1 Reyes 6

₁Ca' so Salomón no'xonshiguim aso no'ueenaxanaxaqui quiyim qanqouagaxainot ñi qara'gaxala' co'na' ỹovi' cuatro ñaxari quiyim lashi so Israel llaalqaipi, na' ỹovire'oga so shiraigo leenaxat Ziv só'maq co'uaataxanta queso 'auaxaic shiraigo quiyi ñaaxa. Ca queco'na'le mashic ỹovi'o' cuatrocientos ochenta ñaxari na' so Israel llaalqaipi ca'e yi Egipto. ₂Ca' sojo no'ueenaxanaxaqui no'xonshiguim na'le so Salomón quiyim qanqouagaxainot ñi qara'gaxala' ỹovi' veintisiete metros yi ladogolec, nueve metros yi leca'gue, chaqai trece metros y medio da lishicshi'megue. ₃Ca' yi ni'ỹaaqa' queda reloxoỹa'gue ñi 'imec ỹovi' nueve metros, 'nejem da leca'tegue ñi 'imec, chaqai cuatro metros y medio quedá'maq reloxoỹa'gue ñi 'imec. ₄Ca' so Salomón qai'neeta ỹo'ueete' nqotel ñi no'ueenaxanaxaqui chaqai na lquepaxaset fierro. ₅Ỹa'vii qai'neeta naua 'imqolqai' no'xoñishiguim quenaua lahil aso no'ueenaxanaxaqui chaqai da qoshiỹa'gue aso'maxare. Ca' quenaua'que naua lahil aso no'ueenaxanaxaqui 'vii naua 'imqolqai'. ₆Ca só'maq pa'aachiguiñi 'imec, ỹovi' dos metros chaqai veinticinco centímetros da leca'gue, chaqai qaỹoqoto so liỹa ỹovi' dos metros chaqai setenta centímetros, chaqai queso pa'aashiguim 'imec ỹovi' tres metros chaqai quince centímetros, ma' queda pa'aauec noquiicta' da lecagui ñí'maq no'ueenaxanaxaqui, qaiyi se ỹa'deetaho queso lquepaqataxanaxat añi no'ueenaxanaxaqui. ₇Ca' na no'ueenataxat aso no'ueenaxanaxaqui qa' ỹaatqajam nalo'ojta' nqohin qanolliquichiguiñi. Ca vichiguiño' na' qano'xonshiguim aso'maxare, ca' ỹaatqajam qaica ca qara'xaỹaque quena notogoxosoxonaxat, chaqai na naloqojonta' na qa', chaqai canchaqaica quena no'ueenataxanaxat fierro. ₈Ca' so lasom so pa'aañi 'imec, ca pa'a'gue da loic añi no'ueenaxanaxaqui. Ca quena' qoyicshi'megue so 'imec nañigui na lavinñi chaqai so pa'aashiguim, ca' 'ue so ñicshiguim lepatetashiguim.

₉Ca' so Salomón na' ime no'xonshiguim so 'imec, ca' ỹapolec quena qo'paq cedro, ỹahote'e lemaqatet. ₁₀Chaqai no'xonshiguim qai'neeta so 'imqaipi ronaataho quena lahil aso no'ueenaxanaxaqui. Ca' quiñi 'óna ỹovi' yi dos metros chaqai veinticinco centímetros yi ladogaxa. Ca' naua lequeete' na pa'aauo nolliisañi na qaỹa'yiñi cedro, ca' taỹau'alo nqohin aso no'ueenaxanaxaqui. ₁₁Ca' ñi qara'gaxala' ỹalamaxachichigui so Salomón, ca 'naapega:

₁₂—Ca' caná'maq 'viichisac no'ueenaxanaxaqui, ca' nagui, ca 'ue da shinac caqami', ca no'm quiiterelgoto nauá'maq ỹaqataxaco chaqai naua ilaataxanaxaco, chaqai quiyim 'viichi' dá'maq 'nerac naua'maxare, ca' ỹim qai'neeta sepacqajanchigui dá'maq sachaxantac na'le queso qataa'i' David, dá'maq shinac na'le caqami'. ₁₃Ca' ỹim sentañigui ma'le na llaalqaipi so Israel, ca' sqaica ma' shique'e quet ma'le na ỹalamaxareteripi.

₃₇Ca co'na' mashic ỹovi' cuatro ñaxari quiyim lashi na Israel llaalqaipi so Salomón queso shiraigo leenaxat Ziv, ca' qailliguiñi so no'xonaxala' aso no'ueenaxanaxaqui quiyim qanqouagaxainot ñi qara'gaxala'. ₃₈Ca co'na' ỹovi' once ñaxari quiyim nashi, na' ỹovire'oga so shiraigo leenaxat Bul, so'maxare ỹovire'oga quena ỹovirerec yaua ocho shiriguiri quiyi ñaaxa, ca ỹaatqajam sá'ogue ime aso no'ueenaxanaxaqui. Ca' so Salomón ỹomat quesaua siete ñaxari.