1 Reyes 2

₁Ca co'na' tot qaỹalqotac ileu so David, ca' ỹaatqajam qatetapega so llaalec Salomón, 'naacsa':

₂—Ỹim mashic tot qoỹoqaque ca lqodoc añi ỹaqauaxaqui. Ca' shinta ma'le ná'ogue ná'maq ca'e na 'laua. Ca qami', ma' qami' ỹale, ỹaatqajam na'ñaxachi' ma'le. ₃Ỹaatqajam ipaquichiguilo nqai'ñi' naua la'qaatqa ñi qara'gaxala' qota'olec ñí'maq rashiilqui'. Ỹaatqajam 'viichi' cá'maq ỹahotaque ñi'maxare, chaqai 'viichi' naua laqataxaco, lelaataxanaxaco ná'maq naneresañi nauá'maq ỹichiñi na'le so Moisés, qaiyi noquiiquetashiguim qami' quená'ogue ná'maq 'viichi' quecanchaqaica 'itegue. ₄Qaiyi ñi qara'gaxala' ỹaatqajam ipaquichigui nqai'en da la'qaatec ỹachaxantac na'le caỹim. Chaqai no'm na'maxateta na ỹaalqaipi, chaqai que'tegue cá'maq ỹaatqajam lliqueta quená'maq ỹa'maxarenta ñi'maxare, chaqai quiyim ỹomatauec añi le'taxanata, da nachaalataxac, ca' quena ỹaalqaipi sqoue nqai'en cá'maq lashi nqai'en na llaalqaipi so Israel.

₅Ca' nagui mashic 'yiiñi' dá'maq 'ne'tegue caỹim so Joab só'maq llaalec aso Sarvia. 'Neetasa' dá'maq 'ne'tegue quesaua dos lashil na nalliripi na llaalqaipi so Israel: So Abner só'maq llaalec so Ner, chaqai so Amasa só'maq llaalec so Jeter, sauá'maq ỹalauate' so'maxare ỹaatqajam huaugui nqai'en na'le da neuagaxa, ma' ỹahotaque lovi' só'maq qaỹocoraxata'pe saua leuo' huaugui so lauataq. Ca' so'maxare ỹaatqajam imaxalec aỹim da lalauataxanaxac. ₆Ca' qami' ỹaatqajam na'deenaxanqachiñi' ma'le, ca sqai 'xañi'sac quiyim chi ileu. ₇Ca' na llaalqaipi so Barzilai só'maq na'ñi yi Galaad ỹaatqajam 'xoriñi' ma'le. Ta'ta'a quiyim nouañise'e' ma'le, ma' na'maxare ỹaatqajam ro'ootaxanteguelec aỹim na'le na' seetapeguem so rqaỹa'e' Absalón. ₈Chaqai qai'neeta lliquisa'guit ñi Simei ñí'maq llaalec so Gera, ñí'maq chigoxougui na llaalqaipi so Benjamín só'maq na'ñi yi Bahurim. Ma' ỹaatqajam 'xoic na lishiuenaxanaxac caỹim na' saỹa'a yi Mahanaim. Qam na' yapil, ca' ne'xoresenta qataiguit caso lachiugue Jordán. Vichiguiño' ỹim na'le saanot so'maxare da ỹa'qaatec quiyim se salauat, 'qaachigui nqaishin ñi qara'gaxala'. ₉Ca' ỹaatqajam sqai 'xoriñi' ñi'maxare, ma' qami' ỹaatqajam qami' 'deenaxanqachaqaic, ca 'yiiñi' cá'maq 'ñiisa'gue ñi'maxare. Qam nquipichira'pegue' quiyim ỹaatqajam qaỹalauat ñi'maxare.

₁₀Ca' so David ileu. Ime, ca qaishinñi qaỹauaxaỹaxane'te' só'maq 'au leta'allipi hua'ñi yí'maq qohinac la'a' so David. ₁₁Ca so'maxare nashi quena llaalqaipi so Israel ỹovi' cuarenta ñaxari. Ca' quesaua'maxare siete saua ñaxari nashi neeta'ñi yi Hebrón, chaqai treinta y tres ñaxari nashi neeta'ñi yi Jerusalén. ₁₂Ime, ca' so Salomón taalec da lo'ueenataxanaxac so leta'a David. Ca' da lo'ueenataxanaxac quiyim nashi ỹaatqajam ỹa'maqachiguiñi.