1Ca vichiguiño' qamiri ñauochaxaua' ỹaqaỹa', 'enaua nauá'maq qaỹachaxanta'pe coqomi'. Vichiguiño' se squeuocqau'a ná'ogue ná'maq ishit napio'xote' qomi' quena qaroshicmaxa, chaqai quena qara'al. Qaro'cha'a ñi qota'a, chaqai somatqo'ot da qanachaalataxac ñi'maxare.
Co'na' qaỹadalaxat da no'ueenataxac so Corinto laseripi
2Ca ¡ñaqai 'viichii ca qaredaaqa' cañi re'taxanatahi! Ma' sqaica quet cá'maq sque'maqachitaq chaqai quiyim 'ue ca ña'axataq, chaqai sqaica ca sayinqatac. 3Qam sqai shinac dajo, ca' sahotaque ca rasauaxashichii. Ma' shi'gue shinac caqamiri quiyim silliitaguilo qamiri añi i'taxanata, qamiá'ogue ica'laxaua' chaqai qamiri ilauaxaua'. 4Ỹaatqajam 'xoic da ñaquitaxac chaqai da ñitoonaxac caqamiri. Quená'ogue ná'maq qare'xorico, qam ỹaatqajam 'ue da qana'ñaaqataxac chaqai 'xoic da qanetoonaxac.
5Shi'gue na' ñovitaxa na Macedonia ỹaatqajam qaica ca qanco'matqa'. Ta'ta'a quiyim 'ue da qananaqataxac quenaua'que nauá'maq sovirqa'guelo chaqai da qanoqogaxanataxac, ca vire'ta mashic ileuetapigui na qouel. 6Qam ñi qota'a ma' ishit ỹa'ñaxat cá'maq qaica ca la'ñaxac, ca' qara'ñaxat, chicqochigui nqai'en da loviraxac so Tito. 7Chaqai mesqaidaata da loviraxac so'maxare, ma' so'maxare ỹaatqajam 'ue da na'ñaaqataxac chicqauguilo qamiri. Ca so'maxare ra'qaataxantapegalo qomi' quiyim 'ue da rishoxohi quiyim liỹa huañiỹalo qomi', chaqai ỹa'xatetac da rachicoxohi quedá'maq 'ñiita caỹim. Ca' quedajo, ca' nqo'neuec da ñitoonaxac.
8Acá'maq ilaata selatalo qamiri, 'eno'm ỹa'ue ca rachicoxohi, se yitogot nagui. Ma' mashic 'ue ca ñitogotaxa na' sa'den quiyim aca ilaata ỹo'uet ca rachicoxohi, qam sqaỹaloq ime'uegue. 9Qam nagui 'ue da ñitoonaxac, qam mesqai quecá'maq rachicoxohi. Ta'ta'a quiyim só'maq rachicoxohi ỹo'uet ca netogotaxahi. Ma' qamiri na'ñaxachiiguit da rachicoxohi, ca' chaqaida dá'maq ỹa'maxarenta ñi qota'a. Ca' quedajo, ca 'eco' qaicanqaida caqamiri. 10Ma' cá'maq nachicoxo quiyim qana'ñaxachiguit quiyim nqo'ta ñi qota'a, ca chicqaugui ca togotaxa, ca' re'oq nqai'en ca nca'laxa. Ca' sqai qanetogoteta'pegue. Qam da nachicoxo hueetalec na 'laua, ca chicqaugui da nelauaxa. 11Ca' qamiri 'ue da rachicoxohi, qam ỹa'maxarenta ñi qota'a. Qam ¡ñaqa 'ajñii nagui dá'maq chicqaugui! Ỹo'uet quiyim qamiri sqa saguiriñitac dajo, chaqai choxochita dá'maq 'neeto' na'le dajo, ma' ỹo'uet da ronogoxonaxaguii, chaqai 'ue da rqolonaxahi. Qam na' ime, ca' 'ue da rishoxohi quiyim liỹa huañiua', chaqai nipiichii quiyim 'viichii ca nouaxanaxaset cá'maq ỹo'uet cá'maq se no'uen. Ca' quedajo re'xoi' nqai'ne' qamiri quiyim sqaica ca rasauaxashichii. 12Ma' na' seretegueñi aso ilaata, mesqai hueetapigui iuel cá'maq qom ỹo'ueetetac ca se no'uen, loqo'm quecá'maq 'ue ca qohine'tegue. Ta'ta'a quiyim qamiri retañii quiyim ỹaatqajam 'ue da reuogoxohi coqomi', qam dajo ỹa'deenta ñi qota'a. 13Ca vichiguiño' lo'yichigui na qouel.
Qam quedajo lo'daxa qouel seconaxaguit, ca' 'ue da qanetoonaxac nqo'neuec na' seuanaxa so Tito ỹaatqajam netoontac. Ma' qamiá'ogue tauañitac, qaiyi qaica ca huapigui lauel. 14Ma' ỹim mesqai se ya'maxañi na' shinac queso Tito quiyim ñitoonta'peguelo qamiri. Ma' dá'ogue dá'maq shinqac na'le caqamiri ỹaatqajam lliqueta, chaqai qai'neeta lliqueta dá'maq shinqapega na'le so Tito quiyim ñitoonqata'guelo qamiri. 15Ca so'maxare paguec da lqo'iichi caqamiri quena' ỹo'lliinchi'chi qamiri, ma' 'viichiỹo' na'le cá'maq ỹahotaque, chaqai co'na' ỹovitalo qamiri, ca' quelolliỹa, ne'xorishiñita chaqai niñiiquishiñita. 16Ca' ỹaatqajam 'ue da ñitoonaxac, ma' ỹaatqajam naloochiguiñi da ñaquitaxac caqamiri.
