxare!
23Ca' quiyi, ca novi' so chicqashiguim qota'a lelaatec, ỹo'uet quiyim ralola so Herodes, ma' pa'aalec da lecaic ñi qota'olec; ca' ileu, qaichiqueta quena ñilo'.
24Qam da la'qaatec ñi qota'olec lama'xa noquiiquetauec, ma' qarapaxaguinataxanta'pegue, qaica ca ỹochiỹa'oga.
25Ca co'na' ỹomate' da lo'ueenategue' so Bernabé chaqai so Saulo, ca pile', chicqora'gue da Jerusalén, nauequesa'pegue' so Juan, só'maq qai'neeta leenaxat Marcos.
