1 Samuel 4

Ca' quesauajo na'xata' so filisteoipi lapootecta', ỹahotaque nalauate'e' na Israel llaalqaipi. Ca vichiguiño' so Israel llaalqaipi tauec, quepegue' yi Eben-ezer, qaiyi reloqoguit so qomyipi. Ca na filisteoipi na'ñi yi Afec, ₂ca' naloqojonñi quiyim nalauate'e' na Israel llaalqaipi. Ca ỹalauat so cuatro mil qomyipi so filisteoipi, co'na' nalauajta', illiitalec yi nalauatqa' so Israel llaalqaipi. ₃Ca co'na' rapila yi nco'matqa' so nalauataxairipi queso Israel llaalqaipi, ca' so qo'xoiquipi quiyi Israel 'naaco':

—¿Chi'neco' ñi qara'gaxala' ỹasenterec quiyim qomi' loxonqa na filisteoipi? ¡Se'guenqa'a aca lahi' naua laqataxaco ñi qota'olec quiyi Silo, qaiyi qariỹaatac ma'le ñi'maxare, ca' ro'ootaxanlgoto qomi' ma'le quena qanpa'guenaxauaripi!

₄Ca' so llaalqaipi so Israel ỹa'ue so ilata yi Silo quiyim qanodori' aso lahi' saua laqataxaco ñi qota'olec, ñí'maq qaica lqalanec, ñí'maq neetalgoto saua dos nadenqatqa piguim lase' 'vii laua'. Ca' so Ofni chaqai so Finees, sauá'maq llaalqa so Elí, liỹa' quetegue aso lahi' saua laqataxaco ñi qota'olec. ₅Ca co'na' qaỹoviraqte'oga cá'maq qoyinta'ñi aso lahi' saua laqataxaco ñi qara'gaxala', ca' só'maq llaalqaipi so Israel ỹaatqajam ỹaualqatagui, mashic paguec da netoonaxac. Ca' ỹaatqajam rillimi'ñot nqai'en na 'laua.

₆Ca' so filisteoipi co'na' 'xaỹaque da naualaxac, ca' renataxano':

—¿Chi'negue ma' 'xoic na naualaxac quiyi nco'matqa' so hebreoipi?

Qam na' ỹa'den quiyim aso lahi' saua laqataxaco ñi qara'gaxala' qanoviraqte'oga yi co'matqa', ₇ca' 'ue da lqolonaxa. Ca 'naaco':

—¡Ñi qota'olec novire'oga yi co'matqa'! ¡'Xoraiqolqa qomi'! ¡'Xoraiqolqa qomi', ma' vire'ta nagui se ỹauanapega 'neeta dajo! ₈¡'Xoraiqolqa qomi'! ¿Negue' queto' ca ro'ootaxanlgoto qomi' quiñijo qota'olec chalego lquesaxanaxa? ¡Chaqaiñi ñí'maq nalauajñi so Egipto laseripi huaalco' yi 'laua qaica qom, chaqai ỹo'ueeto' ná'ogue nanchaqaina ne'ne'! ₉¡Ca' nosaachiigui na ro'goxonaxachii, totaxan ro'chii qamiri filisteoipi, ỹaatqajam na'ñaxachii, nalauachii, qaiyi sqai qomi' la'aqa na hebreoipi, qaiyi sqai shinqata na'maxare quiyim chi qarelaatqaipi!

₁₀Ca co'na'le, ca' so filisteoipi nalauate'e', ca loxonec so Israel llaalqaipi. Ca so'maxare 'eet, i'guena'a yi nco'matqa'. Ca' ỹaatqajam qanalauajñi so qomyipi, ma' so co'ỹaaxaiquipi queso nalliripi so Israel llaalqaipi treinta mil so qomyipi ileu. ₁₁Chaqai qai'neeta qarouootaxana'gue aso lahi' saua laqataxaco ñi qota'olec, chaqai qaỹalauat so Ofni chaqai so Finees saua dos llaalqa so Elí. ₁₂Qam 'uo' so 'oonoqui' qohit queso lauataq, qam so'maxare chicqaugui na llaalqaipi so Benjamín, ne'guenta, ca ỹovira'a yi Silo queso na'xa'a, nasectaxata'ahi saua loho chaqai no'qaachigui na lqahic quena 'laua. ₁₃Ca co'na' ỹoviro, ca' so Elí nqa'xantaño' caso nqa'xanaxaqui, ra'iita'ñigui so nayic, ma' ỹaatqajam 'xoic da 'neeta, sauaxat qai'xat aso lahi' saua laqataxaco ñi qota'a. Ca' sojo ỹale taugui yi na'a', ca ra'qaataxan quedá'maq qohintari'. Ca só'maq neeta'ñiyi chaqa'ma' ỹaualqatagui. ₁₄Ca' so Elí co'na' 'xaỹaque so naualaxaquipi, ca renataxano', 'naaco':

—¿Chi'negue ma' 'xoic na naualaxac?

Ca' sojo ỹale iỹala quiyim ra'qaataxana so Elí. ₁₅Qam so'maxare tot nauanñi, ma' mashic ỹovite' yaua noventa y ocho ñaxari. ₁₆Ca 'naaco' queso'maxare:

—Chita'gue ñoviro, sachicqa'oga yi lauatqa'. Nallaaqa ñañit quiyi lauataq.

Ca' so Elí inato' so'maxare, 'naaco':

—¿Negue' ca 'neeta cá'maq lliquisau'a, qami' ỹaalcolec?

₁₇Ca so'maxare 'naaco':

—Na llaalqaipi so Israel neuagaxatac, 'eetapeguem so filisteoipi. Chaqai 'xoic na qaỹalauat qomyipi, chaqai qaỹalauate' qai'neeta yaua dos qachaalaxahi' Ofni chaqai yi Finees, chaqai aso lahi' naua laqataxaco ñi qota'olec rouootaxana'gue na filisteoipi.

₁₈Ca' so ra'qaataxantac co'na' ỹa'xat aso lahi' saua laqataxaco ñi qota'olec, ca' so Elí reloxoỹashiguim, taachi'ñi na lahi ñi lasom. Ca ma' so'maxare mashic qo'xoỹom, ca se ỹolaavichi'ñigui, ca' qalagoxouec añi nque'dese, ca' ileu. Ca so'maxare ỹovi' cuarenta ñaxari quiyim la'gaxala' na Israel llaalqaipi.